دنیز ایشچی ایمضاسی ایله یازیلمیش "آلترناتیوها، پرینسیپها و هژمونیها" آدلی یازییا باخیش

 

دوشونجه و فیکیر یئریدرکن قاریشیق و ایکی باشلی دئییل، آچیق و آشکار گؤروشوموزو اورتایا قویمالی ییق. بو باخیمدان دنیز ایشچی ایمضاسی ایله دوشونجه و گؤروشلرینی توپلوما  سیریماغا چالیشان ذاتین گؤروشلری دیققت چکیجیدیر. بو ذاتین کئچمیش دوشونجه و فیکیر دونیاسی داغیلدیغی اوچون آنالیز گؤروشلری ده بیربیرلری ایله اؤرتوشمک دئییل، بیربیرلرینه ضیدیت اولوشدورار. بو دئدیکلریمیزین هانکی آشامادا اولدوغونو اؤیرنمک اوچون مؤللیفین بیر نئچه گون اؤنجه یازدیغی گؤروشونو سرگیلمک پیس اولماز دئیه دوشونوروک، اوخویوروق:

"... جنبش فدرال دموکراسی ما در حال شکل گیری میباشد که فدرالیسم را از طریق هژمونی طلبی ملّت ترک آذربایجان میخواهد، این بینش از یک طرف یک سیستم نژاد پرست را برداشته و یک سیستم دیگر نژاد پرست را میخواهد جایگزین آن بکند، از طرف دیگر به فدرالیسم بعنوان یک روش مسالمت آمیز زندگی ملتّها در کنار همدیگر نگاه نمیکند، بلکه آنرا یعنوان وسیله، پّله کانی و ابزاری در جهت رسیدن به استراتژی دیگری ارزیابی میکند. این استراتژی میتواند "استقلال" طلبی آنها باشد و یا بینش توران بزرگ.. "[1].

دنیز ایشچی ذات عالی نین اوسته کی تهمتلری بیلیم و علم اساسیندا دئییل، کئچمیش منسوب اولدوغو فارس تمامیتچیلیگینی اساس گؤتورموش فارس ایستعمارچیلیق تشکیلاتی گؤروشونه اساسلانان بیر گؤروش ساییلار. بو گؤروشه اساساً کئچمیشده فارس تمامیتچیلیگی ایران ممالیکی محروسه سینه حاکیم کسیلدیگی اوچون تورکلر ایران ممالیکی محروسه سینده چوخلوغو اولوشدوردوقلاری اوچون فئدرال قورولاجاق بیر سیستیمده تورک تمامیتچیلیگی بو ممالیکی محروسه یه حاکیم کسیله بیلر دئیه بو ذات  آذربایجان فئدرال دئموکرات حرکتی "جنبش فئدرال دئمکرات آذربایجان" آدلی تشکیلاتی نژادپرستلیک "نژادپرست" دامغاسی ایله سوسدورماغا چالیشار. دنیز ایشچی بو مقوله یه گیرمه دن اؤنجه  "فایدالی آیری سئچگیلیک (تبعیض مثبت)" دئیه بیر دئییم آرایا آتماغا چالیشمیش. بو دئییم ایستعمارچی گوجلرین Assimilation آدلاندیردیقلاری آذربایجان دیلینده "میللی اریتمه" آدلانمیش دئییم ساییلار. اوخویوروق:

"در شرایط تبعیض و اجحاف در حّق دسته، گروه و یا ملّیتی، تبعیض مثبت از وسیله هایی است که آن دسته اجحاف شده را به سطح برابری در برخورداری از امکانات میرساند. تبعیض مثبت حق طبیعی تمام دسته ها، گروهها و ملیت هایی میباشد که در حق آنها اجحاف شده است"[2].

اوسته ایشاره اولوندوغو کیمی موللیف فایدالی آیری سئچگیلیک "تبعیض مثبت" آدلاندیردیغی مقوله آنا دیلیمیزده "میللی اریتمه یوخسا اریتمه سیاستی"، ایستعمارچی دؤلتلر سؤموردوکلری (ایستعمار ائتدیکلری) مملکتلرین، اورالارین دیل ومدنیت صاحابلاری نین میللی بیلینجلرینی باسدیرماق و انسانلارینی اویقولانمیش (حیاتا کئچمیش) سیاستدن خبرسیز ساخلاماق ایستدیکلری، اونلاری اؤز دیل و مدنیتلریندن بوشاتماق اوچون Assimilation دئیه بیر دئییم اورتایا آتمیشلار. بو دئییم آلمان خالق دیلینده Verschmelzung (اریتمه) و  Angleichen (بنزتمه) آدلانار. بو دئییم بوتون ایستعمار دؤلتلری طرفیندن انگلیسجه Assimilation، فرانسیزجا Assimilation ، آلمانجا Assimilation، ایسپانیولچا Asimilación، روسچا Ассимиляция، ایتالیانجا Assimilazione، پورتاغالچا Assimilação، هولندچه Assimilatie دئیه موللیف ایفاده ائتدیگی ایچریک ایله، آنجاق ایستعمار یؤنلو بیر دئییم ساییلار. گؤروندوگو کیمی موللیف ایستعمار مقوله سی نی اؤنمسه مه دیگی و اونا اهیمت وئرمه دیگی اوچون دولاییلی اولاراق فارس ایستعمار حاکیمیتلری طرفیندن اعمال اولموش "ایچ ایستعمار" سیاستینی بیر مثبت مقوله دئیه قلمه آلمیش گؤرونر. بو مقوله نین اوزرینده بیر آز داها آرتیق دوراقلارساق، موللیف فایدالی آیری سئچگیلیک "تبعیض مثبت" آدلاندیردیغی مقوله نین نه اولدوغونو باشا دوشمک و اونون عوامفریبلیکدن باشقا بیر ماهیت داشیمادیغینی آنلاماق هئچ ده چتین اولماز. آذربایجان مشروطیت حرکاتی نین سونوچ و نتیجه سی نین یئنیلگه و شکسته اوغرایاراق ایران ممالیکی محروسه سینده قاجار شاهلیغی نین چؤکمه سی و محللی حاکیمیتلرین آرادان قالخماسی ایله رضا خان خاریجی گوجلر، باشدا اینگلیسلر واسیطه سی ایله مرکز حاکیمیتی الینه آلاراق فارس یؤنتیم و ایداره داییره لرینی بیر ایستعمارچی قورولوش اولاراق فارس اولمایان بؤلگه لره آخین ائتدیر مه سی، زامان گئدیشی ایله بوتون فارس اولمایان ائتنوسلارین دیل و مدنیتلری و میللی کیملیکلرینی اریتمه سیاستینه تابع توتاراق، اونلارین ذهنی، فیزیکی گوجلرینی، یئر آلتی و یئر اوستو قایناقلارینی فارس ایستعمارچیلیغی نین خیدمتینه آلماسی یاخین کئچمیشده تانیق اولدوغوموز اولایلاردیر. فارس ایستعمارچیلیق سیاستی نتیجه سینده زامان گئدیشی ایله فارس چؤللوک و کویرلیکلری آباد اولارکن ایران ممالیکی محروسه سی نین بوغدا آنباری ساییلان آذربایجان چؤللوگه دؤنموش، شهر و کندلری نفوس باخیمیندان بوشالاراق یئر آلتی و یئر اوستو قایناقلاری فارس ایستعمار حاکیمیتی طرفیندن سؤمورولموش. بو مسئله باشقا ائتنوسلار، او جمله دن عربلر و باشقالاری اوزره ده کئچرلی ساییلار. دئمک، دنیز ایشچی ذات عالی نین "فایدالی آیری سئچگیلیک "تبعیض مثبت" آدلاندیردیغی مقوله فارس ایستعمارچیلیق مقوله سی ساییلار. ائله اوندان یانا دا دنیز ایشچی دوشونجه و فیکیر یئریدرکن اؤزونو فارس ایستعمار گوجلریندن هئچ ده فرقلندیره بیلمز. هر هانکی بیر میللت اوولادلاری نین ذهنینه حاکیم کسیلمک او میللتی چاپیپ تالاماق اوچون یئترلی ساییلاجاق بیر ایستعمار مقوله ساییلار. اوندان یانا دا بوگون فارس تشکیلاتلاری و ایداره اورقانلاریندا فارس اولمایان ائتنوسلاردان کیمسه لرین بؤیوک وظیفه لره تعیین ائدیلمه لری، بو قورم و تشکیلاتلارا باشچیلیق ائتمکلری فارس ایستعمارچیلاری طرفیندن دوشونولموش ایستعمار مقوله سینه اساسلانمیش بیر داورانیش ساییلار. بیلیندیگی کیمی 1946 اینجی ایل آذربایجان میللی حکومتینی یئنیلگه یه اوغراتماق و آذربایجانی ایشغال ائتمک اوچون فارس ایشغالچی قوشونلاری نین آذربایجانا آخین ائتمه سینده سرهنگ هاشیمی نی ظاهیرده بیر قورتولوشچو قوشون باشچیسی کیمی وظیفه لندیرمک ده فارس ایستعمارچیلیق مقوله سینه اساسلانان بیر داورانیش ساییلار. دئمک، آدی چکیلن ذاتلار بو ایداره لر و اورقانلاردا تورکلوک، عربلیک، کوردلوک، بلوچلوق و باشقا ائتمک دئییل، فارس ایستعمارچیلاریندان داها فارس اولماقدا، بعضی دئییشلره گؤره "پاپدان داها دا پاپ اولماغا" اؤزلرینی وظیفه لی سایدیقلاری بیر قول اولاراق اؤز میللی منلیک وکیملیک لرینه آرخا و کورک چئویرمه نی اؤزلرینه بیر بورج و وظیفه حئساب ائدرلر. دنیز ایشچی ذات عالی نین فارس ایستعمارچیلاری طرفیندن آشیلانمیش گؤروشلری ایله تانیش اولدوقدان سونرا "پرینسیب" صاحابی اولموش دئیه اورتایا آتدیغی ایکی باشلی دوشونجه و فیکیرلری ایله تانیش اولماغا چالیشاق،  اوخویوروق:

"خیلیها از اوّل خیال خود را راحت کرده اند و دستهای حود را شسته و مسئولِّت و رسالت هدایت هر گونه جنبش مردمی را بر عهده جناحهای اپوزیسیون حکومتی گذاشته اند. آنها دیگر این مسئولیّت را از دوشهای خود بر زمین گذاشته که اند این آنها نیستند که دارای کاراکتر،پرینسیپ، پلاتفورم برنامه ای و ساختاری لازم جهت عبوردادن خیزش مردمی از این برهه تاریخی باشند. "اپیکوریسم" نوعی از فلسفه زمان شکست است که روشنفکران بطور تاریخی و غریضی شکست را مشاهده کرده و بصورت امیدواری مایوسانه ای ریاضت شکست را بخش طبیعی هستی اجتماعی قبول کرده و به حیات اجتماعی خود ادامه میدهند"[3].

اوسته کی گؤروشلری بعضیلری فارس اوپوزیسیون تشکیلاتلاری آدرئسینه آلقیلاماغا چالیشسالار دا، فارس اوپوزیسیون تشکیلاتلاری ساغدان سولا دک  (پان ایرانیست، نهضت آزادی، میللی مذهبی، سلطنت طلب، مجاهید، توده، اکثریت، چریک فدایی و باشقا...) یاشیل حرکت "جنبش سبز" دئیه گئجه و گوندوز دورمادان خیابانلارا چیخدیقلارینا و  خاریجی دؤلتلری بو مسئله یه جلب ائده رک حاکیمیتی اله کئچیرمک چابالارینا تانیق اولمامیز- دنیز ایشچی فرقینده اولماسا بیله- اونون اوسته کی گؤروشلری فارس اوپوزیسیون تشکیلاتلاری آدرئسینه دئییل، بیر باشا آذربایجان میللی حرکتینه آدرئسلنمیش گؤروش ساییلار. دنیز ایشچی ایمضاسی ایله کئچمیش یازیلاریندا داها دا قاباریق آذربایجان میللی حرکتی علیهینه یؤنلمیش[4] ذات بو اله آلدیغیمیز مقاله ده یئرینه گؤره نال و میخا دؤگمه گه چالیشمیش. ائله اوندان یانا دا تهرانداکی حاکیمیت چکیشمه سینه قاتیلماماغی دوشونجه و فیکیر راحاتلیغی (خیال راحت) دئیه قلمه آلماغا چالیشاراق میللیتلر مسئله سی آچیسیندان فارس پوزیسیون تشکیلاتلارینی نظره آلمادان کئچمیشده کی سایاق "همه باهم" ویرد و شعارینی دولاییلی یول ایله یئنیلمگه چالیشاراق ایچریک باخیمیندان آشاغیدا گؤره جگیمیز دک چوروموش فارس تشکیلاتلارینی "تشکیلاتهای سراسری" دئیه گؤزه سوخماقدان بیله چکینمک ایستمز. کئچمیش یازیلاردا دا ایشاره ائتدیگیمیز دک بوگونکو حاکیمییت قارشی دورماسی و فارس حاکیمیتینه میللیتلر مسئله سی آچیسیندان پوزیسیون ساییلان فارس ایصلاحاتچیلاری واونلاری بوگون تمثیل ائدن میرحسین موسوی، مهدی کروبی و سید محمد خاتمی یزدی کئچمیش اوتوز ایلده جمهوری ایسلامی حاکیمیتی نین یؤنتیجیلری (ایداره چیلری) اولدوقلاری و 1979 اونجو ایل قبول ائتدیکلری جمهوری ایسلامی ایران آنا یاساسی نین بندلرینی حاکیمتده اولدوقلاری زامان حیاتا کئچیرمک ایستمدیکلرینی و بو دوغرولتودا حاکیمیتده اولارکن اولوملو یاناشمادیقلاری و دانیشمادیقلارینی نظره آلارساق، بوگون ظاهیرده بو شفاعتچی امامزادالارین دالیسینا خالقی ایتسحمار ائتمگه چالیشاراق سفربر ائتمک اؤزو ده فارس ایستعمارچیلیغی نین محصولو و قولو ساییلار. ائله اوندان یانا دا میللیتلر مسئله سی آچیسیندان حقوق برابرلیگینی قبول و ایفاده ائتمکدن چکینن ذاتلارا اویونجاق اولماماغین دوغرو و دوزگون اولدوغونو باشا دوشن هر کس باشدا آذربایجان میللی فعاللاری نین بو مسئله ده تمکینلی اولماسی یالنیز ایکی دره بیر سره سیاستی یئریتمگه چالیشان دنیز ایشچی  ذات عالیلری دئییل، فارس ایستعمارچی، پان ایرانیست و حزب جبهه میللی راسیست و فاشیست تشکیلاتلارینی دا اولدوقجا راحاتسیز ائتمیش مقوله ساییلار[5]. دئمک، حاکیمیت دگیشمک  مسئله سی اوغروندا فارس اولمایان ائتنوسلارا منسوب اولانلارین یاناشماسی موللیف خیال ائتدیگی، یوخسا توپلوما آشیلاماغا چالیشدیغی "خیال راحاتلیغی" مسئله سی دئییل، کیم ایله هانکی اساسدا حرکت ائتمک هر بیر میللی کیملیگی و منلیگی اوغروندا دوشونن انسانلاری داها دا آرتیق دوشوندورور و دوشوندورمه لیدیر. دنیز ایشچی ایضاسی ایله یازیلمیش یازیدان گئنه ده اوخویوروق:

"این سری از دوستان از یک طرف جنبش مردمی را یک پدیده ای تک و نوین که در جهان نمونه اش مشاهده نشده است تلّقی میکنند. آنها اینطور وانمود میکنند که این جنبش یک حرکت مدنی اجتماعی نوین است که بخاطر شبکه ای بودن ارتباطات بخاطر وجود تکنولوژیهای نوین، بخاطر اشتراک ویژگیهای نسل نوین با انسانهای نوین قرن بیست و یک، نمیتواند هژمونی سیاسی واحدی داشته باشد و بصورت یک ارگانیسم زنده ایکه خود خود را رهبری میکند، باید به حرکت طبیعی مدنی خود ادامه دهد. همه این تعریف و تمجیدهای "مدرن" و "نوین" و "شبکه ای" و غیره فقط این مقصود آنها را بیان میکند که ریاضتها و سختیهای شرایط شکست را بعنوان یک واقعّیت عینی قبول کرده، خود را با آن انطباق دهیم و پلاتفورم مرحله ای تاریخی امروزین را در اندازه قدمها و شعارهای اپوزیسیون درون حکومتی آبکش کرده و پایین بیاوریم و ما مستقیما نقشی دز رهبری سیاسی جامعه نداشته باشیم"[6].

یازی نین باشلانقیجیندا ایشاره ائتدیگیمیزدک دنیز ایشچی قاریشیق (پریشان) و ایکی باشلی دوشونجه و گؤروش سرگیله مگه چالیشاراق یازی سی نین بو بؤلومونده فارس حاکیمیتینه میللیتلر مسئله آچیسیندان پوزیسیون ساییلان فارس تشکیلاتلارینی نظره آلاراق اونلارا عاغیل قویماغا چالیشماسینا باخمایاراق اونلارین سیرالاریندا فارس اولمایان ائتنوسلاردان توتساق اولموش و بنده چکیلمیش قوللارین یئر آلدیقلارینی و بو تشکیلاتلار اؤزلوکلرینده کئچمیشده کی کیمی سورونسوز، مسئله سیز و قیبراق دئییل، میللیتلر مسئله سی آچیسیندان بوغازلانمیش ساییلدیقلاری نین بیله فرقینه وارمیش دئییل. دئمک، آذربایجان میللی مسئله سی، اؤزللیکله 1385 اینجی ایلین خورداد آیینداکی آذربایجان شهرلرینده کی حرکتلری خبر بایکوتو ایله قارشیلایان، اونو اؤنمسیز بیر مسئله کیمی گؤز آردی ائتمگه چالیشان فارس تشکیلاتلاری بوگونکو تهران و شیراز اولایلارینی دونیادا بنزرسیز بیر گؤرونوم کیمی تقدیم ائتمکلری کئچمیشده فارس توپلوموندا بئلنچی بیر گلیشمه نین آز اولدوغونون آلتینی - سسسیزجه – چیزارکن تهرانین ائتنیک آچیدان فارس اولمادیغینی دا گؤرمزدن حرکت ائتمیش ساییلارلار. مسئله نین اوزرینده داها آرتیق دوراقلاساق، تهران شهری نین چوخلوغو آذربایجان تورکلری اولدوغونا باخمایاراق تهرانداکی بوگونکو قارشی دورمالارین آذربایجان شهرلرینده اؤزونه یئر آچمادیغی فارس تشکیلارینی داها دا مأیوس و اومودسوز ائتمیش بیر مقوله ساییلار[7]. دئمک، فارس تشکیلاتلاری نین ایران ممالیکی محروسه سینده کی میللیتلر مسئله سی نی گؤرمزدن گلدیکلری و هر هانکی فارسلیق اساسینداکی حرکت و آخینی بنزرسیز دئیه قلمه آلمالاری (یک پدیده ای تک و نوین که در جهان!! ) فارس تشکیلاتلاریندا توتساق حالیندا حیات کئچیرمکده اولان ذاتلارین داها آرتیق توتساق و اسارتده قالمالارینی گوونجه آلتینا آلاجاق بیر ایستعمار مفکوره سی ساییلار. دنیز ایشچی ایمضاسی ایله یازیلمیش یازیدان اوخویوروق:

"شاید جوهره و پرینسیپهای اساسی پلاتفورم سازمان رهبری کننده ای که میتواند مردم ایران را از این باطلاق تاریخی عبور داده و به مرحله بالاتری از رشد تاریخی برساند را بشود در چند فاکتور "تضمین حقوق بشر"،" دموکراسی و آزادی" و " عدالت اجتماعی" و بالاخره "سکولاریسم" خلاصه کرد. کدام تشکیلاتهای سیاسی واقعاُ بر اساس اعتقاد و عمل بر این اصول حرکت میکنند. کدام اعتلافهای عینی و عملی قادر هستند در پراتیک بصورت واقعبینانه تری دور هم گرد آیند و با جوهره قویتری از چند پرینسیپ و فاکتور بالا دور همدیگر حلقه بزنند"[8].

دنیز ایشچی نین قلمه آلدیغی "باتلاق تاریخی" ایران ممالیکی محروسه سینده کی فارس اولمایان ائتنوسلار آچیسیندان کئچرلی دئییل، بو مسئله فارس ایستعماری و ایستعمارچیلاری نین میللیتلر مسئله سی ایله اوزلشدیگی و فارس ایمپریاسی نین داغیلماق عرفه سینده یئر آلدیغی مقامدیر دئیه فارس "ایچ ایستعمار" مقوله سی نین باتلاقدا جان آتماقدا اؤلوم و قالیم هیجانینا قاپیلماق مسئله سی نین گؤرونومو ساییلار. اوسته گؤروندوگو کیمی فارس ایستعمار مفکوره سی ایله یوغرولموش شخص و تشکیلاتلار یئری گلدیکده بیر فارس ایستعمارچیسی کیمی ایمکان ایچریسینده فارس ایستعمارچیلیغینی توتولموش مهلکه دن قورتارماغا خط وئره جک گؤرونرلر. اؤزلرینی "جنبش آذربایجان برای دمکراسی و یکپارچگی ایران" آدلاندیران فارس راسیستلیک محفلی ده ائله بو اساسدا فارس مدنیت راسیستلری و پان ایرانیستلر طرفیندن اورتایا قویولموش تشکیلات دئیه بیر اویوق ساییلار. دئمک، ایران ممالیکی محروسه سینده کی میللیتلر مسئله سی یالنیز وطنداشلیق مقوله سی دئییل،  فارس ایستعمارچیلیغینا سون قویاجاق دیل و مدنیت صاحابلاری نین میللی مسئله لری ساییلار. فارس ایستعمارینا سون قویمادان موللیف گؤز بویاماغا چالیشدیغی هر هانکی بیر مقوله گئرچک حیاتا کئچه بیلمز. موللیف ایشاره ائتدیگی مقوله لرین هر هانکی سی نین حیاتا کئچمه سی فارس توپلومو، اونون مدنیت راسیستلری و قوللوقچولاری اوچون دئموکراسی ساییلسا دا، فارس اولمایان میللیتلری فارس ایستعماری و اسارتیندن قورتارابیلمز. دنیز ایشچی ایمضاسی ایله یازیلمیش یازیدان اوخویوروق:

"... اتّحادی از سازمانهای سرتاسری "سکولار دموکرات" و نمایندگان سیاسی جنبشهای ملّیتهای ایران بلکه بتوان گفت مناسبترین ساختار ایده الی است که میتواند این رسالت تاریخی را به مقصد برساند. امّا واقع بینانه نگاه بکنیم چندین بیماری سیاسی بشدّت احتمال شکل گیری چنین اتحّادیه ای را اگر نگوییم غیر ممکن، باید بگوییم غیرمحتمل میکند. عمده ویژگیهای این بیماریها را میتوان به شرح زیر فورمول بندی کرد. یکی اینکه زهرهای تبلیغات پان ایرانیستی در میان سازمانهای سیاسی سرتاسری بیشتر از آن حدّ اثر کرده است تا اینها به این راحتی حقوق طبیعی ملّی مردم ملّیتهای دیگر را به رسمیّت بشناسند و به چند ملّیتی بودن ایران اعتراف کنند. دیگری اینکه تحت تاثیر همین نگرش سازمانهای سرتاسری، انتی تز آنها در میان سازمانهای سیاسی جنیش ملیّتها شکل میگیرد  که عکس العملهای مشابه متقابل را در دستور عملکرد روزانه خود قرار میدهد که نتیجه این تقابل جدایی بیشتری را با خود می آورد و این جدایی و تقابل هر چه بیشتر ایندو قطب سیاسی را از همدیگر جدا میکند"[9].

اوسته دنیز ایشچی بعضی فاکتلارا یئرلی ایشاره ائتدیگینه باخمایاراق ایران ممالیکی محروسه سینده کی حاکیم سیستیمین هانکی اساسدا اولدوغونو (فارس ایستعمارچیلیغی) قبول ائتمکدن عاجیزلیک چکدیگی اوچون دوشونجه و فیکیر قاریشیقلیغی ایله دؤنه دؤنه اوزلشمیش گؤرونر. دئمک، فارس ایستعمار قووه لری  کیم اولدوقلارینی مظلوم میللت اوولادلارینا دوغرو و دوزگون بیچیمده دئییب اورتایا قویسالار، ازیلمیش میللت اوولادلاری دنیز ایشچی ذات عالی کیمی فارس ایستعمارچیلیغینا فایدالی آیری سئچکیلیک "تبعیض مثبت" آدی وئرمزلر. بئله لیکله ده اؤزونو آزاد انسان سانان دنیز ایشچیلر فارس ایستعمارچیلیغینا کؤله لیک دئییل، اؤز میللی منلیک و کیملیکلرینه دوشونمه نی اؤزلری اوچون ویجدان بورجو حئساب ائتمیش اولار. آنجاق بئیین، ذهنیت و فیکیزیکی باخیمدان ایستعمار مفکوره سی ایله ساریلمیش ذاتلار اوسته گؤروندوگو کیمی اؤزلرینی سایرو و خسته دئییل، فارس ایستعمارچی شخص و تشکیلاتلاری خسته و مریض حئساب ائدر و اوسته لیک اونلاری درمان ائتمک اوچون فارس ایستعمارچیلاریندان داها دا فارس اولماغا چالیشارلار. درد ده ائله بوراسیندادیر. آذربایجانین آلدانمیش بیر چوخ کواکیبلری فارس تشکیلاتلاریندان اومدوقلارینی اله گتیرمدیکلریندن سونرا اؤز میللی منلیکلرینه آرخالاناراق تشکیلات یاراتماق یئرینه باشقا فارس تشکیلاتلاری یاراداراق اؤز خالق آیدینلاری نین فارس ایستعمارچیلاری طرفیندن بنده چکیلمه لرینه اؤزلری بیلمزدن بیله کؤمک ائتمیش ساییلارلار[10]. دئمک، فارس تشکیلاتلاری تمامیتچیلیک و ایستعمارچیلیق مفکوره سی اساسیندا  ایران ممالیکی محروسه سینی اؤزلری نینکی بیلرکن بو تشکیلاتلاری "سراسری" دئیه قلمه آلان ذاتلار فارس ایستعمارچیلیغینی کؤلگه ده بوراخماقدا و فارس ایستعمار تشکیلاتلارینی فارس اولمایان ائتنوسلارین میللی تشکیلاتی کیمی تقدیم ائتمکده هئچ ده اؤزلرینی فارس ایستعمار گوجلریندن فرقلندیره بیلمزلر.

 

قایناقلار:



[1]           دنیز ایشچی، فدرالیسم استراتژی تحولگرای محوری، دوشنبه  ۴ آبان ۱٣٨٨ -  ۲۶ اکتبر ۲۰۰۹: فدرالیسم "تُرک محوری":  http://www.akhbar-rooz.com/article.jsp?essayId=24681

[2]           باخ اورادا.

[3]           دنیز ایشچی، پرینسیپها و هژمونیها ،  آلترناتیوها،  دسامبر 2009-12-19:

http://www.solgunaz.com/Articles/Deniz_17.htm

[4]           الف- ایشیق سؤنمز، ایستعمار گؤروشونو یایماغا قاپیلماق می، یوخسا آزادلیق و برابرلیک اوزره دوشونجه یئریتمک می؟:http://www.azadtribun.net/x19906.htm

ب - ایشیق سؤنمز، دنیز ایشچی ایمضاسی ایله "ایسته دی قاش قویا، ووردو گؤزون چیخارتدی" باشلیغی ایله یازیلمیش یازییا باخیش: http://www.azadtribun.net/x19918.htm

ت - ایشیق سؤنمز، دنیز ایشچی ایمضاسی ایله "خوروزون قویروغونا ایناناخ، یا ملّانین آند ایچمه سینه" آدلی یازیلمیش یازییا باخیش: http://www.azadtribun.net/x19942.htm

[5]           الف- حزب پان ایرانیست، آشنایی با جنبش آذربایجان برای دموکراسی و یکپارچگی ایران: http://www.iranazar.net/index.php?option=com_content&view=article&id=1326:2009-12-02-11-53-58&catid=39:2009-05-19-19-18-10&Itemid=65

ب‌-      بیانیه جبهه ملی ایران- اروپا، بمناسبت رویداد ۲۱ آذرماه ۱۳۲۴ و ارتباط آن با رخدادهای جاری کشور، يکشنبه  ۲۲ آذر ۱٣٨٨ -  ۱٣ دسامبر ۲۰۰۹: http://www.sarkhat.com/fa/news/135506568/

[6]           باخ اورادا.

[7]           باخ 5- الف و ب.

[8]           دنیز ایشچی، باخ اورادا.

[9]           باخ اورادا.

[10]          محمد حنیف نژاد و دوستلاری نهضت آزادی تشکیلاتیندان اومدوقلارینی اله گتیره بیلمدیگی اوچون مجاهدین خلق ایران و بیژن جزنی و یولداشلاری حزب توده ایران تشکیلاتیندان اومدوقلارینی اله گتیره بیلمدیکلری اوچون سازمان چریکهای فداییان خلق ایران تشکیلاتلارینی یاراتمیشلار. سونوچ اعتیباری ایله آذربایجانلیلارین اؤز میللی منلیک و کیملیکلریندن اوزاقلاشمالارینا و فارس تشکیلاتلاری واسیطه سی ایله اونلارین فارسلاشماسینا یول آچمیشلار.

 

 

 

ایشیق سؤنمز، 20.12.2009