کؤلن شهرینده غلامرضا امانی نی آغیرلاماق اوزره چیخیش
خالقی نین ایستکلری و خوشبختلیگی آرزوسو ایله جانلارینی اله آلانلار اوزره دانیشماق منیم اوچون اولدوقجا چتین بیر مسئله دیر. بوندان یانا بیر خالق بایاتیسی ایله چیخیشیما باشلاماق ایستردیم.
ائلیمین یئکه دردی ---- چکیلمیش یوکه دردی
دوه چکمز نر چکمز ----- جان گرک چکه دردی!
اینسان بو قوشمانی بهروز دهقاندان اوخورکن آذربایجان اوغول و قیزلاری دوشونجه آیریجیندا هاچالاناراق سراسری دئیه فارس تشکیلاتلارینا یئم اولمالاری خاطیرلانمیش اولار. بو دوغرولتودا بختیار وهابزاده آذربایجان میللی مفکوره سینی داشییان اینسانلارین دیلی ایله دئمیش:
"یوللار آیریجیندا هاچالانمیشام ---- دره دن قورخموشام دوزو دانمیشام
ایندی داغلا دوزون آراسیندایام ---- باکی ایله تبریزین آراسیندایام".
گونئی آذربایجان میللی حکومتی غرب و شرق دؤلتلری آراسیندا باش وئرمیش سویوق ساواش سونوجوندا یئنیلگه یه اوغرایاراق آذربایجان آیدینلاری نین بیر چوخو سورگون ائدیلدیکدن سونرا گونئی آذربایجان بیر داها فارس ایستعمارچیلیق سیستیمینه تابع توتولدو. بئله لیکله آذربایجان مشروطه حرکاتیندان درس آلمیش آذربایجان آیدینلاری و حکومت باشچیلاری "اؤلدو وار، دؤندو یوخ" دئدیکلرینه باخمایاراق میللی حکومت یئنیلگه یه اوغرادیقدان و سید جعفر پیشه وری معمالی بیچیمده قوزئی آذربایجاندا یاپیق و ساختا اولای (تصادیف) واسیطه سی ایله دونیاسینی دگیشدیکدن سونرا فرقه نین باشچیلاری چیخیش یولونو بیر داها فیکیر باخیمیندان فارس سراسری تشکیلاتی دئیه "حزب توده ایران" آدلی فارس تشکیلاتینا تسلیم اولماقدا و آذربایجان دئموکرات فرقه سینی بو تشکیلاتین آذربایجان قولو (شاخه آذربایجان) دئیه تانیتماغا چالیشمیشلار. میللی حکومتین اساس سیاسی تشکیلاتی ساییلان "آذربایجان دئموکرات فرقه سی" نین باشچیلاری نین سورگونده ایستر دوشونجه، ایسترسه ده چئوره و محیطده کی سیاست آچیسیندان تضییق آلتیندا قالمالاری و "فارس توده تشکیلاتی (حزب توده ایران)" قارشیسیندا دیزه چؤکمه لری گونئی آذربایجان توپلوموندا داها دا چاشباشلیغا و آواراچیلیغا یول آچمیش. آذربایجان دئموکرات فرقه سی یئنیلدیکدن (شکست یئدیکدن) سونرا میللی حکومت علیهینه فارس تمامیتچیلری و فارس مدنیت راسیستلری طرفیندن یئریدیلمیش یانلیش تبلیغاتلاردان یولا چیخاراق گونئی آذربایجان توپلوموندا میللی مسئله اوزره ایلگی و ماراق گؤزه چارپار اولمامیش. بونلارا باخمایاراق آذربایجان میللی حکومتی زامانی اوشاقلیق گونلرینی کئچیرن بعضی گنجلر او جمله دن بهروز دهقانی، علیرضا نابدل و صمد بهرنگیلر زامان گئدیشی ایله اؤز دیل و مدنیتلرینه ده اؤزنمگی (ایلگی گؤسترمگی) آذربایجان توپلوموندان گیزلتمه میش و اونون یاییلماسینا دا ایلگی گؤسترمیشلر. آدی کئچن شخصلر اؤز دیل و مدنیتلرینه اؤزنمه لرینه باخمایاراق اونلار فارس حاکیمیت سیستیمی طرفیندن اویقولانمیش فارس تمامیتچیلیک سیاستی نین نه اولدوغونو آییرد ائتمه یه رک آذربایجان علیهینه اولموش میللی ظولمو فارس ایستعمارچیلیق سیاستی دئییل، آرتیقلاما (مضاعف) ظولوم کیمی نظره آلمیشلار. آذربایجان میللی مسئله سی یانلیش اورتایا قویولدوغو اوچون آلیناجاق جاواب دا دوغرو و دوزگون اولمامیش. دئمک، 20- اینجی عصرین باشلانقیجی ایله سؤمورگه و ایستعمار بیچیمی (ماهیت) قازانمیش فارس دیل و مدنیتی نی ایران ممالیکی محروسه سینده اساس گؤتورموش هر بیر تشکیلات او تشکیلاتدا اولان اینسانلار میللی کیملیک و منسوبیتلریندن آسیلی اولمایاراق فارس دیل و مدنیتینی اساس گؤتوردوگو و فارس دیل و مدنیتینی رسمی دئیه باشقا ائتنوسلارا اونو تحمیل ائتمک ایسته دیکلری اوچون اونلار دا تشکیلاتدا فارس سؤمورگه و ایستعمار عامیلی ساییلارلار. بو باخیمدان بهروز دهقان، علیرضا نابدل، صمد بهرنگیلر و اونلارین بوگونکو موریدلری سولچو دئیه خیالاتا (Ilusion) قاپیلمیش ساییلارلار.
دئمک، بهروز دهقانی، علیرضا نابدل و صمد بهرنگی لرین میللی مسئله یه یانلیش بیچیم (طرز) ایله یاناشمالاری اونلاری یالنیش یولا گؤتوره رک میللی کیملیک و منلیک مقوله سیندن اوزاقلاداراق یالنیز سولچولوق (نتیچه اعتیباری ایله فارس سولچولوغو) گؤروشونو اونلارا آشیلامیش (تزریق ائتمیش). صمد بهرنگی نین امیر پرویز پویان ایله آرا سیرا گؤروشلری، بهروز دهقان و علیرضا نابدل، مناف فلکی و ساییره لرین ده "سازمان چریکهای فدایی خلق ایران" آدلی فارس تشکیلاتینا ایلگی گؤسترمه لری بو تشکیلاتین تبریزده نیظامی قولونون یارانماسینا بئله لیله آذربایجان دیل و مدنیتی اورزه دوشونن گنج کادرولارین بیر چوخو "چیریکلیک" سئوداسینا قاپیلاراق فارس شاهلیق توتساقلیغیندا اعدام، اؤلوم و ایشکنجه لره معروض قالمیش، بیر سیراسی ایسه بو گونکو فارس تهران حاکیمیتی طرفیندن آسیلمیش، ایشکنجه لر گؤرموش و بعضیلری ایسه آزاد اولمالارینا باخمایاراق اؤزلرینی بو گیجلدیجی (سر سم) دورومدان خلاص ائده بیلمه میشلر. آذربایجانین شاهلیق زامانیندا بیلیک یوردلاریندا اوخوموش مذهبی آیدینلاری دا بو سول مئییللی اولان اینسانلاردان هئچ ده فرقلنمه میش. اونلار دا فارس جبهه میللی، نهضت آزادی، حزب پان ایرانیست تشکیلاتلارینا وسیله اولاراق فارس ایستعماری نین آذربایجان تورپاقلاریندا حؤکوم سورمه سینه و یئنی فارس تشکیلاتلاری نین، او جومله دن مجاهدین خلق، جنبش مسلمانان مبازر، حزب جمهوری اسلامی و ساییره دئیه اؤز یاشاملارینی فارسلیق سیستیمینه باغیشلاراق آذربایجان اجتماعتینی یانلیش یوللارا سوروکله میشلر. پهلویلر زامانی سایی میلیونلاری آشان گونئی آذربایجانلیدان یالنیز حبیب ساحر، بولود قاراچورلو، علی تبریزی، محمد علی قوسی (فرزانه) لر و بیر سیرا منفرد شاعیر فارسلیق و فارس سؤمورگه چیلیک عافتیندن اؤزلرینی قوریا بیلمیشلر. بئله لیکله 1357-اینجی ایل شاهلیق علیهینه تبریزدن باشلانمیش حرکت آذربایجان مفکوره لی اولمادیغی -، باشقا دئییشله دئمک اولارسا، ایران ممالیکی محروسه سینده کی فارس اولمایان میللیتلرین میللی منافع لرینه اویقون اساس گؤتورولمه دیگی- اوچون بو حرکت محمدرضا شاهین ایران ممالیکی محروسه سیندن قاویلماسینا یول آچدیغینا باخمایاراق آذربایجان خالقی اوچون لازیملی نتیجه وئره بیلمه میش. اینقلابدان سونرا آرمانچیل اولاراق تبریز و تهراندا بیر نئچه درگی بعضی شخصلر طرفیندن یاییلماسینا باخمایاراق بو درگیلر فارس حاکیمیت سیستیمی نین ایسلام آدی آلتیندا باسقیسینا معروض قالکیشلار. بو درگیلردن یالنیز دکتر جواد هیئت و پروفسور حمید نطقی باشچیلیغی ایله ایشه باشلامیش "وارلیق" درگیسی بعضی دوراقلامالارا باخمایاراق گونوموزه دک یاشاییر.
روسیه ایستعمارچیلیق بیرلیگی نین 1991- اینجی ایل داغیلماسی و یئنی دؤلتلرین شرق بلوکوندا اورتایا چیخماسی دونیادا میللی مسئله یه تکان وئره رک گونئی آذربایجاندا یاتمیش میللی بیلینج و شوعورون آییلماسینا و آذربایجان میللی مسئله سینی ایلک اولاراق بیلیک یوردلارینا و زامان گئدیشی ایله خالق آراسینا یول آچماسینا دا شانس یاراتمیش.
بوگون یاس و آغیرلاماسینا قاتیلدیغیمیز غلامرضا امانی 1991-اینجی ایلدن ائتنیک گونئی آذربایجاندا باشلامیش میللی و مدنی حرکتین سیرالارینا قوشولان و آذربایجان یولوندا صادیق اینسانلاریمیزدان بیری اولموش. غلامرضا امانی بگین هانکی زاماندان آذربایجان میللی حرکتینه قاتیلدیغی بیزلره بللی اولمادیغینا باخمایاراق او 2000- اینجی ایل فارس حاکیمیت سیستیمی مأمورلاری طرفیندن آذربایجان میللی فعالی اولدوغو اوچون توتولاراق دؤرد ایل و بیر هفته فارسلیق توتساغیندا قالدیقدان و ایشکنجه لره معروض قالدیقدان سونرا ائتنیک آذربایجان تورپاقلاریندا گؤز آلتیندا اؤز یاشام و فعالیتینی سوردومگه چالیشمیش. غلامرضا امانی 2006- اینجی ایل خرداد قیامیندا دا توتولاراق ایلک اولاراق تبریز و سونرا تهرانین ائوین توتساق ائولرینه آپاریلمیش. خالقی نین خوشبختیلیگی اوچون بو آغری و اذیتلری گؤز اؤنونه آلان شخصیتلری آذربایجان خالقی نین اوغول و قیزلاری تاریخ بویو اونوتمایاراق اونلاری اورکلرینده یاشاداجاق و اونلاری زامان زامان آغیرلایاجاقدیر.
امانیلرین آذربایجان میللی حرکتی اوغروندا وئردیکلری مجادیله یوللاری کاروانلی و آذربایجان خالقی نین باشی ساغ اولسون.
ایشیق سؤنمز، 02.11.2008