نه اوچون قارشی طرفین فیکیرلرینه اساسلاناراق فیکیر یئریتمکدن عاجیز قالیریق؟

بیلیندیگی کیمی بیر دوشونجه و گؤروشون توپلومدا دگر قازانماسی اوچون او گؤروش صاحابلاری اؤز قاپیلارینی منطیق و دیالوگ اساسیندا آچیب اؤرتمه گه باشارمالی و ایجتماعیتده یاخشی و خوش قارشیلانمایان فیکیر یئریتمه لردن یایینماغا چالیشمالیدیرلار. بو باخیمدان بعضی فیکیرلری آذربایجان فعاللاری آراسیندا گؤزدن کئچیرمک فایدالی گؤرونور، اوخویوروق:

" آقای بابک آذری.. ..آقای آذری سایت ما هفته های گذشته در سراسر ایران فیلتر دار شده بود . تخریب شما و آقای نیازی کوچکتر از این حرفهاست . اگرقصد خبر رسانی داشتید چرا تا حال از خبرهای ما استفاده نکردید و ... ما سایت شما را یک سایت مردمی می دانیم و از زحمتهای شب و روز شما تشکر می کنیم ولی در این اواخر ؛ خواسته یا ناخواسته برای حمایت از طیف شمس تبریز بغضی از بیانیه ها و نوشته های فعالین حرکت ملی را در خصوص طیف شمس در سایت نمی گذارید بعنوان مثال " موضوع گیری گروه ائلقار" و " بیانیه جمعی از فعالین منطقه ولیعصر تبریز" و غیره  آقای نیازی شما و دوستان شما آقای حسن ابولولو و ... را همه می شناسند لازم نیست که در مورد شما آگاهی بدهیم ."(1)

اوسته گؤروندوگو کیمی بیر یاندان آزادتریبون سایتینی مردمی بیر سایت حئساب ائدیر و بو سایت مسئولوندان چکدیگی زحمتلری اوچون تشکور ائتمه سینه باخمایاراق شمس تبریز سایتی علیهینه یئریتدیکلری ایتتیهاملاری آزادتریبون سیته مسئولونا، اؤز سیته سینده او یازینی قویمادیقلاری اوچون یؤنتمیش اولور و اونو باشقا آذربایجان میللی فعاللاری (جمشید نیازی، حسن ارک و ساییره لر) ایله بیرگه ایتتیهام ماساسینین اطرافیندا اوتورتماغا چالیشیر.

دئمک، آزادتریبون سیته مسئولو خطاکار و خالق دوشمنی دیرسه، نه اوچون آزادتریبون سیته سی مردمی حئساب اولونور و  سیته مسئولونون چکدیگی زحمتلریندن قدردانلیق ائدیلیر؟ خطاکار دئییل دیرسه، هانکی اینسانی و میللی پرینسیپلری اساس گؤتوره رک بو سیته مسئولونا ایتتیهام وورماق اوچون بو ذات عالیلر اؤزلرینه ایجازه وئریرلر؟ گئنه ده اوخویوروق:

"...  ولی مطلبی را که شما چرا از سایت ما ناراحت هستید به اطلاع عموم می رسانیم. چند روز قبل شما مقاله را در سایت خود قرار داده وبه فعالین حرکت ملی حمله کرده بودید . متن نامه شما در صفحات یکی از سایتهای اداری دولتی  بود. و ما نیز این مسئله را در سایت خود آشکار کردیم . بعد از آن شما که متوجه شدید! بخش مربوط به مقالات و بخشهای دیگر سایت خود را از کار انداختید . و دوستانی که از تکنیکهای سایت اطلاع دارند می دانند که شما نباید این اشتباه را می کردید . این اشتباه تکنیکی بزرگی بود که دست شما را رو کرد."(1)

موألیفین اوسته کی حدسیات لاری کیمه یؤنلمیش اولدوغو بللی دئییل، بیلیندیگی کیمی کئچمیشده آزادتریبون سیته مسئولو بعضی مقاملارا دانیشیق واسیطه سی ایله آچیقلیق گتیرمه گه چالیشمیش. موألیفین خیطاب ائتدیگی سؤز باشقا ذات عالیلره دیرسه، یازینین ایچریگیندن بللی اولدوغو کیمی آغ ایله قارا آراسیندا بو قلم صاحابلاری نین فیکیرینجه فرق قویولمور. بئله لیکله ده خیال ایله واقعیتی چتین بیربیرلریندن آییرد ائده بیلمه لری اورتایا چیخمیش اولور. گئنه ده اوخویوروق:

".. مطالبی را نه برای شما و دوستان شما بلکه برای افکار عمومی باتوجه به نوشته های شما  به اطلاع هم وطنان عزیز می رسانیم."(1)

دئمک،  عنوانلانمیش بیر شخص اوچون بیر مطلب یئرلی گؤرونمه دیکده، نه اوچون اونو ایجتماعیت واسیطه سی ایله او شخصه عونوانلاماغا چالیشیلیر؟ بونلار ایجتماعیتی عوام حئساب ائدیرلرمی، یوخسا بو شخصیت کیچیتمکلر ایله اؤزلری بؤیویه جک سئوداسینا قاپیلمیش اولورلارمی؟

خالق ایچره وار دؤولت باخیمیندان بیر مثل وار، دئییلیر:

ایسته گیلن بیر قونشونون وارینی        قونشودا وار اولمازسا، سنده وار اولماز،

وارین اولسا، قوهوم یئیر قارداش یئیر شاد اولار           وار اولمازسا، دوقمالارین یاد اولار.

دئمک، بو بیر بیرلرینی چیکیتمکلر، بیربیرلری نین شخصیتلرینی تئرور ائتمه لر ایله نه الده ائدیلمه گه چالیشیلیر دئیه دوشونمه لی ییک. گؤروندوگو کیمی بهمن اینقلابیندان سونرا، خالق مسلمان تشکیلاتینا قارشین فارس اوپوزیسیون تشکیلاتلاری نین مخالیفت ائتمه لری، اونو ازمکده تهران حاکیمیتی ایله ایش بیرلیگی آپارمالاری، مجاهید و حزب توده طئیفی نین بیربیرلرینه قارشی دورماسی، فارس تشکیلاتلاری بیرر بیرر بیربیرلرینی مرکزی حاکیمیته شیکار ائتدیرمه لری بیر چوخلاری اوچون عیبرت درسی اولمامیشدیر. بو باخیمدان بو مسئله نین اوزرینده بیر آز آرتیق دایانماق میللی مسئله میزه اویقون گؤرونور. بیلیندیگی کیمی فارس سولچو مئابلاری و مجاهید تشکیلاتی فارس پان ایرانیست تشکیلاتلارینی(حزب نژادپرست جبهه میللی، نهضت آزادی، حزب میللت، حزب پان ایرانیست و ساییره نی) لیبرال و آمریکا یانچیسی دئیه ایجتماعیت ایچره فیکیر باخیمیندان تئرور ائتمه گه چالیشیردیلار. خالق مسلمان مسئله سینه گلدیکده بو تشکیلاتلار هامیسی خالق مسلمان حرکاتینی آمریکا یانچیسی دئیه آذربایجان ایجتماعیتیندن تجرید ائتمه گه و خالق گؤزوندن سالماغا چالیشدیلار. سونرا تهران حاکیمیتی ایله بیرلیکده بو حرکتی ازمه گه باشلادیلار. زامان گئدیشی ایله تهران حاکیمیتی حاکیمیت هوسکاری اولان فارس موخالیف قوروپلاری تأثیرسیز ائتمه گه، بئله لیکله حزب جمهوری ایسلامی و مجاهیدین اینقلاب ایسلامی پارتیلاری دویقو سؤمورمه گه، مئیدان سولاماغا و حاکیمیت ائتمه گه داوام ائتدیلر. ایران عراق ساواشی دالیندا اؤز باشاریقسیزلیقلارینی گیزله دن بو پارتیلار ایران عراق ساواشی سونا چاتدیقدان سونرا خالق ایسیتکلرینه جاواب وئرمه دن عاجیز قالاراق هاشیمی رفسنجانی زامانیندان باشلامیش و کئچمیش 8 ایل سید محمد خاتمی یزدی زامانی شاهید اولدوغوموز کیمی، فارس شوونیسمی ایران ممالیکی محروسه سی جامعه سی نی اؤز ایسته گینه دوغرو فعاللاشدیرماق اوچون ایصلاحاتچی دونو گئیینه رک بیر داها رجز اوخوماغا باشلادیلار. بو مسئله نی روس شوونیسمینه اساسلانان س.س.ر. کمونیست پارتیسی کئچمیش سؤویئتلر بیرلیگینده ده پروستئریکا و قیلانوس آدینا حیاتا کئچیرمه گه چالیشدی. آنجاق اورادا جومهوریتلر اساسیندا آنا یاسا، میللی و مدنی یاریم بند تشکیلاتلار اولدوغو اوچون مرکزیتین گئری اوتورماسی بو جومهوریتلره ایلری گئتمه اولاناغی (ایمکانی) ساغلامیش اولدو. ایران ممالیکی محروسه سینده دیل، مدنیت و رسمی محللی اورگانلار فارسچیلیق اساسیندا قورولدوغو اوچون مرکزیتین بحرانلا اوز اوزه دورماسینا باخمایاراق فیکیر باخیمیندان بو ممالیکی محروسه ده فارس ایستعماری حاکیم اولدوغو اوچون فارس اولمایان میللتلر آراسیندا میللی دیرچلیش کئچمیش سؤویئتلر بیرلیگینده کی کیمی اؤزونو گؤستره بیلمیر. بئله لیکله تهران حاکیمیتی نین محللی و ایططیلاعاتی اورگانلاری  محللی گوجلری موختلیف واسیطه لر ایله قارشی قارشییا قویاراق زامان قازانماغا چالیشیرلار. خالق ایسه حاکیمیتین باشاریسیز اولدوغونو بیلمه سینه باخمایاراق ایکی سره بیر دره محللی میللی گوجلر و حاکیمیت گوجلری آراسیندا آسیلی وضعیتده بلیرسیز بیر گله جک اوچون گون سایماغا داوام ائدیر.

بو اوسته کی مسئله تهراندا حاکیمیت اوغروندا فارس تشکیلاتلارینین بیربیرلرینه بوینوز توتمالاری و باشقا فیکیرده اولانلارا قارنیزی سؤکه رم دئمه لری و فارس اولمایان میلت اوولادلارینا فارس قوروملارینین یاناشماسی ایدی. آذربایجان میللی مسئله سینه گلدیکده طرفی کنده گیرمه گه یول وئرن یوخ، کندخدانین ائوی نین آدرئسینی سوروشماغا قالخدیغی ائشیدیلیر. دئمک، ایلک اؤنجه آذربایجان میللی مسئله سی اطرافیندا فورمالاشان فیکیر صاحابلاری فارس شوونیسمینی ائودن ائیشیگه سالمالی، سونرا فارس ایستعماری ایله تربیه اولوندوقلاری اوچون فارس تشکیلاتلاری ائتدیکلری ایشتیباهلاری میللی و ایجتماعی منافعلرینه اویقون گؤرسه لر تیکرار ائتمه گه باشمالیدیرلار. آذربایجان میللی مسئله سینده بیربیرلرینی ایتتیهام ائتمک یئر برک اولدوقدا اوزدن ایراق اؤکوزون باشقا اؤکوزه قارشین او همکارلیق ائتمیر ایتتیهام نامه سینی خاطیرلادیر. آذربایجان میللی مسئله سی تمامیتچی فارس حاکیمیتی الینده کیلیدلندیگی اوچون چیخیش یولونو کیمیسی ایلیملی (ملاییم) اولمادا، کیمسی وور ییخ مسئله یه سون قوی دئمه ده بیر فیکیر کیمی قبول ائتمیش گؤرونور. عملده ایسه فارس شوونیستلیگیندن زهرلنمیش نئهیلیستلیگه اوغرامیش آذربایجانلیلارین بیر چوخو میللی باخیمدان نه کیم اولدوقلارینی بیلیر و نه ده بیلمک ایسته ییرلر. بو آشامادا خالقی موعاریفلندیرمک و اؤز منلیک و کیملیگینه تانیش ائتمک آذربایجان میللی فعاللارینین بیرینجی بورجو ساییلمالیدیر. بونلارا باخمایاراق میللی منلیک و کیملیک بیلینجینه صاحیب اولموشوق دئمه گه چالیشان اینسانلارین ناشیلیقلارینین تانیغی (شاهیدی) اولدوقدا آذربایجان میللی حرکتی نین گله جه گینه داییر ناراحاتلیق تؤره دیجی و ناشییلیق داورانیشلاری (عمل و رفتارلاری) اینسان اوغلونا بیر لحظه ده ایستر اولسون راحات نفس آلماغا اولاناق تانیمیر. بو اینسانلارین میللی مسئله یه ایناندیقلارینا شک یئری یوخدور. آنجاق بو اینسانلارین عمللری آنالیز ائدیلدیکده آذربایجان میللی مسئله سی بونلارین داورانیشلارینا اساساً اولدوقجا ساده و بیر فوتبال تاخیمی (تیمی) کیمی یوروملانمیش (تعبیر و تفسیر ائدیلمیش) اولور. کیمسه آیاغینی توپا گئج آتدی خائن اولور. کیمسه توپا بوشونا آیاق یئتیرمه دیکده خاریجی تاخیم و قارشی طرفه ساتیلمیش عامیل کیمی قلمه آلینیر. اویون تاخیمی (تیمی) ایچریسینده شاریسماتیک  گؤرونوشو اولمایان بیر اویونچویا کیمسه رغبت بسله دیکده شاریسماتیک اویونچونو دیققتدن یاییندیریر دئیه ایتتیهام ایله داغمالانیر و خائین تانیتیلماغا چالیشیلیر. بونلارا باخمایاراق ماهیت اعتیباری ایله بو تاخیم (اوخو: آذربایجان میللی حرکتی) بیر مملکتی نماینده لیک ائدیر، بو تاخیمین اوغورو او ممکلت اوچون باشی اوجالیق، یئنیلمه سی تاخیم عووضلری اوچون باشی آشاغیلیق ساییلمالیدیر. بونلارا باخمایاراق آذربایجان میللی مسئله سینده  نه اوچون آذربایجان میللی فعاللاری میللی حرکت یانچیلارینی ساتقین، کمونیست، نفوذی، و ساییره آدلاندیریر دئدیکده آذربایجان میللی حؤکومتی نین 60 ایللیگینی عزیزله ییریک دئیه آذربایجان ایجتماعیتینه باشقا فیکیر صاحابلاری علیهینه ایتتیهامنامه لر بیلدیری دئیه تقدیم اولونور. بو ایتتیهام نامه نین بعضی پاساژلارینا گؤز گزدیرمه گی مقصده اویقون حئساب ائدیریک، اوخویوروق:

"  برآءه من الله و رسوله الي الذين عاهدتم من المشركين ، فسيعوا في الارض اربعه اشهرو اعلموا انكم غير معجزي الله و ان الله فخري الكافرين.« سوره مباركه توبه – آيات 1 و 2 ».

... ميراث داران خلف آن بزرگان امروز آماج حملات دلباخته گان مسكو و لنينگراد شده اند. آناني كه به نام ماترياليسم و كمونيسم تيشه بر ريشه دين ، هويت و مليت ما مي زنند ، امروز با شمشير هاي زهر آلود خود چنان ضرباتي بر پيكرة خسته و رنجور حركت ملي آذربايجان وارد مي سازند كه هشتاد سال سيستم جبارانة شوونيزم فارس نتوانست بمانند آنها چنين حملات ناجوانمردانه ايي را بر عليه مبارزين ما اعمال كند ."(2).

اوسته گؤروندوگو کیمی بو ایتتیهاملار هانکی یازی یا اساسلاناراق اورتایا آتیلدیقلاری معلوم دئییل، تنقید ماهیتی ده داشیمیرلار. آنجاق سیاست باخیمیندان بو ایتتیهاملاری دگرلندیرمه گه چالیشدیقدا بونلار ایکی اساسدا اؤز فیکیر موخالیفلرینی مئیداندان چیخارماق ایسته ییرلر.:

1- آذربایجان ایجتماعیتی اؤز دین و اینانجینا ثابیت قدم اولدوغو اوچون خیالی بیر دوشمنی خالقا آدرسلندیره رک آذربایجان ایجتماعینده اؤز گوروهلاری اوچون طرفدار قازانماغا چالیشیرلار دئیه فیکیر یئریتمک اولار. بونلار باشقا خالق اوولادلارینی دوشمن تانیمازسالار، بلکه ده بو مسئله او قدر اینسان بدنینده توکلرینی اورپره جک و قورخویا سالاجاق مسئله اولماسین. آنجاق آذربایجان ایجتماعیتینده دوشمنلیگه یول آچماق و قارداش قیرقینینا توخوم سپمه گه چالیشماق و زمینه یاراتماق فارس شوونیسمینین بیرینجی هدفلریندن ساییلمالیدیر. آذربایجان میللی حؤکومتی نین یئنیلمه (شیکست یئمه) چاغی اردبیل شهریندن موللا میرعلی اکبر آقاغین فتواسی ایله الله آتلیلاری آذربایجان میللی حوکومت فداییلرینین ناموسلارینا تجاووز ائتمه لری بیر چوخ اینسانلارین بوگون ده خاطیراتیندان سیلینمز اولموشدور. بوگون آذربایجان میللی حوکومتی نین 60 اینجی ایل دؤنومونده بعضی شخصلر علیهینه کئچمیش اینانجلاری اوچون- مسکو و لنینگراد شهرلری نین ایدئولوژی باخیمدان اهمیته مالیک اولمادیقلارینی نظره آلاراق - اوسته کی ایفاده لری آذربایجان میللی حرکت سیرالارینا قاتیلمیش اینسانلار علیهینه سیرالاماق آذربایجان میللی حرکتی اوچون هئچ ده خوش گله جک گونلردن خبرلر وئرمیر. بو مسئله هر بیر آذربایجان میللی فعالینی دوشوندورور و دوشوندورمه لیدیر ده.

2- تهرانداکی حاکیم نیظام و اینتیظاما بیز مسلمان، قارشی طرف(!!!) الله سیز و سیزین ده ایدئولوژی دوشمنی نیزدیر دئیه، بو فرضی دوشمنی آرادان گؤتورمک اوچون بیزیم الیمیزی آچیق قویونوز دئمک پیامینی داشیماقدادیر. بو باخیمدان ایران ممالیکی محروسه سینده فارس ایستعماری نین حاکیم اولدوغونو و آذربایجان میللی مسئله سینده فارس شوونیسمی نین هئچ بیر دگیشیکلیگه گئتمه یه جه گینی نظره آلاراق بهمن اینقلابیندان سونرا آذربایجان گوروپلاشمالارینی فرضی حالدا فارس اوپوزیسیون تشکیلاتلاری یئرینه قویاراق میللی حرکتین گله جه گینی بیر لحظه گؤز اؤنونده تجسم ائتمک بو ایتتیهام نامه نین هانکی مجرایا چاتاجاغینی باشا دوشمک او قدر ده چتین اولمازدی. گؤروندوگو کیمی بو صحنه لری نظره آلاراق فارس ایستعماری آلتیندا اؤزلرینی آذربایجان میللی حرکت طرفدارلاری دئیه ایجتماعیته تقدیم ائتمه گه چالیشانلار کئچمیش 27 ایلین زنگین تجروبه سیندن عیبرت درسی آلمامیش مقامدا یئرله شیرلر. دئمک، ایچریده آذربایجان میللی مسئله سی بو گونکو مجرادا داوام ائدرسه، خالق مسلمان حرکاتینداکی کیمی  گئنه ده آذربایجان اوولادلارینین اؤز قیلینجلاری اؤز باشلارینی کسه جک و فارس شوونیسمینه آذربایجان میللی حرکتینی ازمک اوچون ائحتیاج گؤرونمه یه جکدیر. گئنه ده اوخویوروق:

" ..حسن ارك آن كمونيسم بي شرف كه زماني باتز « بي حجابي دختران تنها عامل بقاء ماست » همگان را به بي غيرتي و بي ناموسي دعوت مي كرد و زماني ديگر پيمان پاكمهر را بهترين  خبرنگار حركت ملي معرفي مي نمود و در اين اواخر نيز با همدستي رحيم مكائيلي پور     ( مزدور اطلاعات و فردي عياش و بي بندوبار) به فريب دختران كوچه و خيابان اقدام مي كند ، در يك توطئه كثيف و نافرجام به همراهي ساير همدستان خود مي خواهند كه حركت ملي آذربايجان را دو دستي تقديم دشمنان اين ملت کنند ."(2)

اوسته گؤروندوگو کیمی حسن ارک جنابلارینین کئچمیشده بلکه ده تشکیلاتی منسوبیتیندن یولا چیخاراق سیاسی پرئنسیب و ائتیک نورمالارینا یاراشمایان نالاییق ایفاده لری اونون علیهینه بیر سیاسی جرم دئیه ایجتماعیته تحویل وئرمک ایسته ییرلر. بونلارا باخمایاراق قادینین باش آچماسی ویا اؤرتمه سی جامعه ده حاکیم اولان وضعیت، تعلیم و تربیت  و اونون هانکی اینانج و مدنیتدن آسیلی اولدوغو بیر مسئله دیر. بو مسئله نی جینایی لشدیره رک فیکیر موخالیفلرینه پرونده دوزتمک و اونون اؤلومونه دولاییلی اولاراق بویوروق وئرمک ساده شخصلرین ایشی دئییل، بو عمل انگیزاسیون و قرون وسطا محکمه لرینی اینسان اوولادینا خاطیرلاتمیش اولور. بونلارین یانی سیرا بیلیندیگی کیمی ایران ایسلام جومهوریتینده حیجابسیزلیق و قیز آلداتماق مسئله لری منکرات ایداره سینه مربوط اولمالی بیر مسئله دیرلر، بئله بیر ایتتهاملاری سیاسی جرم دئیه حاکیمیت طرفیندن سوغانین نه باشی و نه دیبی کیمی رسمیته تانینمایان آذربایجان گوروپلاشمالاری فیکیر موخالیفلرینین علیهینه پرونده دوزتمک ایله مشغول اولماقلاری اولدوقجا گولونج بیر ایزله نیم ایجتماعیتده سرگیله میش اولور و عوامفریبلیکدن باشقا هئچ نه ماهیت داشییا بیلمیر.

پیمان پاکمهر جنابلارینا گلدیکده بیلیندیگی کیمی او هر زامان آذربایجان میللی مسئله سینه موخالیف و فارس یانچیسی اولموش، اونو فارس جبهه میللیچی سی و نهضت آزادی یانچیسی دئییل، آذربایجان میللی مسئله سی ایله رابیطه ده گؤردورمک ایسته مک اؤزو ده اینصافدان اوزاق اولاردی. دئمک، حسن ارک جنابلاری بو مسئله یه داییر بیر یانلیش یوروم و تعبیر تفسیر ائتمیشسه ده اونو قلم حؤرمتینی نظره آلاراق تنقید ائتمک لازیمدیر. دئمک، قلم حؤرمتینه یاراشماز ایفاده لری اؤز دیل و مدنیتیندن محروم اولان خالق اوولادلاری ایجتیماعیته تحویل وئرمه گه چالیشسالار، اؤز حقانیتلیکلرینه ظولم ائتمیش اولارلار دئیه دوشونمه لی ییک. بونلارین یانی سیرا آذربایجان میللی حرکتی گله جکده آذربایجان مسئله سینین حقانیتینی قبول ائتمیش هر بیر آذربایجانلی اوچون آچیق توتولمالیدیر. دونیا گؤروشلری و ایدئولوژیلر آلینما (اکتیسابی) اولدوقلاری اوچون کیمسه نی دونیا گؤروشوندن آسیلی اولاراق آذربایجان میللی منسوبیتیندن آییرماق اولماز.

1                    http://www.shamsnews.com/javab-shams.htm

2                    http://www.shamsnews.com/fanta.htm

ایشیق سؤنمز 04.09.2005

توپلوم