فارس استعمار حاکیمیتی نین سئچیم اویونلاری و دئموکراسی مسئله سی!

کئچمیش یازیدا تهرانداکی حاکیمیت اوغروندا اولان چابالاری سئچیم دئییل، اویون اولدوقلارینی و بو دوروم سوررکن ایران ممالیکی محروسه سینده کی توپلوملارین فارس تمامیتچی سیستیمی نین قورولوشونا هئچ بیر اتکی و تأثیری اولمایاجاغینی ایددعا ائتمیش ایدیک (1). بونلارا باخمایاراق بیر چوخ ساده گؤروشلو  انسان و تشکیلاتلار فارس استعمار سیستیمینی بیر سئچیم ایله یوموشاتماق، یئری گلرکن دئموکراتلاشدیرماق و بوگونکو ایران ممالیکی محروسه سینه میللیتلر اوچون حقوق برابرلیگی اولوشدورماق اولار دئیه بو اویوندا یاریشماغا قاتیلاراق فارس استعمار سیستیمینه برائت قازاندیرمیش مقامدا یئر آلمیشلار. بو ایددعانی اؤنه سوررکن خالقی اؤز گله جگینه اؤزگه یاشاتماق دئییل، پیسی یاخشیدان تانیییب، آییرد ائتمک نظرده توتولار. دئمک، سئچیم دئیه یورودولن اویونلار عرفه سینده یارانمیش اورتامدان فایدالاناراق خالقی اؤز میللی منافعینه آییق سالماق و آذربایجان میللی مسئله سینی توپلومون درینلیکلرینه یوروتمک آذربایجان میللی فعاللاری نین بیرینجی بورجو اولموش و اولمالیدیر دا. بونلارا باخمایاراق سئچیم عرفه سی یارانمیش آچیق اورتام و فضا سونا اردیکدن سونرا سئچیم آدلاندیردیقلاری اویونلارینی تحریم ائتمکله فارس استعمار حاکیمیتینه یوخ دئمک و فارس استعمار حاکیمیتینه مسئله نین بو آشامادا اؤنه یورویه بیلمیه جگینی و قول بئشلری ایله بیرلیکده سؤمورگه چیلیک سیاستینه سون قویمانین زامانی گلمیش دئیه ایزلنیم یاراتماق آذربایجان میللی فعاللاری و تشکیلاتلاری نین  ایکینجی گؤرئو و وظیفه لری ساییلمالیدیر.

دئموکراسی مسئله سینه گلدیکده قول اولموش توپلوملارا هر شئیدن اؤنجه آزادلیق لازیمدیز. آزادلیق سؤز قونوسو اولارکن بیر چوخلاری خیال ائتدیکلری فارس محورلی دیل و مدنیتین سؤمورگه سی آلتیندا یاراناجاق ایصطلاحاً فارس اساسلی آزاد اورتام و فضا دئییل، هر توپلوم و میللت اؤز دیل و مدنیتی نی اساس گؤتوره رک اؤزونو آزاد گؤرمه لی و بو آزادلیق اوغروندا دوشونمه لی سونرا او توپلومون قاتلاریندان اولوشاجاق تشکلاتلاردان دئموکراتیک بیر حاکیمیت یاراتماغا جان آتمالیدیر. مسئله بونون ترسینه اولارسا، یالانچی و ایچی بوش سؤزلر ایله اؤرنک اولاراق "بخاطر به خطر افتادن منافع میللی ایران، تمامیت ارضی ایران" گؤز بویامالاری ایله خالق کیتله سی میداندان چیخاردیلاراق و فارس اولمان میللی و مدنی تشکیلاتلارین یاشاییشلارینا و اونلارین ایشلولرینه (عملردلرینه) سون قویماق فارس تمامیتچی مفکوره سی نین سورکلی (همیشه لیک) استعمارچی سیاستیدیر دئیه بو مسئله نی گؤزدن قاچیرمامالی ییق.

1                   فارس دیل و مدنیتینه اساسلانمیش حاکیمیتین ایران ممالیکی محروسه سینده کی جمهور باشقانی سئچیمی اویونلاری: http://www.azadtribun.net/x19510.htm

ایشیق سؤنمز 13.06.2009