تهرانداکی فارس حاکیمیتی اوغروندا قارشی دورمانین گئریله مه سی و اوندان چیخاریلاجاق سونوج

کئچمیش یازیلاردا تهرانداکی 22 خورداد 1388 اینجی ایل جمهور باشقانی سئچیمی اوزره گؤروشلریمیزی اورتایا قویموشدوق (1، 1.1). او زامانلار بیر سیرا خاریجده کی آذربایجان مئییللی شخص و تشکیلاتلار بو مسئله نین ایران ممالیکی محروسه سی نین دئموکراتیکلشمه سی اوغروندا بیر ساواش اولدوغونو و آذربایجان میللی فعاللاری و خالقینی دا بو حرکته قاتیلماغین گرکلی اولدوغونو - ترس دورومدا تهراندا ایش اوستونه گلمیش یئنی فارس حاکیمیت داییره لری آذربایجانلیلارا میللیت آچیسیندان هر هانکی بیر پای وئرمزلر دئیه- گونئی آذربایجانلیلاری بو مسئله یه سفربر اولماغا قانع ائتمگه چالیشمیشلار (2). بو یاناشما اوزرینده دوراقلادیقدا تهران حاکیمیتی اوغرونداکی قارشی دورما دئموکراسی ساواش و مجادیله سی دئییل، حاکیمیتی اله کئچیرمک اوچون بیر یاریشما ساییلمالیدیر. یاریشما مقوله سی نظره آلیندیقدا تهرانداکی حاکیمیت اوغرونداکی قارشی دورمادا سیرا ایلک اولاراق بو حاکیمیت ایله اوز اوزه قالان ایصلاحاتچیلار باشلیغی آلتینداکی جبهه مشارکت ایسلامی فارس، مجاهدین انقلاب ایسلامی فارس و اونلارین قولتوغونا بارینماغا چالیشان نهضت آزادی فارس، جنبش مسلمانان مبارز فارس، جبهه ملی فارس، حزب توده فارس و باشقا فارس تشکیلاتلاری نین آدلارینی سیرالاماق یئرلی اولار. بو تشکیلاتلار، فارس هؤرگوت و تشکیلاتلاری اولدوقلارینا باخمایاراق ایران آدینی اؤزلری ایله یئدک چکدیکلری اوچون ایران ممالیکی محروسه سینده کی فارس اولمایان ائتنوسلارین میللی دوشونجه دن یوخسوللارینی ایران آدی آلتیندا اؤزلری ایله سفربر ائده رک تهرانداکی فارس حاکیمیت سیستیمی نین قورونماسی اوچون قوشقو و شک یئری بوراخاجاق دئییللر. یئری گلمیشکن کئچمیش گونلرده ایستر میرحسین موسوی نین و ایسترسه ده اونون دالیندا گیزلنه رک "ایرانیت و فارسلیق مقوله سینی" "جمهوری ایرانی" آدی آلتیندا قابارتماغا چالیشان فارسچی دوشونجه و فیکیرلری نظردن کئچیرمگه چالیشاق، میرحسین موسوی آدینا اوخویوروق:

"مهندس میرحسین موسوی روز شنبه در گفت‌وگویی کوتاه با قلم‌نیوز، درباره شعارهای نهضت سبز در در اجتماعات اظهار کرد: شعارهایی مورد حمایت راه سبز میلیونی مردم است که فراتر از قانون اساسی جمهوری اسلامی نرود. خواسته مردم دفاع از جمهوریت نظام در کنار اسلامیت آن است و شعار جمهوری اسلامی نه یک کلمه کم نه یک کلمه زیاد .."(3).

اوسته کی چیخیش ایله میرحسین موسوی ولایت فقیه اساسیندا قورولموش جمهوری ایسلامی فارس حاکیمیتینه اؤزونو مقید ائتدیگینی آچیق و آیدین گؤروروک. بو آرادا مهدی کروبی، سیدمحمد خاتمی، هاشمی رفسنجانی، جبهه مشارکت اسلامی، مجاهدین انقلاب اسلامی، جنبش روحانیت مبارز و بیر سیرا قومداکی دین مرجعلری نین ده میرحسین موسوی نی قوللاماسی بو مسئله اوزره هئچ بیر قوشقو و شک یئری بوراخاجاق دئییل. مسئله بئله اولدوقدا بوگونکو فارس حاکیمیت داییره لرینده کی ساواش دئموکراسی اوغروندا دئییل، چؤکمه گه یؤنلمیش فارس جمهوری ایسلامی حاکیمیتینی نی توتولدوغو مهلکه دن قورتارماق ایللر بویو او حاکیمیته قوللوق ائتمیش شخصلرین بیرینجی گؤرئو و وظیفه لری ساییلمیش گؤرونر. ائله اوندان یانادا میرحسین موسوی اوسته آدی چکیلن شخص و تشکیلاتلاردان گؤرئو آلمیش بیر ذات ساییلمالیدیر. دئمک، بوگون جمهوری ایسلامی سیرالارینداکی ساواش کیمی قاباردیلمیش قارشی دورمالار اصلینده حاکیمیت اوغروندا قلمه آلیناجاق ساواش دئییل، جمهوری ایسلامی نیظام و اینتیظامی نین هانکی یؤنده حرکت ائتدیگی نین اویقون اولوب اولمادیغی اوزرینده دوشونجه بیرلیگینه واریلماسی نین چتین بیر آشامایا آیاق باسدیغی سؤز قونوسو اولمالیدیر. ائله اوندان یانا دا هاشمی رفسنجانی توتوجو و محافظه کار کسیمی قانع ائتمک اوچون دوشونجه و فیکیرلرینی بیرینجی ایسلام حاکمیتی نین قورولوش زامانلارینا اساسلاندیرماغا چالیشاراق ولایت فقیه ساییلان سیدعلی حسینی آدرئسینه مساژلار وئرمگه چالیشمیش گؤرونر (4). میرحسین موسوی نین اوسته کی چیخیشی ایچریده کی فارس میللتچیلرینی او جمله دن حشمت الله طبرزدی کیمی لری اولدوقجا راحاتسیز ائتمیش، اوخویوروق:

" سایت های اینترنتی به نقل از اقای موسوی گفته شده بود: جمهوری اسلامی نه یک کلمه کم و نه یک کلمه زیاد. از زبان او گفته شده بود، شعار های انحرافی که منظور:استقلال -ازادی- جمهوری ایرانی، بوده است، انحراف از جنبش اخیر است!... حضرت عالی از سوی شورای نگهبان برای رقابت در انتخابات تایید شدید و همین دستگاه به شما امکان تبلیغ و حضور در تلوزیون غیر ملی را داد. در حالی که صد ها نفر رد صلاحیت شدند. شما با حضور در انتخابات مردم را دعوت به پای صندوق های رای کردید ... شما اما به مردم وعده داده بودید که از رای ان ها صیانت می کنید.و البته همگان می دانستند که این شعاری بیش نیست اما چاره را در این دانستند که به این وعده اطمینان کنند. ... مردم ۳۰ خرداد به خیابان امدند تا اعلام کنند که با شخص ولی فقیه و شورای نگهبان و همه ی نهاد های وابسته یا در واقع نظام مخالف هستند. حتا خود شما نیز با این حرکت مردم هم اهنگی کردید اما گویا متوجه نبودید که چه می کنید!.. مردم تنها خواسته ای که از شما دارند این است که جا نزنید. ممکن است حتا شما نیز بازداشت شوید. خواهش ما این است که اعتراف نکنید. این خواسته ی مردم از اصلاح طلبان است. اما انتظار ندارند که خون بدهند تا جمهوری اسلامی نه یک کلمه کم و نه یک کلمه زیاد،تثبیت شود"(5).

اوسته گؤروندوگو کیمی کئچمیش اوتوز ایلده ایسلام آدی آلتیندا بارینمیش و کئچمیش سکسن بئش ایلده ایرانلیلیق دونونا سوخولموش فارسچیلیق مقوله سی حاکیمیت داییره سی نین ائشیگینده  بیله فارس اولمایان میللیتلری توزاغا سالماق اوچون تور و توزاغینی قورموش گؤرونر.

دئمک، مسئله یالنیز چوروموش فارس ولایت فقیه حاکیمیتینی ایله حئسابلاشماق دئییل، دؤنه دؤنه دیکتاتورلوق علیهینه ساواشاق دئیه فارس شاهلیغی و ولایت فقیه لیگی علیهینه قان و جان وئره رک فارسلیق قوربانلیغیندا دوز چؤرک بیلمزلیکلره قوربان گئتمکدن قاچینماق آذربایجان میللی شخص و تشکیلاتلاری نین ایلک آماج و هدفی ساییلمالیدیر.

اوسته کی گؤرونوملر ایران ممالیکی محروسه سینده کی فارس اولمایان ائتنوسلارین نئجه بیر قاریشیق و مرکب اورتامدا یئر آلمالاریندان سؤز آچار. مسئله بئله اورتایا قویولدوقدا چیخیش یولو نه اولمالی دئیه گئنه بیر چوخلاری نین ذهنی قاریشمیش مقامدا یئر آلار. اونلار تهرانداکی حاکیمیت داییره لرینده کی قارشی دورمادان اوراداکی فارس اولمایان ائتنوسلارین او جمله دن آذربایجان تورکلری نین اتکیلندیکلرینی و تهرانداکی گؤستریلرده بیر چوخ آذربایجانلیلارین قوربان گئتدیکلرینی قلمه ایله گؤز اؤنونه سرگیله یه رک آذربایجان شهر و کندلری نین ده اونلارا کؤمک ائتمک میللی و مدنی بورجو وار دئیه آذربایجانلیلارین میللی حیسلرینی قیدیقلاماغا و اونلاری بیر داها تهرانداکی حاکیمیت دگیشیمی اوچون مئیدانا سوروکلمگه چالیشارلار. 

اونلار بو دوشونجه و فیکیرلری اؤنه سوررکن دوشونجه و فیکیر باخیمیندان کیم کیمین خیدمتینده اولدوغونو بیله اؤزلرینه آچیقلاماق ایستمزلر. دئمک، تهرانداکی آذربایجانلیلار بیر یانا دورسون  فارس ولایت فقیه حاکیمیتی نین باشچیسی سیدعلی حسینی خامنه ای و اونون اوزنگیسینده ایسلامیت آدی آلتیندا فارسلیغا مینیک وئرن ذاتلار و حتی اونلارا بوگون مخالیف گؤرونن آیت الله موسوی اردبیلی، موسوی تبریزیلری، میر حسین موسویلر، مصطفی تاجزاده لر و بهزاد نبویلر بیله فارسلیق توتساغیندا میللی دوشونجه دن ساغیلاراق فارسلیق نؤکرلیگینی اؤزلرینه شرف بیلن ذاتلاری اولدوقلارینی گؤرمزدن حرکت ائدرلر. بو مسئله یه بیر آز داها آچیقلاماق گتیرمک اوچون هر هانکی بیر اوردو سیرارینا قوشولموش انسانلار اوزره دوشونجه و فیکیر یئریتمگه چالیشاق. اوردو سیراسینا قاتیلمیش هر هانکی بیر اَر و عسگر او اوردو سیراسیندان اؤزونو خیلاص (ترخیص)  ائدن گونه دک ایشلک (عملکرد) باخیمیندان او اوردونون ووران قولو ساییلدیغینا باخمایاراق دوشونجه و فیکیر باخیمیندان او اوردونون توتساغی ساییلار. دئمک، فارس ایستعمارچیلیغی و شوونیزمی نین آلدادیجی و یالانچی تبلیغاتینا اویاراق دوشونجه و فیکیر باخیمیندان  توتساق دوروموندا اولان هرهانکی شخص و توپلوم اؤز میللی منلیک و کیملیگیندن اوزاق دوشدوگو اوچون یئری گلدیکده دوشمنین کسر قیلینجی دا ساییلابیلر دئیه دوشونمه لی ییک. بو باخیمدان آذربایجان میللی حرکتی اؤزونو تهراندا دوشونجه و فیکیر باخیمیندان توتساق اولموش آذربایجان تورکلری ایله عیارلامالی دئییل، اؤزو حرکت مستقیللیگینی قورویاراق اونلاری اؤز میللی منلیک و کیملیکلرینه دوشوندورمه لیدیر دئیه دوشونجه و فیکیر یئریتمه لی ییک.

دئمک، ایران ممالیکی محروسه سینده کی فارس اولمایان ائتنوسلارین میللی و مدنی آزادلیغی فارس ایستعمارچیلیغینی الینده بیر قورتولوش رمزی دئیه ساخلامیش شخص و تشکیلاتلار ایله آخار باخار یاناشماق و اوزدن ایراق توپلومو قورد قارشیسیندا آیین شایین اوتلاماق اولابیلمز دئیه دوشونمه لی ییک. بئله لیکله آذربایجان میللی فعاللاری و تشکیلاتلاری دئیه هرهانکی فارسچی بیر آخین (جریان) نین یئلی ایله ترپنمک، اسمک  و اونون داورانیشینا ترس داورانیش گؤسترمک دئییل، ایران ممالیکی محروسه سینده فارس اولمایان ائتنوسلار ایله فارس ایستعمارلیغینا قارشین اورتاق دیل تاپماغا اورتام یاراتماق، آذربایجان خالقینا آیدینلیق وئرمک و اونلاری تشکیلاتلاندیرماغا یول گؤستره رک بو چتین و چیخیلماز اورتامدان چیخیش یولو تاپماق اولار دئیه دوشونمه لی ییک.

قایناقلار:

1                    ایشیق سؤنمز، فارس دیل و مدنیتینه اساسلانمیش حاکیمیتین ایران ممالیکی محروسه سینده کی جمهور باشقانی سئچیمی اویونلاری: http://www.azadtribun.net/x19510.htm

1.1                         ایشیق سؤنمز، ایراندا جمهورباشقانی سئچیمی، حاکیمیت اوغروندا دؤیوش و آذربایجان میللی مسئله سی: http://www.azadtribun.net/x19730.htm

2                    باخینیز گوناز تئلویزیونونداکی او زامانکی جانلی دانیشیقلار.

3                    میرحسین موسوی: جنبش حق‌طلبانه مردم کوچکترین ارتباطی با خارج ندارد/ سرشت جنبش مردم،جنبه مسالمت‌آمیز دارد: پایگاه اطلاع رسانی میرحسین موسوی: http://mirhossein.barnegar.com/view-537.html

4                    انجمن هوادان میرحسین موسوی، فیلم کامل نماز جمعه هاشمی رفسنجانی 26 تیر 1388: http://friendfeed.com/omena/6978fd4e/26-1388

5                    حشمت الله طبرزدی، دو کلمه حرف حساب با مهندس موسوی: http://www.iranglobal.info/I-G.php?mid=2-52729

ایشیق سؤنمز، 05.08.2009