سفیللرین خاریجی دؤولتلره بشر حاقلاری قونوسوندا رجز اوخوما مسئله سی
بیلیندیگی کیمی ایجتماعی مسئله لر ایله اؤزونو مشغول ائتمگه چالیشان ذاتلار ایلک اؤنجه بیرئی (فرد) اولاراق عایید اولدوغو توپلوم و خالق کیتله سی نین دورومونو نظره آلاراق فیکیر یئریتمگه باشلامالیدیرلار. بو باخیمدان اصلیت لری آذربایجانلی اولان اینسانلار ایلک اولاراق آذربایجان ایجتماعیتی اوزره فیکیر یئریتمه لی، آذربایجان توپلومو ایله قونشو توپلوملارین هانکی موناسیبتلری اولدوقلارینی گؤزدن کئچیرمه لی، آذربایجان توپلومونون میللی، مدنی، ایجتماعی و ایقتصادی دورومونون قونشو توپلوملار و حاکیمیت طرفیندن هانکی ساحه ده یئر آلدیغینی نظره آلمالیدیرلار. بو اورتایا قویدوغوموز مسئله لری و ایران ممالیکی محروسه ده کی فارس حاکیمیتی طرفیندن اعمال اولموش عاریض، معروض مسئله لری حلل ائتدیکدن و اونلارا چؤزوم (حلل) یولو تاپدیقدان سونرا ایجتماعی خادیملر حاکیمیت و حاکیم سیستیمی قوروماق اوچون فیکیر یورماغا چالیشمالیدیرلار.
اوسته کی تابلولاری نظره آلدیقدا کئچمیش 81 ایلده فارسلیق حاکیمیت سیستیمی طرفیندن اعمال اولموش میللی، مدنی، ایقتصادی و سیاسی ظولملر اوچون حلل یولو تاپماغا چالیشماق بوگون هر بیر آیدین نین بیرینجی وظیفه لریندن حئساب ائدیلمه لیدیر. بو مسئله لر حلل اولمادان ایران ممالیکی محروسه سینده کی فارس اولمایان ایجتماعیتلرین آیدینلارینا خاریجی قودرتلره اینسانیت درسی وئرمگه قالخماق گرکسیز گؤرونور. دئمک، خاریجی دؤولتلره اینسانلیق درسی وئرمگه چالیشان ذاتلار ایلک اؤنجه تابع اولدوقلاری توپلوما حاکیم نیظام و اینتیظام طرفیندن اینسانلیق موعامیله سی گؤردوکلرینی و اینسان کیمی موعامیله اولدوقلارینی یقین ائتدیکدن سونرا بیزیم توپلوم و حاکیمیتیمیز اینسان حاقلاری مسئله لرینی قاورامیش دئیه دوغرو بیلدیکلرینی خاریجی دؤولتلره اؤیرتمگه چالیشمالی و اونلارا اینسانیت و بشر حاقلاری مقوله سیندن سؤز آچمالیدیرلار دئیه دوشونمه ییک. بو باخیمدان کئچمیشده فارس سولچو مئاب تشکیلاتلارینا پادوچولوق ائتمیش و بوگون حزب نژادپرست جبهه میللی فارس تشکیلاتینا پادوچولوق ائتمگه چالیشان محمد ارسی نین فیکیرلری اوزره دایانماق پیس اولماز دئیه دوشوندوک، اوخویوروق:
".. هم اکنون، فضای ضدایرانی چنان در حال گسترش است که به امثال من نیز که در جستجوی آزادی و در ادامه‌ی پیکار برای دمکراسی و کرامت انسانی به کشور شما پناه آورده‌اند، بسیاری از آمریکایی‌ها به دیده‌ی شک و تردید می‌نگرند، نگرانند مبادا عامل حکومت ایران، حامل سلاح کشتار جمعی و یا مروج افکار تروریستی و ضدآمریکایی باشند." (1)
اوسته گؤروندوگو کیمی محمد ارسیلرین اینسانلیق مقوله لری یالنیز ایرانیت مقوله سی ایله ایزگیلنمیش (نوقطالانمیش) اولور. بیلیندیگی کیمی آمریکا بیرلشمیش شتاتلاری و تهران حاکیمیتی آرالاریندا اولان قارشی دورما میللیتلرین و توپلوملارین دوشمنلیگی دئییل، بو مسئله حاکیمیتلرین قارشی دورما مسئله سیدیر. میللتلری دئییل، حاکیمیتلری اساس گؤتورورسک، کئچمیش 81 ایلده تهرانا حاکیم اولموش فارسلیق حاکیمیت سیستیمی فارس اولمایان توپلوملارین یئر آلتی قایناقلارینی ایستر اؤزو ایستعمار ائدیر، ایسترسه ده خاریجی گوجلره داشینماسینا یول آچاراق الده ائدیلن گلیر و سرمایانی فارس بؤلگه لرینه، فارس دیل و مدنیتی ایختیارینا آلماغا چالیشیر. بو ایستعار ائتمه یالنیز یئر آلتی قایناقلاریندا ایزگیلنمگه رک (نوقطالانمایاراق) فارس اولمایان توپلوملارین اینسانی و دوشونجه گوجلرینی ده فارسلیق سیستیمی نین خیدمتینه آلمیش اولور. بو ایستعار مقوله سی اوسته اؤزونو آمریکا بیرلشمیش شتاتلارینا سیغینمیش ایرانلی (فارس!!!) بیلن محمد ارسی لری آمریکا بیرلشمیش شتاتلاریندا بو فارسلیق سیستیمی نی قوروماق اوچون دوشونمگه زورلارکن بو ذات عالیلری ایستعمار اولموش توپلوملار جرگه سینده دئییل، ایتستحقار (تحقیر اولموش)اولموش، میللی منلیک و کیملیکلری تئرور اولموش شخصلر سیرالاریندا دا یئر آلدیراراق فارس شوونیزمینه پادوچولوق ائتمگه زورلاییر. محمد ارسیدن گئنه ده اوخویوروق:
".. اگر چنان جنگی دربگیرد، یقین است که، ایرانِ استبداد و جنگ زده، در باتلاق ستیزه‌جویی‌های قومی و مذهبی، در چاه جدال‌های مافیایی- فرقه‌یی، چنان تجزیه و غرق خواهد شد که روی دست هر مهاجمِ اشغالگری باقی خواهد ماند."(1)
گؤروندوگو کیمی محمد ارسی ده فارس شوونیستلری کیمی ایران ممالیکی محروسه سینده کی میللیتلر مسئله سینی بیر باتلاق دئیه قلمه آلیر. دئمک، بو ذاتلارین بشر حقوقلاری دئیه قلمه آلدیقلاری فارس آغالیغینی ایران ممالیکی محروسه سینده سوردورمک، فارس اولمایان میللیتلری فارسلیق ایسارتینده ساخلایاراق باستانگرایلیق خیاللاریندا آت چاپدیرماق مسئله سینی اورتایا قویموش اولور. بیلیندیگی کیمی ایران ممالیکی محروسه سینده یالنیز ایستیبداد دئییل، فارسلیق ایستعماری دا حاکیم گؤرونور . فارسلیق ایستعمار سیستیمی داغیلمادان و ایران ممالیکی محروسه سینده میللیتلر مسئله سی حلل اولمادان، ایستر ایران ممالیکی محروسه سینده آزادلیق و دئموکراسی مسئله لری، ایسترسه ده بشر حاقلاری مقوله سینه فارسلیق حاکیمیتی طرفیندن یئر وئریلمه یه جک گؤرونور. دئمک، میللیتلر مسئله سینی بیر خوخو کیمی دونیا ایجتماعیتینه گؤسترمگه چالیشان ذاتلار اؤزلری بیلمسه لرده فیکیر باخیمیندان فارس شوونیستلیگینی و ایستعمارینی ایران ممالیکی محروسه سینده حاکیم ساخلاماغا چالیشان ذات عالیلر سیرالاریندا یئر آلیرلار. محمد ارسیدن گئنه ده اوخویوروق:
" آقای رییس جمهوری، احتمالا کشور باستانی ایران، ایرانی که در زایش و گسترش مدنیت و معنویت سهمی به سزا داشته در دوزخ جنگی که دارید تهیه می‌بینید، از نقشه‌ی جغرافیا نیز حذف شود، اما "برما نماند بر شما نیز نخواهد ماند" آمریکایی که نقطه‌ی امید آزادی‌خواهان عالم است از معرکه‌ی ایران مظلوم جان سالمی به در نخواهد برد..."(1)
اوسته کی مقامدا محمد ارسی ده باستانگرای اولدوغونو اورتایا قویموشدور. بوگون کئچمیشده هانکی مملکتده تمدن و مدنیتین دوغولماسی دئییل، هانکی مملکتلرده اینسان حاقلاری و دئموکراسی نین سونقولانماسی (رعایت اولونماسی) سؤز قونوسودور. بو باخیمدان کئچمیش 81 ایلده "ایران ممالیکی محروسه سی" نین آدی "ایران" کلمه سی ایله دگیشدیریله رک بو ممالیکی محروسه موختلیف میللیتلرین زیندانی اولموشدور. بو ممالیکی محروسه ده اینسانلار اؤز دوغولدوقلاری یئر و مملکتلرینده فارسلاشماق سیاستینه تابع توتولاراق اؤز دیل و مدنیتلرینه، منلیک و کیملیکلرینه اؤزگه لشیرلر. بو میللیتلری اؤزگه لشمگه تابع توتاتلار فارسلاری داها ایرانلی، باشقا توتلوملاری ایسه کناردان گلمه و اؤگئی گؤسترمگه چالیشان ذات عالیلردیرلر. دئمک، کئچمیشده ایران ممالیکی محروسه سینده بؤیوک مدنیتلرین اولدوغونو ایددعا ائتمگه چالیشانلار بوگون ایران ممالیکی محروسه سینده موختلیف دیل و مدنیتلر و میللیتلرین اولدوغونو دانماقلا اؤز مدنیتسیز اولدوقلارینی اورتایا قویماغا چالیشیرلار. بئله لیکله سورقو سوآل بو: - ایران ممالیکی محروسه سینده میللیتلر مسئله سی حلل اولمادان محمد ارسی نین ایفاده ائتدیگی "بر ما نماند بر شما نیز نخواهد برد/ماند") مقوله سی هانکی اینسانلیق مقوله سینه اساسلانیر؟ محمد ارسیلر ایران ممالیکی محروسه سینده کی فارس اولمایان میللیتلرین کیملیک، منلیکلری، دیل و مدنیتلرینی هانکی ملزمه لر ایله دگیشیک توتموش مقامدا یئر آلیرلار؟ گئنه ده اوخویوروق:
".. خود شما خوب می‌دانید که "جرایمی" چون نقض حقوق بشر، حمایت از تروریزم بین‌الملل، ساخت سلاح‌های کشتارجمعی و در نهایتِ امر تهدید امنیت آمریکا و یا توطئه برای نابودی دولت اسراییل، که همه را به جمهوری اسلامی ایران نسبت می‌دهید، اساسا بهانه‌یی برای افروختن آتش جنگ است تا از کشوری که علیه حکومت وابسته به آمریکا انقلاب کرده، انتقام بگیرید، جمهوری اسلامی را با ضربات نظامی تضعیف و به اطاعت درآورید و اگر فرمان نبرند، ایران را درهم بکوبید تا برای دول نافرمان عالم درسی باشد، و، هژمونی بی‌چون و چرای آمریکا نیز در سطح جهانی خاصه در خاورمیانه‌ی نفتی، برقرار گردد." (1).
محمد رضا شاهین آناسی تاج الملوکون خاطیره لری ایله تانیش اولدوقدا محمد ارسی نین ایددعا ائتدیگی "انتقام" ایفاده سی اؤزونو دوغروتمور. کئچمیش یازیلاردا ایفاده اولوندوغو کیمی محمدرضاشاه اینگیلیس و آمریکالیلار ایستگی اساسیندا حاکیمیتی فارس جبهه میللی عوضوو اولان شاهپور بختیارا تسلیم ائتمیش. شاهپور بختیار دا حاکیمیتی گئنه فارس شوونیستلری و میللیتچیلرینه (حزب نهضت آزادی فارس، حزب جبهه میللی فارس، حزب میللت فارس) تسلیم ائده رک مهدی بازرگان واسیطه سی ایله ایران ممالیکی محروسه سینی ترک ائتمیشدیر. آنجاق دینچی کسیمین اله کئچیریلمیش حاکیمیته ایسلام دونو گئیدیرمه سی ("ملی گرایی خلاف اسلام است" امام خمینی) فارس شوونیستلری و میللیتچیلرینی حاکیمیتدن اوزاقلاداراق آمریکا منافعینی ایران ممالیکی محروسه سینده خطر ایله اوزلشدیرمیشدیر. دئمک، دئموکراسی و میللیتلر مسئله سی باخیمیندان ایران ممالیکی محروسه سینده اینقلاب دئییل، حاکیمیت دگیشمه سینه گئدیلمیشدیر. بو دگیشمه ده فارسلیق سیستیمی و فارس شوونیستلیگی قورونماق شرطی ایله شیعه لیگین آغیرلیق قازانماغا باشلاماسینا باخمایاراق فارسلیق ماراقلاری پهلویلر زامانی کیمی توخونولماز داوام ائتمیشدیر.
ایشیق سؤنمز 22.04.2006