میللی مسئله و میللی مئدیا (رسانه)
بیلیندیگی کیمی میللی مسئله بیر میللت اوولادلارینین مسئله سی اولدوغو اوچون میللی مسئله نین خیدمتینده اولان مئدیالار دا میللت اوولادلارینین مسئله سی اولمالیدیر.
دئمک، میللی ایراده میللی دؤولت فورماسیندا تظاهور ائتدیکده میللی تحصیل سیستیمی، میللی کیتابلیقلار (کیتاب ائولری)، سیناما و تئاتر ائولری ده یارانمیش اولور. بونلارین یانی سیرا خالقی دونیا ایجتماعیتینده و او توپلومدا باش وئرن حادیثه و حرکتلردن خبردار ائتمک اوچون گونده لیک (روزنامه) باسین (مطبوعات) اورقانلارینین یانی سیرا یایین (پخش) اورقانلاری دییلن میللی رادیو تئلئویزیون کاناللاری نین اولماسی دا گره کلی بیر مسئله دیر. بیر چوخ اؤلکه لرده رادیو تئلئویزیون کاناللارینی مالیه لشدیرمک اوچون او توپلوملارداکی اینسانلاردان کیمسه نین میللی منسوبیتیندن آسیلی اولمایاراق آیلیق آنتئن حاققی دئیه آبونه پولو آلینار. بو پول رادیو تئلئویزیونلاری مالیه لشدیرمه قورومو و دؤلت داییره لری طرفیندن حئسابلاناراق معیینلشدیریلر. بیلیندیگی کیمی بو مئتود حاکیمیتی اولان میللتلرین رادیو تئلئویزیون مالیه لشدیرمه مئتودلاریدیر.
میللی حاکیمیتی اولمایان میللتلر قونشو دؤولت و میللتلرین رادیو تئلئویزیونوندان آسیلی اولاراق ایجتماعی فیکیرین فورمالاشماسی باخیمیندان گونی آذربایجاندا اولدوغو کیمی نئهیلیستی فیکیرلره صاحیب اولارلار. بیلیندیگی کیمی گونی آذربایجانلیلارین بیر چوخو 21 اینجی عصیرده یاشاماقلارینا باخمایاراق میللی باخیمدان کیم اولدوقلارینی هله ده بیلمیرلر. اونلار خبرلری قونشو دؤولت و میلتلردین یایدیقلاری رسمی کاناللاریندان آلدیقلاری اوچون فیکیرلری ده قونشو دؤولت و میللتلرین منافئعی اوغروندا فورمالاشمیش اولاراق اؤز ایچلرینده راحات فیکیر اورتاقلیغی یاراتما ایمکانلارینا صاحیب اولمادیقلاری اوچون قونشو دؤولت و میللتلر طرفیندن اؤزلری بیلمه یه رک هیدایت اولارلار و قونشولارینین تأثیر داییره سیندن اؤزلرینی قورتارا بیلمزلر.
بو اوسته کی آسپئکتلری نظره آلاراق گونی آذربایجاندا میللی مفکوره باخیمیندان اینسانلاریمیزین اؤزلرینی فارس ایستعمار داییره سیندن اوزاغا چکه بیلمه دیکلرینی اونلارین موستقیل یایین و باسین اورقانلارینین اولمادیغیندا آختاریلمالی ییق. تهران حاکیمیتی ایران ممالیکی محروسه سینده فارس اولمایان میللتلره اؤزلری اوچون عموم یایین و باسین اورقانلارینی یاراتما ایمکانی وئرمه دیگینی ده بو توپلوملاری فیکیر باخیمیندان اؤز ایستعمار داییره سی آلتیندا ساخلاماق ایسته مه سی ایله ایضاح ائتمه لی ییک.
دئمک، ایران ممالیکی محروسه سی داخیلینیده فارس اولمایان توپلوملارا اؤز دیل و مدنیتلری اساسیندا موستقیل یایین و باسین اورقانلارینین یارادیلماسینا ایمکان وئریلمه دیگی اوچون بو ممالیکی محروسه نین دئموکراتیکلشمه سی نین ایلکین (ایبتیدائی) چیخیش یولو فارس اولمایان توپلوملاردا فیکیر فورمالاشماسینا کؤمک ائتمکدن کئچه بیلر دئیه دوشونمه لی ییک. بیلیندیگی کیمی حاکیم نیظام و اینتیظام (فارس ایستعماری) بو توپلوملار آراسی فیکیر فورمالاشماسینا ایجازه وئرمک ایسته مه دیگینه قارشین دونیادا یارانمیش تئکنیکدن(اینتئرنئت و ساتلایت آنتئنلردن) فایدالاناراق بو محدودیت و محرومیتی آرادان قالدیرماق و یا آزاتماق اوچون ایقدام ائتمک هر بیر ویجدانلی اینسانین میللی و مدنی بورجودور. دئمک، اینتئرنئت و ساتلایت آنتئنلری بیر چوخ اوجقار بؤلگه لره اولاشمادیغینا باخمایاراق شهرلرده و بؤیوک کندلرده بو وسیله لردن فایدالانماق شرطی ایله بیر اؤلچوده سانسور کیمی قویولان محدودیتی آزاتماق اولار.
بو مسئله اوزره ایران ممالیکی محروسه سینده کی تورکلره گلدیکده بیلیندیگی کیمی کئچمیشده آمریکا بیرلشمیش شتاتلاریندا فارس کاناللارینا سیغیناراق هفته ده بیر نئچه ساعات و یا گونده بیر نئچه ساعات اؤز دیل و مدنیتلرینی سئون آذربایجان تورکلری طرفیندن او جومله دن آقا بهرام، رحمان اسداللهی، جمشید شوروی حضرتلری طرفیندن چابالار گؤستریلمیشدیر. آنجاق بونلار فارس ایستعمار کاناللاری مودورلوگوندن موسقیل اولمادیقلاری اوچون بیر شمع کیمی یانماغا باشلایاراق اؤزلرینی ایفاده ائتمک ایسته دیکلری زامان سؤنمه گه محکوم اولموشلار. بونلاردان بیر آز داها اوزاق دوشونن علیرضا نظمی افشار ذات عالیلری اولموشلار. او اؤز ایسته دیکلرینی دیئه بیلسین دئیه فارس شونیستلیگیدن اوزاق اولان آسورولارین تئلئویزیون کانالیندان ایلک وئریلیشلرینده ایکی و سونرالار ایسه بیر ساعات هفته ده زامان آلاراق اؤز پروقراملارینی یایماغا باشلامیشدیر. علیرضا نظمی افشار اؤزونو ایفاده ائتمکده مکان باخیمیندان باشاریلی گؤرونسه ده، زامان و مالی باخیمدان محدودیتله اوزلشمیشدیر.
بو مسئله لردن درس آلان گونی آذربایجان تئلئویزیون قوروجولاری بو داغینیقلیقلارا سون قویماق اوچون گونی آذربایجان تورکلری تاریخینده بیر تاریخی آددیم آتاراق موستقیل گونی آذربایجان تئلئویزیونو دئیه آذربایجان دیل و مدنیتینه دایالی بیر تئلئویزیونون یارانماسینا ایقدام ائتمیشلر. بونلار خالق ایجتماعیتی و دونیایا سپله نمیش آذربایجانلیلار بو حرکته جلب اولار دئیه بلیرلی بیر موددت بو تئلویزیونو آیاق اوسته ساخلاماق اوچون تئلئویزیون ساتلایت ایداره سینده اؤز مولکی سندلرینی ضمانت قویاراق بو تئلویزیونو آچماغا ناییل اولموشلار. دئمک، میللی بیلینج و کیملیک باخیمیندان بو ذات عالیلرین ایشلری تقدیره لاییق و آذربایجان تاریخینه یازیلاجاق حرکت ساییلمالیدیر.
گونی آذربایجان (گوناز) تئلئویزیونونو باشاریلی آیاق اوسته ساخلاماق مسئله سی
بیلیندیگی کیمی ایران ممالیکی محروسه سینده تورک توپلوملاری و گونی آذربایجانلیلار آراسیندا فیکیر فورمالاشماسینا کؤمک ائتمک اوچون گونی آذربایجان تئلئویزیونونا مادی و معنوی کؤمک ائتمک هر بیر تورکون میللیلیک و اینسانلیق بورجودور.
معنوی کؤمک مسئله سی
ایچریده کی خبرلری و ییغینجاقلارداکی چکیلن فیلیملری، آذربایجانین گؤرمه لی و گزمه لی یئرلریندن اولان فیلیملری بو تئلئویزیون مسئوللارینا یئتیرمک هر بیر ایچریده یاشایان قوروم و جمعیتلرین وطنداشلیق، میللیلیک و اینسانلیق بورجلاریدیر.
مالی کؤمک
ایچریده کی مالی باخیمدان چتین وضعیتی نظره آلاراق بو تئلویزیونو آیاق اوسته ساخلاماق و اونو مالیه لشدیرمک خاریجده کی وطنداشلار قارشیسیندا قویولموش گونوموزون اؤنملی مسئله لریندن بیری اولاراق دورور. آذربایجان تورکلری خاریجده آوروپا، آمریکا بیرلشمیش شتاتلاری، کانادا و اوسترالیا و ساییره مملکتلرینده داغینیق بیچیمده یاشامالارینی نظره آلاراق بو مالی مسئله نی تئکنیکی باخیمدان حلل ائتمک قابیلییتینده اولان یالنیز یارادیلاجاق آذربایجان میللی و مدنی تشکیلاتلاریندان آرایا گلن تئلئویزیون اوچون بیر مالی کوردیناسیون تشکیلاتی نین اولماسیدیر. بو کوردیناسیون تشکیلات مالی کؤمگی آذربایجان تشکیلاتلاری آراسیندا بؤلوشه رک زامان باخیمیندان بو تئلئویزیوندان بو تشکیلاتلارین فایدالانا بیلمه سینه ایمکان ساخلایا بیلر دئیه دوشونورسک، ایستر گوناز تئلئویزیون قوروجولاری و ایسترسه ده آذربایجان آدینا قورولموش و قورولماقدا اولان بوتون میللی و مدنی تشکیلاتلار بیر چاغیریش واسیطه سی ایله زامان کئچمه دن بیر آرایا گلمکلرینی بیر بیرلریندن ایسته مه لی اولمالیدیرلار. بونون یانی سیرا مالی باخیمدان ایمکان صاحیبی اولان شخصلرین ده کؤمک ائتمکلری یاخشی اولاردی. بو باخیمدان اونلارین دا ائحتمالی وئریله جک چاغیریشا لبیک دئمکلری آرزو ائدیلردی. باشقا حاللاردا آذربایجانلیلارین داغینیق و میللی بیلینج باخیمیندان آشاغی وضعیتده اولدوقلارینی نظره آلاراق تئلئویزیون مالی باخیمدان چتینلیکلر ایله اوزله شه بیلر دئیه هئچ بیر ویجدانی آییق آذربایجانلی بو مسئله یه راضی اولمامالیدیر. ایمکان داخیلینده علیرضا نظمی افشار جنابلاری دا آسورولار تئلئویزیونوندا یایدیقلاری پروقرامی و حتی آرتیق گونی آذربایجان تئلئویزیونوندان یایاراق اورادا ائتدیگی کؤمگی بو تئلئویزیونا ائدرسه، میللی باخیمدان بو مالی چتینلیگی بیر قدر گئدریلمه سینه کؤمک ائتمیش اولاردی دئیه بو دوغرولتودا فیکیرلشمه لرینی آرزو ائدردیک.
ایشیق سؤنمز 15.05.2005