گونئی آذربایجان ملی مسئله سی و ائتنیک آذربایجاندان اوزاق دوشموش تورکلرین ملی حقوقلاری تأمین اولونماسی اوچون نه ائتمک لازیم؟

بیلیندیگی کیمی گونئی آذربایجان تورکلوگونده ملی مسئله نین طرح اولماسی انسانلاریمیز آراسیندا اؤزلرینه گوونج و اطمینانی آرتیرارکن کئچمیشه دؤنوک ایرانین هارالاریندا تورکلرین یاشادیقلاری و اونلار ایله نئجه آذربایجان ملی مسئله سینی ایلری گؤتورمک اولار دوشونجه سی  ده سرگیلمیش اولار.

سیاست مسئله سینده بیر ایمکان (ممکنات) آنلاییشی اولمالیدیر. امکان و ممکن آنلاییشینا اساسا ایمکان داخیلینده تورکلوک (تورک وارلیغی) آنلاییشینی، بیز ایران ممالیکی محروسه سیندکی تورکلر ایله بؤلوشمه میزه و پایلاشمامیزا و انسانلاریمیزا تورک دیل بیلینجی و شعورو وئرمگه چالیشمامیزا باخمایاراق سیاسی باخیمدان دا نئجه حرکته کئچه بیلیب، بیلمگه جگیمیزی نظره آلمالییق. صاباح ایران ممالیکی محروسه سینده بیر فئدرال بیر سیستیم اوچون وضعیت موناسبت اولارسا، آذربایجان تورکلری یاشایان بیرلشیک و بیتیشیک تورپاقلارین هانکی ایالت و ولایتلری ایچردیگیینی (شامیل اولدوغونو)، بو بیرلشیک و بیتیشیک تورپاقلاردان اوزاقداکی تورکلر هارالاردا چوخلوقدا اولدوقلارینی و اؤزلرینی نئجه بیتیشیک و بیرلشیک گونئی آذربایجاندان اوزاق اولمالارینا باخمایاراق اؤز دیل و مدنیتلری ایله یاشادابیلمک ایمکانلارینی گؤتور قوی ائتمه لییک. بو باخیمدان کویرین هانکی بوجاغیندا فارسلیق سیاستی اساسیندا ایش اوچون گئتمیش، مجبور قالاراق یئرلشمیش، فارسلیق چئوره و موحیطینده ایستمدن فارسلاشمیش شخصلر اوزره  آغیرلیق قویاراق اونلار یئرلریندن قالخمازسا، اولماز دوشونجه سینی ایران ممالیکی محروسه سیندکی تورک وارلیغینا آشیلاماغا و تزریق ائتمگه چالیشماق بیر آز منطیق داییره سیندن اوزاق گؤرونر.  

بیز ازیلمیش بیر ملت اوولادی اولاراق وئره جگیم اؤرنک و مثال اوزره لطفا هئچکس یانلیش باشا دوشمه سین. کئچمیشده بئله بیر سؤزلرین دئییلدیگینی و هانکی مجرالارا داشیندیغی اوزره انسان داها دا آرتیق دوشونه رک اؤز دویقو و احساسینی بیر یانا بوراخاراق منطیق داییره سینده دوشونجه و فیکیر یئریتمگه چالیشمالی و سونرا اؤزونو ایفاده ائتمه لیدیر. بیلیندیگی کیمی کئچمیش یوقوسلاوی نین صرب رهبری Slobodan Milosevic یوقوسلاویدن ملی توپلوملار آیریلارکن دئمیش: "هر یئرده بیر صئرب وارسا، اوراسی صئربیستاندیر". بو دوشونجه و فیکیر اساسیندا کئچمیش یوز ایلده صئربیستانا آغالیق ائدن صئرب دیلی و مدنیتی صاحابلاری، صئرب مدنیت راسیستلری  یوقوسلاوی نین باشقا ولایتلرینه گئدیب یئرلشمیش صئربلری باهانه ائده رک او جومله-دن بوسنا هئرچوق ولایتیندکی مسلمانلاری قیرماغا و بشریتین اوزونو قاراتماغا چالیشدیلار. بئله بیر دوشونجه یه و فیکیره هر هانکی بیر فارس ایستعمار یانچیسی مالیک اولارسا، ایران ممالیکی محروسه سی نین هر هانکی اوجقار و اوزاق بؤلگه سینده بیر فارس وارسا، اوراسی فارسیستاندیر دئیه دوشونجه و فیکیر یئریتمگه چالیشارسا، نئجه بیر فاشیستی و راسیستی و جنایتلرین ایشلنه جگینه تانیق و شاهید اولاجاغیمیز هئچ ده چتین گؤرونمز. دئمک، ملی مسئله نی جیلیزلاشدیرماغا هئچ ده اساس یوخدور. سیستاندا، بلوچیستاندا یاشایان بیر تورک اورانین موحیطینه اویقون داورانمالی، باشاردیغی قدر اؤز دیلی و مدنیتینی ده قوروماغا چالیشمالیدیر. دئمک، دیل و مدنیت اساسلی وطن دویقوموزو و حیسیمیزی باشقا ائتنیکلر یاشایان توپراقلاردا آختارماغا چالیشارساق، ایران ممالیکی محروسه سینده بیر مدنی و انسانی توپلوملارین یارانما شانسلاری صفر ساییلار. ملی مسئله لری "ایران" آدی نین آلتیندا گیزلتمگه و فارسلیغین گؤرونمه سینه مانع اولماغا چالیشانلارین دا هدفی بو: "بوراسی ایراندیر، ایران نین رسمی دیلی ده فارسدیر"!

رشت شهری کیمی تورکلر یاشایان بیر شهر قونو و موضوع اولدوقدا، اورانین یئرلی گیلک خالقینی دا نظره آلماق لازیم. دئمک، گیلکلر بیر ملی وارلیق اولاراق اؤزلرینی درک ائدرلرسه، محلی حؤکومتلرینی قورماق ایسترلرسه، اوراداکی تورک آزلیغی دا شخصی و فردی حالتدن چیخاراق بیر ملی آزلیق توپلوم کیمی اؤزونو تورک دیلی و مدنیتی اساسیندا یاشاتماق ایسترسه، اونلار ایله دایانیشماق ایچینده اولماق یئرلی قورولاجاق قوروملار ایله مدنی ایلیشگیلر یاراداراق اوراداکی تورکلرین اؤز دیللری و مدنیتلری اساسیندا یاشاییشلارینی یاخشیلاتماغا ایمکان ساغلاماق آذربایجان تورکلوگونون بیرینجی وظیفه لریندن ساییلار. آنجاق رشت شهرینده کی تورکلر شخصی و فردی قالیبلرینده تورکلوگه مئیل گؤسترمزسه، گیلکلر ایله فارسچا ایلیشگی حالیندا اولاراق گیلک توپلومونو دا فارسلاتماغا و فارس ایستعمارچیلیغی الینده بیر قوز اولماغا چالیشارسا، او زامان تورکلوک مقامی علیهینه ده دوشمن صفینده یئر آلدیغی اوچون اونون ووراجاغی ضربه نین بیری ده تورکلوک علیهینه اولاجاقدیر.

خوراسان و قاشقای تورکلری نین مسئله سی بیر آز فرق ائدر. اونلار یالنیز بیر شهرده و کندده دئییل، خوراساندا و ایران ممالیکی محروسه سی نین گونئیینده کومپاکت و بیرلشیک بللی بیر جغرافی توپراقلاردا یاشار و او جغرافی بؤلگه نین صاحیبی ساییلارلار. دئمک، ایلک اولاراق بو بؤلگلردکی تورکلرین آیدینلاری آدی کئچن بؤلگلردکی تورکلری اؤز دیل و مدنیتلری اطرافیندا سفربر ائتمه لی و "آنا وطن" ماهتینده اولان ائتنیک آذربایجان تورکلوگو ایله سیخ ایلگی و رابیطه قورماغا چالیشمالیدیرلار. گونئی آذربایجان تورکلوگو ده اوراداکی تورک تشکیلاتلاری و جمعیتلری ایله ایلگی و ایلیشگیده اولاراق اونلارین ایستکلرینی محلی قورولاجاق نظام و انتظام داییره لرینده مطرح اولماقلارینا اؤزلرینی دیل و مدنیت اساسلی اداره ائتمک باخیمیندان حاق آلماقلاری اوچون اونلارا کؤمک ائتمه لیدیر.  

تورکمنلرین یالنیز ایچریده دئییل، خاریجده ده مستقیل تشکیلاتلاری وار. دئمک، تورکمنلر ایله دایانیشماق (همبستگی) ایچریسینده اولماق، ال اله وئرمک، و قول قولا ملی حاقلارین آلینماسی اوچون حرکت ائتمک چیخیش یوللاردان بیری ساییلار.

هر بیر ملی توپلوم اؤز دیلی و مدنیتی اساسیندا تشکیلاتلانماسی و اؤزونو بیر ملی توپلوم اولاراق درک ائتمه سی ایله حیاتا کئچه بیله جک بیر سورچ و پروسه ساییلار. ترس دورومدا و وضعیتده "همه باهم" دئمک ایله هر هانکی بیر کیراواتلی فارس ایستعمار یانچیسی فارس مدنیت راسیستلرینی اؤز یانینا آلاراق هر بیر ملی توپلومون آیدینلاری نین دا باشینا بیر توربا تاخماغا چالیشاجاقلاری هئچ ده چتین گؤرونمز. دئمک، فارس ایستعمارچیلیغینا قارشی قویمانین بیرینجی آددیمی هر بیر ملی توپلوم اؤز دیلی و مدنیتی اساسیندا تشکیلاتلانماغا و فارسلیق دوشونجه و مفکوره سیندن خالقی اوزاق توتماغا چالیشمالیدیر.

کئچمیش یازیلاریمیزدا دا اشاره اولوندوغو کیمی ایران ممالیکی محروسه سینده تورک توپلوملاری اؤز دیللرینده (تورکچه) بیلینج و شعورا مالیک اولمادیقلاری اوچون فارس مدنیت راسیستلیگی اونلاری "ایرانلی" دئیه فارسلیغا بیر آلت و وسیله ائتمیشلر. دئمک بو مسئله احمد کسروی، سید جواد طباطبایی، قاشقای و بختیاری کؤچریلری نین قوام السلطنت دؤلتینه ال چالدیقلاری ایله ایضاح ائدیله جک مسئله دئییل، بو مسئله ایران ممالیکی محروسه سینده تاریخدن گونوموزه گلن یازیلی تورک دیلی بیلینجی و شعورونون یوخلوغونو وورقولاماق و قبول ائتمک و اوندان عبرت درسی آلماق ایله ایضاح ائدیله جک بیر بیلینج و شعور مسئله سی ساییلار. دئمک، بو مقاملاری گؤرمک ایستمگن، تدبیر آلمایان توپلومون بو خطالاری بیر داها تیکرار ائتمک احتمالی اولدوقچا بؤیوک ساییلار[1]. بیر چوخ انسانلاردا دیل بیلینجی و شعورو او دیلده یازماق و او دیلی لمس ائتمک ایله حیاتا کئچه بیله جک بیر آنلاییش ساییلار. دئمک، دیل و مدنیت اساسلی اؤزونو و اؤز ملی کیملیک و منلیگینی درک ائتمگن توپلومدان و شخصدن نه گؤزلمک اولار؟ دئمک، انسان هر هانکی بیر دیلده یازیرسا، او دیلده دوشونمه سی حتمی بیر مسئله ساییلار. بئله لیکله ده او دیلده بیلنجلنمیش وشعورلانمیش اولار. آلمان دوشونورو وینتگئن شتاین نین باخیشینا گؤره دوشونمک ایله دانیشماق آراسیندا هئچ بیر آرا و فاصیله یوخدور. انسان نین اؤزونو ایفاده ائتمه سی ایله دوشونمه سی آراسیندا آرا و فاصیله قویماق امکانسیزدیر.

مسئله آذربایجاندان اوزاق دوشموش تورکلری اؤز تورکلوکلریندن یاییندیرماق دئییل، مسئله قونشو خالقلارا باخدیقدا تشکیلاتلانماق مسئله سی ساییلار. دئمک، قاشقای توپلومونداکی تورک آیدینی اوراداکی یئرلی تورکه، اونون کیم اولدوغونو باشا سالماق ایستمزسه، اؤزونو درک ائتمزسه، حالوا حالوا دئمکله آغیز شیرین اولمادیغی کیمی، تورک تورک دئمک ایله ده تورکلوگو خوش گونه چیخارابیلمز. دئمک، هر بیر کومپاکت جغرافی بؤلگده یاشایان ملی توپلوم ایلک اؤزونو درک ائتمه لی، تشکیلاتلانمالی سونرا قوهوم قارداشینا کؤمک ائتمگه چالیشمالیدیر.

بعضیلرینه گؤره بیزلر ایراندا عموم تورکلوک مسئله سینی مطرح ائتمزسک، پان ایرانیستلر آذربایجانلیلاری "آریایی_آذری" ایفاده سی ایله کئچمیشده کی کیمی آلدادارلار. پان ایرانیستلرین "آریایی_آذری" ایفاده لری مطرح اولدوقدا بو محفللر فارس راسیستلیک و فاشیستلیک مفکوره سینه مالیک اولموش و حاکیمیتی ده فارسلیق انحصاریندا تعبیر، تفسیر ائتدیکلری و حاکیمیت ده حاکیمیتچیلیک باخیمیندان فارس حاکیمیتی اولدوغو اوچون اونلار یالان و ایچی بوش شعارلار ایله عوام خالقی آلداتابیلمکلرینه باخمایاراق، تورک دیلی و مدنیتی اساسیندا "حاکیمیتین نئجه اولدوغونو، نئجه اولاجاغینی اؤزونده سیغدیرابیلمگن تورک آیدینی نین ایشی اولدوقجا چتیندیر. دئمک، تورک دوشمنلری فارسلیق حاکیمیتی آتینا سوار اولدوقلارینا باخمایاراق، تورک دیلی اداره چیلیگی باخیمیندان ایران ممالیکی محروسه سینده کی تورکلر آتین هانکی بویاق و رنگیده اولدوغونو بیله اؤزلرینه ترسیم ائده بیلمزلر. دئمک، تورک آیدینی ایلک هارادا و هانکی اساسدا حاکیمیت قورماسینی درک ائده رک توپلوما دا بو مسئله نی ایضاح ائتمه لی و تورک توپلومونو بو مسئله یه ایناندیراراق سفربر ائتمگه چالیشمالیدیر. ایران ممالیکی محروسه سینده بیر داها تاریخ گئری دؤنه جک و تورکلولوگون حاکیم اولاجاغی ایمکانسیز ساییلار. بئله لیکله تورک آیدینی اولابیله جک ایمکانلاری گؤتور قوی ائده رک بو چیخمازلیقدان چیخیش یولو تاپماغا چالیشمالیدیر. بوگون ایستر فارس حاکیمیتی نین مختلیف قاتلارینی، ایسترسه ده فارس دوشونجه لی اولان مختلیف تشکیلاتلارین اساسنامه و چیخیشلارینا باخدیقدا اونلارین ایران ممالیکی محروسه سینده تورک ملی وارلیغینی گؤرمزدن حرکت ائتدیکلری بیزی داها دا آرتیق دوشوندورمه لیدیر. کورد تشکیلاتلاری دا خوراسانداکی کوردلر دئیه کوردلوک مسئله لرینی خراسانداکی کوردلرین نئجه اولاجاقلارینا دویونلمیش دئییللر. دئمک، دایانیشماق و تبلیغات مسئله سی باشقا، سیاسی و اجتماعی تشکیلاتلانماق باشقا. بونلاری بیربیرلرینه قاتماغا چالیشلانلار ملی مسئله-دن دوغرو و دوزگون تصویره مالیک دئییللر.

اؤزلرینی تورکچو دئیه آذربایجان ملی مسئله سی ایله مخالفت و دوشمنلیک ائدن ذاتلارا خطابیمیز بو اولمالیدیر: - تورکچولوک هانکی دیل و مدنیت اساسیندا اولاجاقمیش؟ آذربایجان تورکچه سی تورک دیلی ساییلماز می؟ نه اوچون بیر پارازیت کیمی آذربایجان تورکلوگونه اؤز ملی کیملیگی و منلیگی اساسیندا تشکیلاتلانماغا مزاحم اولماغا چالیشارسینیز؟ دئمک، بوش بوش تورکچولوک شعاری وئرمکله فارس ایستعمارچیلیغینا تابع توتولموش و داغینیق بیچیمده یاشایان، یازیلی تورک دیلی بیلینجی و شعوروندان محروم قالمیش خالقی خلاص ائتمگین یولو ایلک کومپاکت و بیرلشیک حالدا یاشادیقلارینی نظره آلاراق اونلارا تشکیلاتلانماق شانسی تانیماق و بو یولدا تشویق ائتمک واجیب ساییلار. ایستعمار زینجیری قیریلدیقدان سونرا تورکون تورکو تاپابیلمه سی هئچ ده چتین دئییلدیر.

ایشیق سؤنمز، 04.08.2019