دنیز ایشچی تیپلی انسانلارین فارس تشکیلاتلارینا "ننه من غریبم" دئمک حئکایه لری

کئچمیش یازیلاردا ایشاره اولدوغو کیمی بوگونکو ایران ممالیکی محروسه سینده دیل و مدنیت باخیمیندان فارس مدنیت راسیستیگی نین حاکیم اولماسی نین یانی سیرا ایقتیصادی باخیمدان فارس اولمایان میللی وارلیقلار اؤز یئر آلتی و  یئر اوستو قایناقلارینا حاکیم اولمادیقلاری اوچون فارس ایستعمارچیلیغی و فارس حاکیمیتچیلیگی اعمال اولماقدادیر. فارس ایستعمارچیلیغی "ایران سراسری" دئیه ایستر تشکیلاتچیلیق و ایسترسه ده ذهنی باخیمدان و ایران ممالیکی محروسه سینده کی فارس اولمایان میللی بیلینچی باسدیریلمیش انسانلاری فارسلاتماق و اونلاری فارسلیق دگیرمنینده یوخ ائتمگی اؤزونه بیرینجی هدف آلمیش مقوله ساییلار. اوندان یانا دا هر هانکی بیر تورک، عرب، کورد، لور و بلوچ ذهنی باخیمدان اؤز شخصی کئچمیشلرینی فارس ایستعمار تشکیلاری ایله ایضاح ائدرکن اؤز میللی کیملیکلرینی فارسلیق مقوله سی قارشیسیندا بیر چیخیلماز دوروملا اوزلشمیش مقامدا گؤررلر. بو ذاتلاردان بیری ده دنیز ایشچی ایمضاسی ایله دوشونجه و فیکیر باخیمیندان فارس ایستعمار تشکیلاتی ساییلان "سازمان فداییان خلق ایران- فارس" تشکیلاتی ایله اؤز کئچمیشینی ایضاح ائتمگه، بئله لیکله ده میللیت مقوله سی باخیمیندان اؤزو اوچون دئییل، میللیتلری ده حاکیمیتچیلیک باخیمیندان فارس پوزیسیون تشکیلاتلاری نین کؤلگه سی آلتینا چکمک اوچون اونون گؤروشونه گؤره فارس تشکیلاتلاری نین مرامنامه لرینده بو میللیتلره یازیلماسی لازیم اولان بیر خرمن وعده سی  نین یئری بوش گؤرونر. بونلار، بو ذاتلار اؤزلرینی دوشونجه و فیکیر باخیمیندان آزاد و دئموکرات فرض ائتدیکلرینه باخمایاراق اؤز اللری ایله اؤزلری اوچون تشکیلات دئیه هؤردوکلری فارس شیادلیق تورونو قیرما قابیلیتینده اولمایاراق اؤز عاجیزلیکلرینی سرگیلمیش اولارلار. بو داورانیشلار انگیلیس ایستعمارچیلیغینا قارشین هیندوستانداکی آنتی ایستعمارچیلیق حرکتینی رهبرلیک ائتمیش مهاتما قاندی نین دوشونجه سینه گؤره وارلی نین واری نین چئوره سینه چکیلمیش جهنم حئکایه سینی خاطیرلاتمیش اولار[1]. دئمک، فارس ایستعمارچیلیق مفکوره سینه اساسن "ایران سراسری" تشکیلاتلاری بو ممالیکی محروسه نین اصلی صاحابلاری و بو تشکیلاتلارا منسوب اولمایانلار ایسه خاریجی عامیل کیمی ایلک اولاراق اؤزلری نین فارسلیق مقوله سینه دوغما و صادیق اولدوقلارینی ایثبات ائتمک زوروندا اولدوقلارینی قبول ائتمه لی ایمیشلر. بو گؤروشلر دنیز ایشچی ذات عالی نین آشاغیدا اله آلاجاغیمیز دوشونجه لرینده آغیرلیق قازانمیش ساییلار. دنیز ایشچی نین بو گؤروشلریندن یولا چیخاراق "سازمان فداییان خلق ایران-فارس" قورولتایینا عنوانلادیغی  "ننه من غریبم" ایچریکلی گؤروشلری اوزره دئیینه رک بو چاشباشلیغا آچیقلیق گتیرمگه چالیشاق، اوخویوروق:

"جنبش دموکراتیک ملیتها در ایران بر محور زدودن ریشه های تبعیضات ملی هشتاد و پنج سال گذشته از یک طرف و تثبیت و استقرار جایگاه و موقعیت هویت اجتماعی ملیتها برپایه های برابر حقوقی و پلورالیسم ملی میباشد. در چنین نگرشی هیچ ملیتی بر دیگری برتری ندارد، همه ملیتها بصورتی برابر حقوق از امکانات تعالی هویتی، تاریخی، فرهنگی، اجتماعی، زبانی، اقتصادی و غیره برخوردار خواهند بود. چنین نگرشی امکان آن را فراهم میکند که ملیتها در روابطی عادلانه و برابر با همدیگر، بصورت ملیتهای برادر بتوانند نزدیکترین مناسبات همزیستی در کنار همدیگر را همچنان به تداوم هزاران سال گذشته درکنار همدیگر ، ادامه دهند"[2].

اوسته کی گؤروش "ننه من غریبم" دئیه دنیز ایشچی اؤزونو منسوب بیلدیگی"سازمان فداییان خلق ایران- فارس" تشکیلاتینا آدرئسلنمیش گؤوش ساییلار. دئمک، بو گؤروش صاحابینه گؤره "سازمان فداییان خلق ایران-فارس" تشکیلاتی ایراندا حقوق برابرلیگینی مرامنامه سینده قبول ائدر و بیر آماج کیمی اؤز پروقرامیندا بو گؤروشلره خرمن وعده سی کیمی یئر وئررسه، کئچمیشده روسیه کمونیست پارتیسی کیمی ایران ممالیکی محروسه سینه حاکیم کسیله بیله جک بیر تشکیلات اولاجاق گؤرونر. بو حقوق برابرلیگیندن دم ووران ذاتلار میللی منسوبیت، دیل و مدنیت آچیسیندان اؤزلریندن هئچ بیر اراده سرگیله مه دن و اؤز دوشونجه لری اساسیندا آذربایجان تشکیلاتی یاراتمادان آرزو ائتدیکلری "... اولارسا، اولاجاق (برخوردار خواهند بود)" دئیه بعضی مسلمانلارین "انشاالله، ماشاالله" حئکایه لرینی خاطیرلاتمیش اولارلار. بیر چوخ مسلمانلار دا مریضه داوا درمان ائتمک یئرینه نذر و نیاز ائتمکله هر هانکی بیر مریضلیگین آرادان قالدیریلماسینی آرزو ائدرکن "انشالله ماشالله" ایفاده لرینی ده دیلدن قاچیرمازلار. گؤروندوگو کیمی بو ذاتلار اؤزلرینی اؤنجول و ایرلی گؤروشلو حئساب ائتدیکلرینه باخمایاراق توپلوم و اجتماع مسئله لرین یئرینده و اونا یؤنه لیک تشکیلات یاراتمادان فارس تشکیلاتلارینا آدرسلدیکلری آرزو و ایستکلرینی سیرالاماقلا چاره یولو تاپماغی اؤزلرینه بیر وظیفه حئساب ائدرلر.  گئنه ده اوخویوروق:

"هر بینشی که از سیاست برابر حقوقی ما بین ملل عدول کرده و اقدام به نفی هویت تاریخی، فرهنگی دیگر ملیتها پرداخته و آنها را بصورت "اقوام" و"اقلیتها" و غیره در درون چهارچوبه ایران پارسی و آریایی ارزیابی میکند، نه تنها به برابر حقوقی ملیتها و سیاست همزیستی آنها در کنار هم بر مبنای یک دیالوق پلورالیسم ملی اعتقاد ندارد، بلکه یک سیاست و نگرش تبعیض گرانه پدرسالارانه را تبلیغ میکند"[3].

اوسته گؤروندوگو کیمی دنیز ایشچی بو سؤزلری عایید اولدوغو تشکیلاتداکی دوستلاری بو سؤزلردن درس چیخارماق اوچون دئییل، یالنیز باشقالارینا ائشیتدیرمک و فارس راسیستلیگینه عوامفریبلیک زمینه سی یاراتماق اوچون سیرالامیش مقامدا یئر آلارلار. ترس دورمدا بو دئییلمیش ایفاده لره اینانان ذاتلار ایلک اؤزلریندن باشلامالی و اؤز دوشونجه و دونیا گؤروشلرینه و میللی منسوبیتلرینه اویقون تشکیلاتلار یاراتمالیدیرلار. تشکیلات یاراتماق دا فارس تشکیلاتی نین آذربایجان تورکلرینی اسارته چکمک اوچون "فداییان خلق ایران-فارس شاخه آذربایجان"، و و ... دئییل، آذربایجان دیل و مدنیتینی اساس گؤتورموش و  آذربایجان تورکلری آراسیندا  موستقیل بیر گؤروشو تمثیل ائدن بیر تشکیلات اولمالیدیر. دئمک، ایران ممالیکی محروسه سینده حقوق برابرلیگینه اینان ذاتلار اؤز میللتلری اوچون دونیا تشکیلاتلاری کیمی موختلیف و مستقیل تشکیلاتلارین یارانماسینی قبول ائتمه لی و زامان کئچمه دن اؤزلری ده اؤز گؤروشلرینه اویقون میللی، سیاسی و اجتماعی تشکیلاتلارینی یاراتماغا چابا گؤسترمه لیدیرلر. دئمک، حقوق برابریلیگی شعارینی اورتایا آتان ذاتلار ایلک اؤنجه اؤزلری نین هارادا دوروب و هارایا باخدیقلارینی و کیمه دانیشدیقلارینی دا نظره آلمالیدیرلار. ترس دورومدا عوامفریب بیر ماللا نین شام غریبان حئکایه سینی یئنیلمکدن باشقا یئنی بیر گؤروشلر اورتایا آتمیش گؤرونمزلر[4]. دئمک، اؤز یازدیقلارینا عمل ائتمگن ذاتلار  روسیه کمونیستلیگینده اولدوغو کیمی خالقلارین قارداشلیغینی دیلده قلمه آلدیقلارینا باخمایاراق عملده ایسه روسیه و فارس ایستعمارچیلیغی نین خیدمتینه آلینمیش قوللار ساییلارلار.

ده ده اوستونلوگو (پدرسالارانه) مسئله سینه گلدیکده بو مسئله هر هانکی بیر مللیتین حاکیمیت سیستیمی و اونون  تشکیلاتلاری طرفیندن باشقا بیر میللت یوخسا میللتلره اعمال ائدیلمیش ایستعمارچیلیق سیاستی دئییل، بو مسئله بیر جامعه ده کیشیلرین قادین و اوشاقلارا قارشین اوستلندیگی اوستونلوک ایله ایضاح ائدیلمه لیدیر. گؤروندوگو کیمی بو باخیمدان دا دنیز ایشچی ایمضاسی ایله مقاله یازماغا چالیشان ذات ایپین اوجونو ایتیرمیش ساییلار. گئنه ده اوخویوروق:

موضوع دیگر این است که بخاطر بیش از هشتاد و پنج سال سیاست اعمال هژمونی ملّی آریایی بر ملیتهای دیگر که از زمان یکه تازی استعمار انگلیس در ایران بعد از پیروزی انقلاب اکتبر روسیه و تلاشی استعمار روسیه تزاری شکل گرفت اعمال میشد، چنین بینشی بعنوان بخشی از "دی ان ا" زندگی روزمره زندگی سیاسی اجتماعی ما تبدیل گردیده است ... این رفتارها تبعیض گرانه، نژادپرستانه، ضد بشری و غیر انسانی بخاطر تکرار هشتاد و چند ساله شکل عادی و نورمال بخود گرفته و متاسفانه هنوز بصورت بخشی از فرهنگ سیاسی ما به زیست خود ادامه میدهد [5].

تاریخی مقاملارا گئرچکچیل (واقع بین) یاناشماق گرکلی ساییلارکن گؤروندوگو کیمی دنیز ایشچی ذات عالی ایستر مسئله نین ماهیتینی بیلمه دن، ایسترسه ده فارسچی آخینلارین گؤروشونو یئنیلمگه چالیشاراق بیر عوامفریب کیمی تورکلرین فارسلیق دوستاغینا توتولدوقلارینی یوزماغا چالیشار. دئمک، آذربایجان تورک آیدینی اؤز میللی ریسالتینی باشا دوشمه لی، دیل و مدنیت آچیسیندان آتا بابالاری نین تاریخ بیلینجیندن یوخسول اولدوقلارینی اجتماعیتده قابارتماسا دا گؤز اؤنونه آلاراق اونلار ائتدیکلری خطالاری بیر داها چئینر توپور ائتمکدن واز کئچمه لیدیرلر. دئمک، بیر چوخ اؤزلرینی آیدین حئساب آذربایجان تورکلری، او جومله دن حیدر عمی اوغلولار، سید حسن تقی زاده لر، حسین کاظمزاده (ایرانشهر)، تقی ارانی، صادق رضازاده شفق و احمد کسرویلر، محمد مصدق السلطنت و اونلارین آردیجیللاری اؤزلرینه تورک دیل و مدنیتینی اساس گؤتورموش محفللر، میللی و مدنی تشکیلاتلار یاراتمادان فارسلارا تشکیلاتچیلیق درسی وئرمه لریندن و فارس شخص و تشکیلاتلارینی ایران ممالیمی محروسه سینده کی میللیتلره بیر بلا عامیلی کیمی حاکیم ائتمکلریندن هر بیر آذربایجان تورکو عیبرت درسی آلمالیدیر. دئمک، آذربایجان مشروطه حرکاتی زامانی تورکلوک علیهینه یؤنلمیش روسیه و انگلیس ایستعمارچیلیغی عثمانلی و قاجار امپراتورلوقلاری علیهینه ده اولدوقلارینا باخمایاراق تورکیه تورک آیدینی میللی بیلینجه یییه (صاحیب) اولدوغو  اوچون دیزه چؤکموش عثمانلی امپراتورلوغو  یئرینه تورکیه تورک جمهوریتینی قورارکن، میللی بیلینچدن یوخسول آذربایجان تورکلری قاجار ایمپراتورلوغونو ساپ و ساغلام فارس ایستعمارچیلارینا و مدنیت راسیستلرینه تحویل وئره رک آلدانمیش کواکب اولدوقلارینی و فارسلیغا نؤکرلیک دوروما دوشدوکلرینی اورتایا قویاراق ایران ممالیکی محروسه سینده تورکلوگو یوخ ائتمه نی ده اؤزلرینه میللی شرف حئساب ائتمیشلر. مسئله بونلا دا سونوجلاناجاق و سونا چاتاجاق دئییل، بوگون ده فارس تشکیلاتلاریندا پادوچولوق ائتمه نی و تورکلوگه خور باخمانی اؤزلرینه میللی شرف سایانلارین سایی هئچ ده آز دئییل. دئمک، مقاله یازار و سیاسی مسئله لری گؤتور قوی ائدرکن فارس ایستعمارچیلیغی نین آزقین و آزدیریجی تئوریلرینی منیمسمک دئییل، گئرچک تاریخ اولایلارینی گؤز اؤنونه آلاراق فیکیر یئریتمه لی ییک. ترس دورومدا میللی کیملیک باخیمیندان حنامیزین بویاق و رنگی توتماز ساییلاجاق. دئمک، سازمان فداییان خلق ایران- فارس تشکیلاتینا "ننه من غریبم" مقاله سی یازماق دوزگون یول دئییل، تورک کیملیگینی اساس گؤتوره رک اؤز دوشونجه و دونیا گؤروشوموزه اساسن آذربایجان تشکیلاتلارینی یاراتماق مسئله نین چیخیش یولو ساییلمالیدیر. برابرلیک دنگه لری تشکیلاتچیلیغا اساسلانمادان، ایداره چیلیک مفکوره سی دیل و مدنیت اساسیندا میللی تملده اؤز یئرینه اوتورمادان، اوسته لیک (بعلاوه) آذربابجان تورکلری نین مسلمان (هر قوماشدان)، کمونیست (هر قوماشدان)، مجاهید، مونارشیست، سوسیال دئموکرات، لیبرال دئموکرات و و ... تشکیلاتلاری یارانمادان و ایران ممالیکی محروسه سینده کی فارسلیق اساسیندا قورولموش تشکیلاتلارداکی انسانلار اؤزلرینی میللی منسوبیت سوزکئچیندن کئچه رک پولاریزه اتئتمه دن و صفلرینی فارس ایستعمارچیلیق تشکیلاتلاریندان آییرمادان فارس دیلینده یازیب یاراتماق ایله حقوق برابرلیگی یاراتماق بیر خیال ساییلمالیدیر. دنیز ایشچی میللی مسئله نین حللینه داییر دوشونجه یئریتمک ایسترکن گئنه ده فارسلیق گؤزلوگونو تاخاراق یازیر:

"بگذارید اول به این مساله اشاره بکنم که سیاستهای دولتهای مجاور با هویت ملی واحد و همجوار میتوانند از احساست ملی این جنبشها سوء استفاده بکنند و یا روی این جنبشها تاثیرات ویژه ای بگذارند. این بستگی به بلوغ سیاسی احزاب سیاسی این ملیتها دارد که تا چه اندازه بتوانند مستقلا منافع ملی دموکراتیک مردم خویش را نمایندگی بکنند و در دام سیاستهای کشورهای همسایه و یا قدرتهای بزرگ واقع نگردند".

اوسته کی ایفاده نی نظره آلدیقدا بو گؤروشلر هر هانکی بیر آذربایجانلی نین میللیتلر مسئله سی اوزره اؤنه سوردوگو گؤروش دئییل، فارس ایستعمارچی تشکیلاتلاری نین کئچمیش 85 ایلده آذربایجان تورکلری علیهینه اؤنه سوردوکلری فارس ایستعمارچیلیق تئوریسینه اساسلانار. دئمک، برابرلیک مقوله سی دیل و مدنیتلرین حقوق برابریلیگی اساسیندادیرسا، بو مسئله نی قونشو قارداش خالقلارا نیسبت وئرمک، اونلارلا قارداشلیق باغلارینی سوردورمگین قارشیسنی آلماغا چالیشماق داها هانکی صیغه ساییلابیلر؟ باشقا دئییشله حقوق برابریلیگی فارسلیق اساسیندادیرسا، ندن یانا حقوق برابرلیگیندن سؤز آپارمانین اؤزو ده سورقو و سوآل  آلتینا آلیناجاق مقوله ساییلار. دئمک، سیاسی اولقونلوق (بلوغ سیاسی) دئیه قارداش خالقلارین اورتاق مدنیت باغلارینی کسمگه چالیشماق و اونلاری بیر بیرلرینه اؤزگه یاشاتماق یالنیز ایستعمارچی گوجلره خیدمت ائده جک بیر مفکوره ساییلار. دنیز ایشچی ایران ممالیکی محروسه سینده فارس اولمایان میللتلرین، فارس ایستعمارچیلیغینا و شیادلیغینا اویمادیقلارینا داییر یازیر:

"دو تا از علتهای اصلی تشدید چنین بیماریی از یک طرف عدم پذیرش کثیرالملله بودن ایران از طرف بعضی از سازمانهای سیاسی میباشد. اگر هم بعضی از آنها در نوشته و حرف به آن اقرار میکنند، تا به حال حاضر نشده اند این واقعیت را در برنامه ، اساسنامه و کارکردهای روزانه خویش نهادینه بکنند و عملا بر محور یک سیاست پدرسالارانه حاکمیت یک ملیت بر ملیتهای دیگر نهادینه شده و کار میکنند. این بیماری مزمن هشتاد و پنج ساله نمیگذارد تا پلورالیسم ملی در زندگی روزمره سیاسی این سازمانها، در نشریه ها، رسانه ها، ساختاربندیهای آنها و غیره نهادینه گردد"[6].

اوسته گؤروندوگو کیمی دنیز ایشچی ذات عالی نین، میللت مقوله سیندن ده آنلاغی (درکی) فارسلیق اساسیندادیر، ترس دورومدا دنیز ایشچی و اونا بنزر قوماشلار اؤز دیل و مدنیتلرینی اساس گؤتوره رک دوشونجه و فیکیر یئریتمگه چالیشمالیدیرلار. هر هانکی اؤزگه بیر دیلده مودئراتلیق ائتمکله میللی مسئله یه چؤزوم (حل) یولو تاپماق اولماز. بئله بیر دورومدا آتالار یاخشی دئمیشلر: "دگیرمن دارتیغینی دارتار، چاخ چاغا باش آغری وئرمک قالار". باشقا ایفاده ایله دئییلرسه، "سو قوشماق نیتینده اولمایانلارین سویو لیللتمکلری دوزگون گؤرونمز". دئمک، اؤزلرینی فارس ایستعمارچیلیغی اساسیندا کمونیست، سکولار، دئموکرات و دئموکرات مئاب و فارس سؤمورگه چیلیگینه تابع توتولموش میللت اوولادلارینی ایسه "خشم کور ناسیونالیست و ناسیونالیست کور" قلمه آلان ذاتلار ایشچی صینیفی ایله اوغراشسالار[7]، روحی و معنوی باخیمدان بلکه ده اؤز کؤنوللرینی اوخشایاجاق و اؤزلرینی داها راحات ارضاء ائتمیش اولاجاقلار. دئمک، سازمان فداییان خلق ایران-فارس (اکثریت) تشکیلاتی نین مرامنامه سینده "میللیتهای ایران" ایفاده سی نین یئر آلماسی، هئچ ده بو تشکیلاتین دئموکرات اولدوغونا و اولاجاغینا، میللیتلر مسئله سینه دئموکراتیک آچیدان یاناشاجاغینا بیر گؤسترگه ساییلابیلمز، بو یاناشما یالنیز او تشکیلاتلارداکی توتساق اولموش فارس اولمایان پادولارین یئتیم اوشاغ کیمی کؤنوللرینی اوخشاماغی و اونلارین مریض روحلاریندا ساکیت ائدیجی (مسّکن) رولو اویناماغی اوستلنمیش اولار. بیلیندیگی کیمی یئتیم اوشاغا دا ظاهیرده آغلایان چوخ اولار، عملده ایسه هر کس اؤز اوشاغی نین دوشونجه و فیکرینه دالار. دئمک، دنیز ایشچی ذات عالی فارسلیق اساسیندا یارانمیش تشکیلاتلارا هانکی "پلورالیسم ملی"دن سؤز آچیر اؤزو ده دئدیکلری نی تشخیص وئرمیش دئییل. دئمک، فارس تشکیلاتلارینا پادوچولوق ائده رک فارس دیلینده یازیب یاراتماقلا بو آلدادیجی ایفاده گئرچکلشه بیلمز. اوسته لیک بو داورانیشلارلا یالنیز فارس ایستعمارچیلیغی نین میللی اریتمه سیاستینی سرعتلندیرمک اولار. دنیز ایشچی میللیتلر مسئله سینی فارس تشکیلاتلاری قارشیسیندا بیر مریضلیک (بیماری) دئیه قلمه آلاراق یازیر:

"محوری ترین راه غالب آمدن بر چنین بیماری اساسی این است که سازمانهای سیاسی سوسیال دموکراتیک ، چپ دموکرات و سازمانهای سیاسی سکولار دموکراتیک که حقوق بشر و دموکراسی را جزو جدایی ناپذیر برنامه خویش اعلام میکنند، حقوق دموکراتیک فرهنگی، اجتماعی و سیاسی ملیتها را در برنامه های خویش بگنجانند. پلورالیسم ملی نه تنها باید در برنامه های آنها گنجانده شود، بلکه باید در آنها نهادینه شده و در تمام بافت ساختاری آنها به صورت کردار سیاسی روزمره بسط داده شده وعملا پیاده گردد"[8].

اؤزلرینی اوزدن ایراق آیدین حئساب ائدن عملده ایسه فارس مدنیت راسیستلیگینه یول هامارلایان ذاتلار، فارس عوافریبلیگی ایستعمارچی دؤلتلردن چکدیگی کوپونون کوپوسونو کوپیلدیکلرینی بیله درک ائتمیش دئییلر. دئمک، فارس عوامفریبلری عوامفریبلیک ائدرکن  اؤز میللی منافعلرینه گئرچکلیک و واقعیتی قوربان ائدرکن فارس ایستعمارچیلیغینا جان و باش ایله قوللوق ائتمک ایسته گن ذاتلار ایسه اونلارین عوامفریب داورانیشلارینی یئنی مفکوره دئیه بیر داها فارس شیادلارینا آشیلاماغا و اؤیرتمگه چالیشارلار. بئله بیر دورومدا خالق آراسیندا دئییلر: "دیری اؤلونو یومک یئرینه اؤلو قاییتمیش دیرینی یویور!!!". دئمک، فارسلارین بونلاری آل ائدیب آلداتدیغی یئتمز دئیه، بونلار بیزیم خالقی بئله آلدادین و اله سالین دئیه فارس شیادلارینی سوللاماغا (سبقت آلماغا) چالیشارلار. "میللی پلورالیسم" بو مو؟

دئمک، حقوق برابرلیگی فارس تشکیلاتلاری نین اساسنامه لرینده یازیلماق و اؤز عکسینی تاپماقلا دئییل، فارس تشکیلاتلاری نین ایران ممالیکی محروسه سینده کی میللیتلر اساسیندا ائتنیک دابانا بؤلونمه لری و بوتون دوشونجه و دونیا گؤروشلری اساسیندا ایران ممالیکی محروسه سینده کی میللتلرین موختلیف تشکیلاتلاری یارانماسی و فارس تشکیلاتلاری بو تشکیلاتلارین او میللتلره عایید مستقیل بیر تشکیلات کیمی قبول ائتمه لری ایله حیاتا کئچه بیلجک بیر مقوله ساییلار. دئمک، هر هانکی فارس مرکز تشکیلاتی نین آذربایجان شاخه سی دئییل، آذربایجان تورکونون دیل و مدنیتینی اساس گؤتورموش موستقیل، سیاسی و مدنی و اجتماعی تشکیلاتلار یارانمالیدیر دئیه دوشونمه لی ییک. فارس ایستعمارچی تشکیلاتلاری نین فارس اولمایان بؤلگه لرده شاخه و بوتاقلاری قورومادان و بو انسانلار اؤز میللی منلیک و کیملیکلرینه جلب اولمادان و اؤز دوشونجه لرینه اویقون تشکیلاتلار یاراتمادان بوراداکی خالقلار خوش گون گؤره جک دئییل دوشونجه سینی هر بیر آذربایجان آیدینی اؤز قولاغینا سیرغا ائتمه لیدیر دئیه دوشونمه لی ییک.

 

 



[1]     مهاتما قاندییه گؤره: وارلی نین واری نین چئوره سینه جهنم دئیه اوددان بیر دووار هؤرولموش. بو دووار اؤزلوگونده گؤرونمدیگینه باخمایاراق وارلی نین وارینا اوزانان اللری یاندیریب یاخار.

[2]   دنیز ایشچی، سند آماجها و دیدگاهها و مساله ملی: http://www.kar-online.com/wp/?p=18245

[3]   دنیز ایشچی، باخ اورادا.

[4]  گونلرین بیرینده بیر ماللا محرم آیی نین اونو، عاشورا گونونده، "شام غریبان" دئیه منبرده کربلا اولایلارینی ساده انسانلارین گؤز اؤنونه سرگیله مه و بوگون امام حسین بالالاری دوشمن الینده یئتیم  و اسیر دوشموش دئیه ائولرده چیراغ یاندیرمانین حرام اولدوغونو و شام یئییب ایچمه نین حرام اولدوغونو جماعته ایناندیرماغا چالیشار. سونرا ائوه شام یئمگه گله رک خانیمیندان شام ایستر. خانیم ماللانین اؤز دئدیکلرینه اساسن شام بیشیرمه دیگینی ایفاده ائدرکن، ماللا جماعتی اله سالدیغینی و بوگون یئمک یئمه نین 1350 ایل بوندان اؤنجه کی اولای ایله هئچ بیر ایلگی و ایلیشکیسی اولمایاجانی ایفاده ائدر. بئله لیکله ده خانیمی بیر داها گئجه گؤزو اوجاق باشینا شام بیشیرمگه گؤنده رر.

[5]  دنیز ایشچی، باخ اورادا.

[6]  دنیز ایشچی، باخ اورادا.

[7]  ایشیق سؤنمز، ساغ یوخسا سول سؤز قونوسو دئییل، دوزگون آدیملاماق سؤز قونوسو اولمالیدیر: http://az.azadtribun.net/index.php?option=com_content&view=article&id=276:2011-03-03-22-20-50&catid=1:latest-news&Itemid=56

[8]  دنیز ایشچی، باخ اورادا.

 

 

ایشیق سؤنمز، 21.03.2011