فارس تشکیلاتی سازمان فدائیان خلق اکثریت ایکی یول آیریجیندا!

بیلیندیگی کیمی هر بیر  شخص و سیاسی تشکیلات ییغجام دوشونجه و فیکیره ییه لنمز سه، تدبیر تؤکمه سینده باشاریلی اولماسی چتین مسئله دیر. بو مسئله یه یاناشدیقدا ایدئولوژی باخیمیندان، سازمان فداییان خلق اکثریت ده آلاخان بالاخان دوروموندا اولان  فارس تشکیلاتلاریندان بیری ساییلمالیدیر.

بو حضراتلار سولچولوق ایددعالاریندا اولمالارینا باخمایاراق ایران ایسلام اینقلابیندان سونرا اؤزلرینه موستقیل بیر سیاسی خط سئچمه قابیلییتینده اولمامیشلار. ایران ممالیکی محروسه سینده ایسلام اینقلابی باش وئردیکدن سونرا بونلار دا باشقا فارس تشکیلاتلاری کیمی یارانمیش آچیق و دئموکراتیک فضادان فایدالاناراق تشکیلاتلانماغا باشلامیشلار. بو حضراتلار تئوری باخیمیندان یوخسول اولدوقلاری اوچون توده پارتیسینین تأثیر داییره سینه دو.شه رک حاکیمیت اورقانلارینی محکملندیرمه گه چالیشان حزب جومهوری ایسلامی حاکیمیتینه آلت اولاراق »سپاه پاسداران باید به سلاحهای سنگین مجهز شوند« دئیه ایجتماعییتی عوامفریبلیگه دوغرو یؤن (جهت) وئرمه گه باشلامیشلار.

بونلارا باخمایاراق فرخ نگهدارین یازیلاریندان و رادیو مصاحیبه لریندن گؤروندوگو  کیمی بونلار ایران ایسلام جومهوریسینه اوپوزیسیون ساییلمالارینا باخمایاراق ایسلام جومهوریسینین ایصلاحاتچی آدلانان حاکیمیت قانادینا خط وئرمه گه چالیشمیشلار(باخ: فرخ نگه دار  و بهزاد کریمی مناسیبتلرینه 3). دئمک، بونلارین مسئله سی ایران ممالیکی محروسه سینده کی میللتلر مسئله سی و دئموکراسی دگیل، حاکیمیتی اله آلماق اوچون قورماغا دوشوندوکلری کؤرپولر مسئله سی ایله ایضاح ائدیلمه لیدیر. بو مسئله لردن بیری ده مصدقچیلیق قالیبینده راسیست کیمی تانینان »حزب ملت ایران« و ساییر قوروملارا مصدیقی عزیزله مک اوچون سازمان فداییان خلق اکثریتین گؤندردیگی آچیق تبریک مساژیدیر. بو مساژین بعضی پاساژلارینی بیرلیکده اوخویوروق:

" دوستان برگزارکننده بزرگداشت نام و ياد دکتر مصدق!

هيئت سياسي – اجرايي سازمان فداييان خلق ايران (اکثريت)، گرامي‌داشت يکصد و بيست و سومين زادروز ماندگارترين نماد نهضت ملي مردم ايران – دکتر محمد مصدق را، که به ابتکار و همت شما سازمان يافته است ارج مي نهد و آن را پاسخي در خور به نياز سياسي امروز جامعه ايران مي داند".(1)

بو اوسته خیطاب ائتدیکلری دوستلاری (دوستان برگزار کننده...) حزب میللت ایران، حزب نژادپرست جبهه میللی، حزب پان ایرانیست و ساییره آدلی قوروملاردان سونرا داها هانکی تشکیلاتلار اولا بیلر؟ دئمک، پاسدارلار قوشونونو آغیر سیلاحلار ایله یاراقلاندیرین دئین تشکیلات باشچیلاری بو بیاننامه ایله حاکیمیتی اله آلماق اوچون داها آیری بیر دیپلوماسی کؤرپوسو یاراتماق مقصدی گوده رک مصدق آدینی بیر بهانا ائتمیش گؤرونورلر.

دئمک، ایران ممالیکی محروسه سینده کی میللتلر مسئله سینی مصدق آدی عنوانی ایله »جامعه ایران« دئیه بیر توربایا ییغماغا چالیشانلار تمامیتچی گوجلردن باشقا داها نه اولا بیلر؟ بونلارین نظرینجه تمامیتچیلیک اوچون بیر دیل و بیر مدنیت دانیلماز فاکتلاردان ساییلمالیدیر. بوندان یانا دا »سازمان فداییان خلق اکثریت« فارس اولمایان جریانلاری محللی (جریانهای محلی باخ: 2) آدلاندیریر. دئمک، مسلمان اولماق ایسته مه دیکلرینه باخمایاراق فارس دیل و مدنیتینی گؤگدن یئره گؤندریلمیش بیر آیه کیمی قلمه آلان بو تشکیلات منسوبلاری ایران کلمه سینی بیر میللی کیملیک عنوانی کیمی اؤز تشکیلاتلاری اوزرینه باشقا فارس تشکیلاتلاری کیمی یاپیشدیراراق فارس اولمایان ایجتماعیتلری کئچمیشده کی کیمی آلداتماغا چالیشاجاق گؤرونورلر. گئنه ده اوخویوروق:

"در ايران کنوني، دموکراسي يک خواست همگاني، و درونمايه جنبش ملي امروزين کشوراست."(1)

بیلیندیگی کیمی دیل و مدنیت باخیمیندان حاکیمیت اعمال ائتمک گوجونه صاحیب اولان بیر توپلوم اوچون میللی حرکت مقوله سی یئرینه یئتیریلمیش ساییلمالیدیر. ایران ممالیکی محروسه سینه گلدیکده ایسه، ایستعمار دوروموندا اولان فارس دیل و مدنیتی اساسیندا میللی مقوله دن بوگون سؤز صوحبت ائتمه گه چالیشان قوروم و تشکیلاتلار ایستعمار عامیلی و دالی قالمیش دوشونجه لره صاحیب اولمالیدیرلار. بونلارا باخمایاراق فارس دیلینی زبان اصیل ایرانی، فارس موسیقیسینی موسیقی اصیل ایرانی آدلاندیران و باشقا دیل و مدنیتلری فرعی و محللی بیر مسئله کیمی ایران ممالیکی محروسه سینده قلمه آلان تشکیلاتلار تمامیتچی و گونوموزون ایستکلرینه جاواب وئرمه قودرتینه صاحیب اولمایان گؤرونومونو یانسیدیرلار (اینعیکاس وئریرلر) دئیه دوشونمه لی ییک. دئمک، میللی حرکت »ملی جنبش« حاکیمیت چئوریلیشی واسیطه سی ایله تحمیل و اعمال اولموش فارس دیل و مدنیتینه اساسلانان تشکیلاتلارا عایید اولان بیر مسئله دگیل،بوگون دیل و مدنیت باخیمیندان فارسچیلیق ایسارتیندن آزاد اولماق ایسته گن آذربایجان تورپاقلاری، کوردوستان، خوزیستان، لوریستان، تورکمنیستان، سیستان و بلوچیستان و ساییره ده کی توپلوملار اؤز کیملیک و منلیکلرینی دیرچتمک چابالاریندا اولدوقلاری اوچون میللی حرکت مقوله سی بو توپلوملار اوزره کئچرلی ساییلمالیدیر! دئمک، بوگون و دونن (پهلویلر دؤنمینده) فارس توپلومو اوچون ایستیبداد مسئله سی گونون موضوعسو ایدیسه، فارس اولمایان توپلوملار اوچون اؤز دیلینده اؤزونو ایفاده ائتمه گوجونه صاحیب اولما، میللی و مدنی اورقانلارینی یاراتما گونون موضوعسو اولمالیدیر. بئله لیکله ده ایران ممالیکی محروسه سینده فارس اولمایان میللتلر آراسی میللی حرکتلرین گره کلیگی وورقولانمیش اولور. گئنه ده اوخویوروق:

" ..جامعه ايران به پشتوانه صد سال تلاش فکري و سياسي همراه با کاميابي‌ها و ناکامي‌ها براي استقرار دموکراسي در کشور، اينک در پي برآمددهي سرنوشت‌ساز به خواست دموکراسي در قالبي همگاني و ملي است. بر يک چنين زمينه و بستري است که رجوع به نمادهاي ملي محبوب و نقش‌آفرين در تاريخ معاصر ما که در ميان آنان نام مصدق بي گمان، نامي است بي بديل، معني و مفهوم پيدا مي کند. نام مصدق، حاوي آن بار تاريخي پر ارزشي است که امروز مردم ايران براي فرارويي به يک فرداي دموکراتيک و از آنِ خود، ناچار به برگشت به آن و تغذيه از آن هستند"(1)

بورادا »سازمان فداییان خلق اکثریت اوچون میللی نماد دئیه قلمه آلینان محمد مصدق و او باشچیلیق ائدن حزب جبهه میللی بیلیندیگی کیمی ایران ممالیکی محروسه سینده کی فارس اولمایان توپلوملارا هر هانسی اؤز کیملیک و منلیکلرینی یاشاتمالاری اوچون بیر یئر آییرمامیشدیر. بوگون اؤزلرینی مصدق مقامیندا گؤرمک ایسته گن پرویز ورجاوندلرین ده دیل و مدنیت باخیمیندان تمامیتچی و راسیست اولدوغونو محمد خاتمی جنابلارینا یازدیغی مکتوبلاردان اؤیرندیکده (5) بیر داها مصدق آدینا مصلایا چیخان ذاتی عالیلره تبریک مساژی گؤندرمک ایسته گن قوروملارین سیاسی و ایجتماعی باخیمدان هانکی آشامادا (مرحله ده) یئر آلدیقلارینی اؤیرنمیش اولوروق. گئنه ده اوخویوروق:

"... به باور ما برگزاري مراسمي از اين‌دست، مي تواند و بايد در خدمت گردهم‌آمدن آزادي‌خواهان ايراني و اتحاد همه آناني باشد که براي ايران، دموکراسي مي خواهند"(1)

بورا دا فداییان خلق اکثریت مصدق آدی آلتیندا بیر آرایا گلمه نی بیر بیرلیک علامتی کیمی قلمه آلدیقدا گؤروندوگو کیمی حلیم یئمک سئوینجیندن قازانا دوشه جک گؤرونور. دئمک،دیل و مدنیت باخیمیندان نژادپرست کیمی تانینان حزب پان ایرانیست، حزب میللت ایران، حزب جبهه میللی و ساییره  قوروملار ایله بیرلیک ائتمه گه دوشوننلر نئجه دئموکرات اولا بیلرلر؟

گئنه ده اوخویوروق:

"... دموکراسي نهادينه شده در قالب ساختار قدرتي که جمهوريت است و تماماً منتخب مردم و پاسخ‌گو به مردم؛ و دموکراسي اي که، به سلوک عمومي و رفتار و هنجار سياسي و فرهنگي همه جريان‌ها و نحل سياسي کشور بدل شده باشد... . مصدق، عامل پيوند است و نبايد دست‌افزار تفرقه‌جويي و مايه تفرقه باشد. مصدق، به همه ايرانيان دموکرات و پاي‌بند به منافع ملي تعلق دارد. مصدق، چتر ي است که زير آن براي هر ايراني ملي و دموکرات جا است"(1).

سازمان فداییان خلق اکثریتین اوسته کی ایفاده لری اینقلابدان سونراکی حزب توده نین حزب جومهوری ایسلامی اوچون وئرمه گه چالیشدیقی درسلری خاطیرلادیر. بیلیندیگی کیمی حزب توده ده »خطر آمریکا حتمی است، متحد شویم«، دئیه اؤز فیکیرلرینی تهرانداکی حاکیم داییره لره آشیلاماغا (تلقین ائتمه گه) چالیشیردی. دئمک، تبریزده خلق مسلمان حرکاتیندا بو حضراتلار تهران حاکیمیتینین یانیندا یئر آلماغا چالیشدیقلارینا باخمایاراق نه یین نه اولدوغونو سونرالار آنلامیش اولدولار (داها آرتیق معلومات اوچون باخینیز: 4).

قایناق:

1        http://www.iran-chabar.de/1384/02/31/003.htm

http://www.iran-chabar.de/1383/11/01/aksariyat831101.htm

3        فرخ نگهدار ، قدرت رهبران سياسی در آن است كه به خود دروغ نگويند:

:http://archiv.iran-emrooz.net/negahdar/negahd821115.html

http://www.golshan.com/asnaad/toodeh/html/azarbayjan.html

http://news.iran-emrooz.de/more.php?id=3041_0_7_0_M

ایشیق سؤنمز 22.05.2005

فارسچی گؤروش