شیعه لیک و ایرانیت دئیه فارس ایستعمارچیلیغی

علی شریعتی و فارس شعوبیه چیلیگی 15

 

 

کئچمیش دانیشیقلاردا علی شریعتی نین تورک شاهلیقلاری نی "غلامان ترک" دئیه گونئی آذربایجان تورکلوگونون ملی بیلینج و شعورونو باسدیرماسی اوزره بیلگی وئردیک. بو دانیشیقدا ایسه علی شریعتی نین بیر آدیم داها آیاق اؤنه و قاباغا گؤتوردوگو و ایران آدینی یئدک چکن فارس سولچو آخینلاری و تشکیلاتلاری دا فارسلیق دوشونجه و مفکوره سینه ساریلمالاری نی سفاریش ائتمه سی اوزره بیلگی وئرمگه چالیشاجاییق. علی شریعتی "ملتلر آراسی صینفی دایانیشما (همبستگی طبقاتی ) اوزره یازمیش:

"صینیفلی انتیرناسیونالیسم؛ انتیرناسیونالیسمین اَن یئنی تورو و نوعیدیر. اونون یوزایلدن آرتیق کئچمیشی یوخدور. کومونیست پارتیسی نین بیلدیریشی و اعلامیه سی ایله بللنمیش و معین ائدیلمیش. او مارکسیسمین دونیا چاپیندا ایستدیگی و ایده آلی ساییلار. بورادا فیلسوف مارکس ایله سیاسی مارکس آراسیندا بیر ضدیتلی مقام گؤرونمکده-دیر. فیلسوف مارکس اومانیسمه سؤیکه نر و انسانلارین صینیف آیریشماسیندان ناله ائدرکن، سیاستچی مارکس انسانلارین صینیف آیریشماسینا و حاکیمیتین چیخاری و منفعتی اوغروندا یالنیز ایشچی صینیفی نین قورتولوشو اوچون دئییل، بوتون باشقا صینیفلارا دا مراجعت ائدر. (مارکسا گؤره) ایستر تک باشینا حاکیمیت ائتمک، ایسترسه ده تک باشینا دوشونجه و فیکیر یئریتمک ایشچی صینیفی نین حاقی ساییلار. ملتلر آراسی کومونیستلیگین بونوره سی ایشچی صینیفی اوزرینده قورولموش. بئله دوشونولمویش: - توپلوملاردان، ملتلردن، بؤلگه لردن، ملتلر آراسی ایلیشگیلردن و دونیانین سیاسی گؤتوروشمکلریندن کنار بو چرچیوه-ده یاشایان بوتون ایشچیلر بیربیرلرینه باغلی و آسیلیدیرلار. اونلارین بیربیرلرینه احتیاجلاری اولدوغو اوچون آغریلاری و چکدیکلری اذیتلر ده بیربیرینه بنزردیر. بو باخیمدان اونلار بیر جبهه-ده یئر آلارلار. ایشچی صینیفی و طبقه سی بیر دونیا گؤروشو و تاریخین جبر ائتمیش بیر آلین یازیسی اساسیندا بیر ایستک و ایده آل دوغرولتوسوندا حرکت ائدر. او دا خالقلار آراسی و بین الخالق اجتماعیتین گئرچکلشمه سیدیر. اوراداکی نظام ایشچی صینیفی نین بیرلیگینه اساسلانار. بو دونیایا حاکیم اولاجاق تک نظام و سیستیم کومونیسمدیر. هرکسه حاکیم اولاجاق ایدئولوژی مارکسیسم آدلانار. مارکسیسم بیلیم و عئلم اولدوقدا کیمسه اونون قیراغیندا و خاریجینده قالابیلمز. بو دئدیکلریمیزه باخمایاراق تئوری دونیاسیندان قیراغا چیخارساق، معاصیر دونیا تاریخینه بیر آز تانیش اولانلار اون سکیزینجی عصرده انگیلیستان قوشونلاری آفریقا و آسیا تورپاقلارینی اشغال ائتدیگینی و بونون آرخاسینجا آفریقا و آسیا مملکتلریندن انگلیستانا خام ماتئریال، یییه جک و آزیقانین داشیندیغینی یاخشی بیلر. بئله لیکله (انگلیستاندا) تجارت بازاری گلیشمگه، یئنی ایش یئرلری، یئنی مسلکلر و پئشه لر یارانمیش. سونوچ و نتیجه اولاراق انگلیستان فابریکالاری نین گلیشمه سی سورعتلنمیش، اقتصادین دورومو و وضعیتی گوجلنمیش. اوجوزلوق، بوللوق انگلیستان خالقینا یئنی و کئچمیشده اولمامیش راحاتلیغی سوغات گتیرمیش.  بیرینجی دفعه اولاراق انگلیستان نین الی آغیزینا یئتیشمیش ایشچی صینیفی، نئچه تومارا (متیرلیک کاغاذا) قول چکمیش و اونو امضا ائده رک خیابانلاردا گؤوده گؤسترمیش. تظاهوراتچیلار انگلیستان استعمار دؤلتیندن و اونون قوشون باشچیلاریندان اشغالچی انگیلیستان قوشونلاری نین آفریقادا و آسیادا قالمالارینی ایسته یه رک یئنی قازانیلمیش تورپاقلاری الدن وئرمگین علیهینه اولموشلار. بئله لیکله مستملکچیلیگه معروض قالمیش مملکتلرین ایشچیلری و اکینچیلری نین یاشانتی قایناقلاری نی قوروتماغا چالیشمیشلار. بوندان شاشیردیجی سی بو دئدیکلریمیزین ترس (برعکس) اوزودور. او دا معاصر و سؤمورگه چیلیگین یوخ اولماسی زامانیندا باش وئرمیش: - مستملکه و مستعمره اولموش مملکتلردکی ایشچی صینیف، مارکس اونو دئوریمجیل و انقلابی قلمه آلماسینا باخمایاراق هامیدان داها آرتیق سؤمورگه چیلره باغلی اولدوغونو سرگیله میش و نمایشه قویموش. اونلار سؤمورگه چیلیگین سونا چاتماسینی اؤز ضررلرینه قلمه آلمیشلار. آفریقانین و آسیانین ضد ایستعمارچیلیق حرکتلرینده اَن توتوجو و محافظه کار کسیم، ایشچی صینیفی و طبقه سی ساییلارمیش.  آیدینلار، اکینچیلر، بورژوالار و وارلی کارلیلار بیله مستعمره چی گوجلر علیهینه ایشچی صینیفیندان قاباقچیل ایمیشلر... بؤیوک غرب دؤلتلرینه باغلی اولان مستملکچیلیگه تابع توتولموش مملکتلرین کومونیستلرین گؤروشونه گؤره، ایستعمارچیلیقدان آرینماق مسئله سینی استعمارچی مملکتلرده ایشچی انقلابی (انقلاب پرولتری) باش وئردیکدن سونرا حیاتا کئچه بیلر. بو گؤروش و  آنلاییش (اولدوقجا) مسخره ساییلار. بئله اولار و بو بیر دوزگون آنلاییش ساییلارسا، گرک هیند ملتی انگلیستاندا  ایشچی صینیفی نین  سرمایادارچیلیق سیستیمی نی قودرتدن سالاجاغی و کومونیستلیک انقلابی ایله انگلیستاندا ایشچی حؤکومتی قوراجاغی گونو گؤزلمه لی اولایمیش. بئله لیکله انگلیستان ایشچیلری انگلیستان ایستعمارچیلیغینی یوخ ائده رک هیندوستانا مستقیللیک وئرئیمیشلر!"[i]

اوسته گؤروندوگو کیمی علی شریعتی "ملتلر آراسیندا صینیف دایانیشماسی" نین ایناندیریجی و واقعیتلر ایله اوزلشمدیگینی، هر بیر مملکتین چیخاری و راحاتلیغی بوتون وطنداشلارین راحاتلیغیدیر دئیه بو دئدیکلرینی اثبات ائتمک اوچون انگلیستان حؤکومتی ایستعمارچیلیغا تابع توتدوقلاری مملکتلری ترک ائتمه سی ایله انگلیستان ایشچیلری نین مخالفت ائتدیکلرینی بیر دلیل دئیه گؤسترر.

اوسته لیک فارس کومونیستلیگینی ده دیل و مدنیت باخیمیندان آییق ساییق اولماغا و فارسلیق آنلاییشینی الدن وئرمک یانلیش اولار دئیه اونلارا اویاریق و اخطار وئرمگه چالیشار. بو آنلاییشا اساسن فارس دیلی و مدنیتینی قاورامیش مذهبی و کومونیست کسیم اوچون دئموکراسی و مذهبی مورال و رفتار انسانلیق آنلاییشی دئییل، فارس حاکیمیتچیلیگی نین "تمامیت عرضی" دئیه تورپاق بوتونلوگو بیرینجی و تعیین ائدیجی بیر فاکت اولاراق اورتادا دورار. بو دوغرولتود سیدحیدر بیاتین دینی و حوزه وی داییره لرده گلدیگی قناعتی دقت چکیجی ساییلار. بو گؤروشلرین ترجمه سینی اوخویوروق:

فارس دیلی مذهبیلر واسیطه سی ایله گوجلنمیش و شیعه دیلی دئیه یاییلار و تبلیغ اولونار. اوسته لیک فارس دیلینه صاحیب چیخماق اوچون مذهبیلر و غیر مذهبیلر آراسیندا یاریشما و رقابت گئدر. اؤرنک اولاراق محمدرضا حکیمی اوچ، دؤرت ایل بوندان اؤنجه قومداکی یازار طلبه لر ایله ائتدیگی گؤروشونده کومونیستلرین فارس ادبیاتی اوچون چکدیکلری زحمتیندن سؤز آچاراق اونلارین یاراتدیقلاری اثرلرین بیر بؤلومونو فارس ادبیات چایی نین بیر قولو آدلاندیراراق طلبه لری فارسچا یازیب یاراتماغا تشویق ائتمیش. ... شکسیز فارسچا کئچمیش یوز ایلده ایکی بیربیرینه قارشی اولان آخین و جریانلار طرفیندن گوجلنمیش. بو آخین و جریانلارین بیری: دینسیزلر، دین علیهینه ساواش آچانلار، اؤرنک اولاراق صادق هدایت، محمدعلی فروغی، ناتل خانلری؛ او بیری آخین و جریان ایسه دینمدار، اؤرنک اولاراق علی شریعتی، حکیمی، مطهری، مکارم شیرازی، سبحانی، مهاجرانی ... و باشقالاریدیر .... شکسیز بو ایکی آخین و جریان بیر یئرده اوزلاشمیش و یاخینلاشمیشلار. بونا اؤرنک و مثال اولاراق هاشمی رفسنجانی نین ری شهرینده شئیخ ابولفتوح رازی قورولتای و کونگیره سینده آشکارجا دیله گتیردیگی ایفاده لری گؤسترمک اولار، هاشمی رفسنجانی دئمیش: رژیم گذشته خیلی اهمیت می داد به گدشتهِ ایران و زبان فارسی و ... ما هم نباید این چیزها را منفی بدانیم". بو بیربیرینه اوزلاشما و یاخینلاشمانین زیروه سی حداد عادل سیماسیندا ظاهیر اولار. حداد عادل فارس فرهنگیستانی نین رئیسی اولاراق جمهوری اسلامی مجلیسی نین ده رئیسیدیر. باشقا بیر اؤرنک فارسپرست شخص اولاراق مشهدده فردوسی اونیوئرسیته سی نین اوستادلاریندان بیری اولان یاحقی نی آد چکمک اولار. یاحقی دئمیش: "ما جرأت نمی کردیم این حرف هارا (حرفهای فارس پرستانه را) بزنیم. سخنان آقای هاشمی به من جرأت داد."[ii]

اوسته گؤروندوگو کیمی علی شریعتی غرب اؤلکه لرینده اولان مارکسیسم، هومانیسم و مذهبچیلیک آخینلاردان فاکت گتیرمک ایله و آشاغیدادا ائشیده جه گیمیز اؤرنکلری سیرالاماقلا فارسلیق آنلاییشینی پهلویلر زامانی مود اولموش باستانگرایلیق، آریاچیلیق آنلاییشیندان دینچی، مذهبچی  داییره لره ده جالاماغا و فارسلیق و فارس مدنیت راسیستلیگی اوچون بؤیوک کوتله و توپلوم اولوشدورماغا چالیشمیش. بو اساسدا بوگون آذربایجان شهر و کندلرینده ده علی شریعتی نین اثرلری ایله تانیش اولموش تورک مذهبی کسیملر ده تورک دیل بیلینجی و شعورونا مالیک اولمادیقلاری اوچون "شیعه و ایرانیت" دئیه آذربایجانداکی سنتی "شیعه لیک" علیهینه ساواش آچماغا و علی شریعتی نین اویدوردوغو "تشیع علوی" یالانلاری نین آرخاسینجا هوری و قیلمان دئیه فارسلیق قاطارینا مینمگه و خالقی دا بو قاطارا میندیرمگه چالیشارلار. بو دوغرولتودا کئچیش دانیشیقلاردا جلال محمدی-دن اؤرنکلر سرگیلدیک[iii]. آذربایجان تورکلوگونون مذهبی کسیمی علی شریعتی نین بو شارلاتانلیق اثرلری ایله فارسلیغا جذب اولماسینا باخمایاراق سولچو کسیمی کئچمیشده ایران ممالیکی محروسه سینه ایدئولوژی داشیجی سی اولدوغو اوچون فارسچا رسمی دیل دئیه سؤزده حق تعیین سرنوشت (اؤز مقدراتینی تعیین ائتمک) آنلاییشینی دیله گتیرمه سینه باخمایاراق اؤز دیلی و مدنیتی اساسیندا تشکیلاتلانماغا و اؤزونه فارسلیقدان آیری و مستقیل تشکیلات قورماغا جسارت ائتمه میش.  دئمک، فارس سولچو تشکیلاتلاریندا فارس اولمایان شخصلر خئیرده شَرده اولان بیر آیاقچی کیمی فارس سولچولاری نین گؤز بویایان یالانلارینا اویار و فارسلیق باتلاغیندان اؤزلرینی اوزاق توتابیلمزلر.  علی شریعتی گئنه داوام ائدر:

"بو آنلاییش (غربده کومونیست سیستیمی قورولاجاق سونرا مستعمره چیلیگه تابع توتولموش توپلوملاردا آزاد اولاجاق آنلاییشی) موریس تورئز و الجزایرین کومونیست پارتی سی طرفیندن الجزایر "آزادلیق قورتولوش جبهه سی" نی تحریم ائتمکلری ایله حیاتا کئچمدیمی؟"[iv].

اوسته گؤروندوگو کیمی علی شریعتی ملتلر آراسی انتیرناسیونالیسم پرولتئری آنلاییشی نین دا یالان اولدوغونو و بو ایدئولوژیلرین بؤیوک ایستعمارچی گوجلر خدمتینده اولدوغونو وورقولاماغا چالیشمیش. گئنه ده اوخویوروق:

"باشقا یاندان، توپلوملار آراسیندا ایستعمارچی خاریجی گوجو ائشیگه سالماق اوچون صینیفلارا و طبقه لره آرخالانارکن بیر ملتین ایشچی صینیفی و طبقه سی اؤز صینفی و طبقاتی موضع سینی دگیشمدیگی اوچون او ملتین مستقیللیگی مارکسیسمین صینیفلر و طبقه لر تئوریسینده سیغیشابیلمز. دئمک (مارکسیسم تئوریسینه گؤره) ملی مستقیللیک حیاتا کئچدیکده ملی سرمایادارلیق و ملی بورژوالیق اؤزگه و خاریجی سرمایادارلیق و بورژوالیغین یئرینه اوتورار. بئله لیکله ایشچی صینیفی و طبقه سی مستملکچیلیگه و مستعمره چیلیگه تابع توتولموش ملت-ین اؤز بدنه سینده باش قالدیرماسی وورقولانار و تأیید اولونار. ملت ساحه-سینده ایستعمار علیهینه باشلانمیش حرکت و نهضت "ملی دایانیشما (همبستگی)" دئیه صینیفلار و طبقه لر آراسیندا اولان دوشمنلیکلره  اوستون توتولدوغو اوچون  بو حرکت مارکسیست انقلابی نین باش وئرمه سی نی تأخیره سالار. بو باخیمدان ملی باش قالدیرمالار و ملتلرین ایستعمارچیلیق علیهینه ائتدیکلری مجادیله سی مارکسیستلرین نظرینده "اؤگئی انقلاب (انقلاب ناتنی)" دئیه قلمه آلینار (دقت: بو باخیمدان مارکسیستلر ملتچیلری ارتجاعی دئیه قلمه آلار). (مارکسیستلر) سون ایللرده ملی حرکتلری قبول ائتسه لر ده، بو بیر سیاسی و دیپلوماتیک جبهه-ده یئر آلماق و دونیا چاپیندا رقابت ائتمک ماهیتی داشییار. ... آسیادا و اؤزللیکله آفریقادا ملتچیلیک نئجه مارکسیسمی گئری اوتورتدوغونا هامیلیقجا تانیق و شاهید اولدوق. ملتچیلیک ایستعمارچیلیق علیهینه رهبرلیگی اؤز الینه آلاراق پرولتر و ایشچی طبقه سی نین دونیادا انقلاب ائتمه سینه و سرمایادارلیق سیستیمینی یوخ ائتمه سینه گؤزتچی و منتظر قالمایاراق کومونیست پارتیلری اؤزونده اریتدی ویا اونلاری ضعیف بیر دوروما دوشوردو. (بونون آرخاسینجا) اونلار زامان آخاریندا مختلیف قوروپلارا بؤلونمه لی اولدولار. بئله لیکله بعضی مملکتلرده اوچ کومونیست پارتیسی وار گؤرونر"[v] .

علی شریعتی-یه گؤره مارکسیستلر "ملی آزادلیق" یانچیسی اولدوقلارینی بیر استئراتئژیک حرکت دئیه تانیملار و تعریف ائدرلر. بو قناعته دلیل اولسون دئیه، مستعمره چیلیگه معروض قالمیش مملکتلرده قورتولوش حرکتی نین گوجو "ملی گوجلر"ین الینده بیرلشدیگینی و سولچولار تجریده اوغرادیقلارینی و کمونیست یانچیلاری اؤز آرالاریندا بؤلوندوکلرینی بیر دلیل دئیه گؤسترمگه چالیشار. علی شریعتی نین بو گلدیکلری قناعت اولدوقجا دوزگون بیر قناعتدیر. علی شریعتی نین بو گلدیگی قناعتدن ایستر ایستر آذربایجان تورکلوگونون مذهبیلری، ایسترسه ده کومونیستلری ده درس آلمالیدیر دئیه دوشونورم. دئمک، هر هانکی بیر ملی توپلوم و مملکتین چیخارلاری، او توپلوم و مملکتی اولوشدوران بوتون وطنداشلارین چیخارلاری دئیه نظره آلینمالی، دیل و مدنیت اساسلی اورتاق و مشترک هدف اوچون بیرلیکده حرکت ائتمک دوزگون یولدور دئیه دوشونمه لیییک.

 

ملتلر آراسی انسانچیلیق، مذهبچیلیک و صینیفچیلیک دایانیشماسی

 

علی شریعتی ملی چیخار و منفعت هر شئیدن اوستون توتولمالی دئیه "ملتلر آراسی هومانیسم دایانیشماسی"، "ملتلرآراسی مذهب دایانیشماسی" و "ملتلر آراسی صنیف و طبقه دایانیشماسی"نین یالان اولدوغو اوزره اؤز گؤروشلرینی یکونلاشدیرماغا چالیشار، اوخویوروق:

"... برتراند راسئلین  دئدیکلری تعجب دوغوردوغو کیمی موریس تورئزدن ده بیر فاکت بیان ائدیم، بئله لیکله صنیفی و طبقاتی بین المللچیلیگین ده هامان آنلام و معنایا گلدیگی آیدینلاشمیش اولسون. دئمک، انسانی، مذهبی و صینیفی بین المللچیلیک، هر اوچو بیر نوع امپریالیسم ماهیتیندن حئکایت ائدرلر.  موریس تورئز یالنیز فرانسه کومونیست پارتیسی نین باشچیسی دئییل، ائله جه ده دونیا کومونیستلری نین تانینمیش شخصیتلریندن بیری ساییلارمیش. فرانسه ایستعمارچیلیغی نین شعاری "سئن چایی پاریسین باغریندان و قلبیندن کئچر و آغ دنیز (دریای مدیترانه) ده فرانسه نین باغریندان و قلبیندن کئچر" اولدوغونو بیلیریک. یعنی آفریقاداکی فرانسه مستملکه چیلیگینه معروض قالان مملکتلری و فرانسه-دن آییران آغ دنیز (مدیترانه دنیزی) اولدوغونا باخمایاراق بو توپراقلار بؤیوک فرانسه نین توپراغی ساییلار. مَثَللرده الجزایر فرانسه نین بیر بؤلگه سیدیر (دئییلر)! فرانسه نین کومونیست پارتیسی بو جغرافی بؤلوشمه نی قبول ائتمیش ایمیش. فرانسه ایستعمارچی رئژیمی الجزایرده وئرگی و مالیات اداره سی نین باشقانلیغی و ناظیرلیگی تابلوسوندا "فرانسه نین وئرگی و مالیات باشقانلیگی و ناظیرلیگی، الجزایر شعبه سی" یازدیغی کیمی، فرانسه کومونیست پارتیسی نین ده الجزاییرده شعبه سی وار ایمیش. اونون دا آدی فرانسه کومونیست پارتیسی، الجزایر شعبه سی آدلانارمیش. ملتچیلر و آیدینلار فرانسه کومونیست پارتیسی نین باشقانی موریس تورئزه بو مسئله اوزره اعتیراض ائتدیکده، او بیر کلاسیک مارکسیست وئرمه سی لازیم اولان جاوابی وئرمیش و دئمیش: "الجزایر ملت ده دئییل، مملکت ده دئییل، یالنیز بیر مملکت اولماق اوزره-دیر. بو ایفاده یالنیز (فرانسه ایستعمارچیلیغی نین ووروجو قولو ساییلان) ژنرال سالان و مسیو پینه کیمی نظامی شخصلرین دیلیندن ایفاده اولابیلرمیش"[vi].

اوسته گؤروندوگو کیمی علی شریعتی فارسلیق آنلاییشیندان یاپیشدیغی اوچون موضوع ایجابیندا هر هانکی بیر ملتلر آراسی دایانیشمانین یالان اولدوغونو اورتایا قویماسینا باخمایاراق زمان ایجابیندا ملتلر آراسی ایسلامچیلیغی فارسلیق اوچون چوخ دا یئرلی و یارالی قلمه آلمیش. دئمک، فرانسه ایستعمارچیلیغینی نقد و تنقید ائدن ذاتلار نه اوچون فارسلیق حاکیمیتی آلتیندا اینیلدگن و یوخلوغا معروض قالان ملی توپلوملارین وارلیغیندن سؤز آچماق ایستمه میشلر مسئله سی علی شریعتی نین دوزگون و صادیق اولمادیغینی دا اورتایا قویار. علی شریعتیدن اوخویوروق:

"... ملیت دوغرودان دا صینیفلار و طبقه لر آراسیندا اولان ضدیتی باسدیرماق اوچون دئییل. ترسینه صینیفلار و طبقه لر آراسیندا اولان دوشمنلیک و ضدیت ملیت اوچون بؤیوک خسته لیک و مریضلیک ساییلاراق ملتی بؤلوشدورمک اوچون بیر عامیل ساییلار"[vii].

اوسته گؤروندوگو کیمی علی شریعتی فارس جبهه ملی محفلینه باغلی اولدوغو اوچون ملیت آنلاییشینی دئموکراسی و پلورالیسم آنلاییشی ایله دئییل، تک سسلی بیر فارس دیل و مدنتی نی اساس گؤتورموش تشکیلات دئیه جبهه آنلاییشینی ساوینار و دفاع ائدر. بو آنلاییشین سونوچ و نتیجه سی ده تجربه ائتدیگیمیز دک دیکتاتورلوغا و گئری ذکالیغا یول آچار. علی شریعتیدن گئنه ده اوخویوروق:

"مارکسین آلمان، فرانسه و انگلیستاندا داخلی قارش دورما و ضدیتی مطرح ائتمه سی و مترقی بیر آنلاییش دئییل.  بو آنلاییش بیر جبهه-ده قارشی دورما یارادان و داغیلماغا یول آچان بیر آنلاییش ساییلار. بو جبهه بیر واحید بدن کیمی امپریالیسم و ایستعمار قارشیسیندا دورموش. ایکینجی دونیا ساواشیندان سونرا گلیشمه میش مملکتلرده (جهان سوم-دا) ایستعمارچیلیق علیهینه اولان باش قالدیرمالاردان اؤیرنمه میش اولان وار می؟  سؤمورگه سی و ایستعمارچی گوجلر هوجوم ائتدیکده امپریالیسمدن قورتولماق اوچون دایاناجاقلی و منطقی گوج ملیت ساییلار"[viii].

اوسته گؤرونوگو کیمی علی شریعتی نین صنعتی مملکتلرده کارل مارکسلارین "ایش" ایله "سرمایا" اوزره اورتایا آتدیقلاری گؤروشلرین یانلیش اولدوغونو منظور ائدر و فارس ملیتچیلیگینی "جبهه ملی ایران" دئیه قاباراتماغا چالیشار. علی شریعتی نین فارسلیق گؤروشونه اساسا ملی دیریلیک مسئله سی عموم فارس ملتینی اولوشدوران طبقه و صینیفلرین مسئله سی اولمالیدیر. ملت مقوله سینده هر هانکی صنفی منفعتی باهانا ائده رک ملت چیخارلارینا کورک چئویرمک اولماز. بو اساسدا دا علی شریعتی خالق کیته سی نین مسلمان اولدوغونو نظره آلاراق اؤز ایدئولوژیسینی "ملی و مذهبی" دئیه "شیعه لیک ایرانیت" اساسیندا اورتایا قویماغا چالیشمیش. دئمک، علی شریعتی بیر نظریه چی اولماسینا باخمایاراق اونون "باز شناسی ایرانی- اسلامی" نظریه لری طرفسیز گؤروشلر دئییل، علمی باخیمدان سیاستی فارسلیق خدمتینه آلمیش فارس ایستعمارچیلیغینا خدمت ائدر. 

 

ایشیق سؤنمز، 28.09.2018

 


 

[i]           علی شریعتی، بازشناسی هویت ایرانی- اسلامی، چاپ تهران، ص. 187.

[ii]           سید حیدر بیات، سبحانی مرجع تقلیدی  که اشعار "هوپ هوپ" نامه را حفظ است و ... https://hbayat.wordpress.com/author/turkicworld/page/19/

[iii]              ایشیق سؤنمز، علی شریعتی و فارس شعوبیه چیلیگی 5: http://www.isiqsonmaz.com/Seite379.pdf

[iv]          علی شریعتی، باخ اورادا.

[v]           علی شریعتی، باخ اورادا، ص. 188.

[vi]          علی شریعتی، باخ اورادا، ص. 190.

[vii]          علی شریعتی، باخ اورادا، ص. 190.

[viii]         علی شریعتی، باخ اورادا ، ص. 191.