اوستاد محمدعلی فرزانه نین دفن ائتمه عرفه سینده تبریزده نه لر اولدو مسئله سی آذربایجان آیدینلارینی اولدوقجا دوشوندورمه لیدیر
بیلیندیگی کیمی ایران ممالیکی محروسه سی آمریکا بیرلشمیش شتاتلاری طرفیندن او بؤلگه یه نظره آلدیغی پلانلارا اساساً دگیشیمه اوغرایاجاق گؤرونور. بو آرادا آذربایجان میللی فعاللاری کئچمیش یئنیلمه لردن عیبرت درسی آلمالی، خالقی دوشمن و شوونیسم خیدمتینده دئییل، آییق ساییق، اؤز میللی منلیک و کیملیکلرینه اؤنم وئرمه لری اوچون سفربر ائتمه لیدیرلر دئسک، میللی منلیک و کیملیک اوغروندا دوزگون حرکت ائتمه نین نه حدده اؤنملی اولدوغونو وورقولامیش اولاریق. بو آرادا شمس تبریز سیته سی واسیطه سی ایله تبریزده کی میللی فعاللار آراسیندا آنلاشمازلیقلار وار دئیه ایجتماعیته یالان دوغرو بیلگی و معلوماتلار اؤتورولور. محمدعلی فرزانه بگین تبریزده دفن اولماسی عرفه سینده شمس تبریز سیته سینده بعضی یایینلانمیش یازی و مقاله لر اولدوقدا دوشوندوروجودور. بو مقاله لردن کیوان نعیمی ایمضاسی ایله شمس تبریز سیته سینه گؤندریلمیش یازیدا چوخلو سیرلی مقاملار وار. بو و بونا بنزر مقاملارا آچیقلیق گتیرمک و آذربایجان میللی فعاللاری و میللتی آراسیندا میللی مسئله اوزره بدبینلیک یاراتمانین قارشیسینی آلماق و بو مسئله لرین بویوتلاری نین هارادا اولماسینی اؤیرنمک و ایچریده آغیر شراییطین حؤکوم سوردوگونو نظره آلاراق آذربایجان ایجتماعیتینه خاریجده کی تانینمیش کاناللار واسیطه سی ایله بیلگی وئریلمه سی گرکلی حئساب ائدیلیر. بو مسئله نی حیاتا کئچیرمک اوچون آذربایجان میللی تشکیلاتلاری اورتاق تفتیش کومیته سی یاراتمالی و ایچریده تانیدیقلاری و ایطمینان ائتدیکلری شخصلر واسیطه سی ایله فارس سازمان امنیت مأمورلاری و اونلارین عامیللری طرفیندن خالقی میللی مسئله اوزره بدبین ائتمک ایسته گنلرین کثیف نیتلری آچیقلیغا قاویشدیریلمالیدیر.
ایشیق سؤنمز 10.02.2006