فارس ایستعمار دیلی نئجه فارس اول

شیعه لیک و ایرانیت دئیه فارس ایستعمارچیلیغی

کئچمیش دانیشیقدا علی شریعتی نین بیر فارسلیق نظریه چیسی اولاراق نئجه ایستعمارچی دوشونجه نین مستعمره و مستملکه چیلیگه تابع توتولموش توپلوملار اوزره اؤزونه یئر آچماسی، ائله جه حاکیمیت قوردوغو و حاکیم کسیلدیغی اوزره بیلگی وئردیک[1]. اوسته لیک علی شریعتی نین اینتئرناسیونالیسم ایدئولوژیلری او جومله-دن مذهب اینتئرناسیونالیسمی و کومونیست اینتئرناسیونالیسمی اوزره گؤروشلرینی اورتایا قویاراق اونلاری ایرده لمگه، تجزیه و تحلیل ائتمگه چالیشدیق. بو دانیشیقدا ایسه ایستعمارین مستعمره چیلیگه معروض قالمیش ملی توپلوملاردا اؤزونه یئر آچدیغیندان سونرا، اوراداکی یئرلی کوتله-دن حاکیم مدنیت راسیستلیگی اساسیندا بیر ائلیتین اولوشماسی و حاکیم ایستعمارچیلیغی بو ائلیتین و اوخوموش ظبقه نین دیلی ایله بیر ملی آنلاییش کیمی اورتایا قویولماسی اوزره علی شریعتی نین گؤروشلریندن یولاچیخاراق آچیقلیق گتیرمگه چالیشاجاییق. علی شریعتیدن ایستعمار و مستعمره اوزره اوخویوروق:

" ایستعمارا معروض قالمیش ملتلرده زامان کئچیدی ایله بیر صینیف و طبقه شکیل تاپار. بو صینیف و طبقه نین بوتون افتخارلاری و تاریخ آنلاییشی یئرلی خالقین عادت عنعنه سی، گلنک و گؤره نگی، حتی اولارسا، اونون مذهبی ایله دوشمنلیک اولوشدورارکن ایستعمارچی دیلی و مدنیتی دوغما و طبیعی ملی کیملیک (هویت ملی) دئیه اؤزونو ایستعمارچی قوه لر ایله بیرلیکده حاکیم ملتین ترکیب حیسسه سی دئیه ایضاح ائتمگه چالیشار. بو طبقه اؤز شوقو، ذوقو و مسئولیت حیسی ایله اؤزونو ایستعمار ایله اؤز ملتی آراسیندا دلال و واسیطه قلمه آلار. بئله لیکله بو طبقه اؤز ملتی نین دگیشمه سینی بوتون زمینه لرده ملیت، مدنیت، تاریخ، عادت، عنعنه و لازیم اولارسا، یئرلی خالقین مذهب دگیشمه سی حیاتا کئچیرمگه چالیشار. قیسا سؤزله بو طبقه مدنیت ایستعمارچیلیغی رسالتینی بیر ملی وظیفه و مسئولیت دئیه اؤز بوینونا گؤتورر. شکسیز بو طبقه بو ایشی اؤزگه بیریسیندن داها یاخشی و فایدالی حیاتا کئچیرر."[2].

" مهر خبر آژانسی: شرقی آذربایجان ولایتی نین تانینمیش یازاری و شاعیری جلال محمدی دئدی: فارسچا همشه ایرانین ملی دیلی اولاراق تحمیل اولموش بیر دیل دئییل، ترسینه ایران طایفالاری و قبیله لری، عیرقلاری آراسیندا اورتاق، مشترک، عمومی و ملی دیل اولاراق تاریخ آخاریندا آخیب گونوموزه گلمیش"[4].

اوسته کی عیبارتلری اوخودوقدا قاراچیلاردان خالق آراسیندا قالمیش مثل خاطیرلانار: قاراچیدان الک نئچه-دیر دئیه، سوروشدوقدا، قاراچی دئیه رمیش: "الک وار، الک وار!!". دئمک، فارس ایستعمار محفیللری نین بئلنچی ذاتلاری آذربایجان نین تانینمیش یازاری و شاعری دئیه مطرح ائتمکلری ده او قاراچی حئکایه سینی خاطیرلادار. دئمک، "یازار وار، یازار وار!!". فارس ایستعمارچیلیغی اوچون ایسته نیلن شاعر و یازار دا ائله فارسلیغینی اساس گؤتورموش شخصلر اولابیلر. بو ایستعمار عامیللری فارس ایستعمار کاناللاری واسیطه سی ایله بیر ملی یازار و شاعیر کیمی تانیدیلاراق فارس مدنیت راسیستلیگی دوشونجه سینی بیر حمال کیمی داشیماغا وسیله اولارلار. فارس ایستعمار خبرچیلیگی "خبرگزاری مهر"، آدی چکیلن ذاتی داها آرتیق مشهور ائتمک اوچون یازمیش،اوخویوروق:

"... متن و ادبیات اوزره ده جلال محمدی نین قلمی ایله کتابلار یازیلمیش، بیر چوخ درنکلر، اؤرنک اولاراق "انجمن ادبی استاد شهریار"، "انجمن کوثر"، "انجمن جمعیت وطن" و چوخلو مدنی ایشلر او جومله-دن تبریزده ادبی قورولتایلار و کنگره لر؛ "محرم آیی نین اون ایللیک شعر" قورولتایی و کنگره سی؛ قازئته لیک آلان و زمینه لرینده مدنی هئیت باشچیسی اولاراق قافقاز و تورکیه-یه دؤلت طرفیندن گؤندریلمه سی"[5].

اوسته گؤروندوگو کیمی انسان میللی بیلینجدن یوخسول اولدوقدا، حاکیم مدنیتین راسیست بیر عامیلی و گوجو اولدوقدا، اونو بیر وسیله ائتمک، ادبی و مدنی ایلیشگیلرده اونا امکان یاراتماق، و اونو بیر وسیله ائده رک اؤز میللی کیملیگی و منلیگینی علیهینه اوندان فایدالانماق هئچ ده چتین اولماز. بو دوغرولتودا اوخویوروق:

"شرقی آذربایجان نین بو تانینمیش مدنی شخصیتی، جلال محمدی یکشنبه گونو مهر خبر آژانسینا قومیتلر مسئله سی نین طرح اولماسی، او جومله-دن سیاسی شخصیتلر طرفیندن یئرلی دیللرین اوخونماسی نین طرح اولماسی اوزره دئمیش: بو مسئله اولدوقچا حساسیت یاراداجاق بیر مسئله-دیر. بوگونه دک اؤیرتیم سیستیمینده یئرلی وقومی دیللرین اوخونماسی دئیه بئلنچی بیر مسئله یه تانیق اولمادیق. اؤیرتیم سیستیمیندن منظوروم شاه اسماعیلین قوردوغو ملی، شیعه بیرلیک حؤکومتینی قوردوغو گوندن باشلایاراق بوگونه دک دئمکدیر. سنتی – دینی اؤیرتیم سیستیمی صفویه-دن باشلایاراق پهلوی سلاله سی نین ایش اوستونه گلدیگی گونه دک یئرلی قوم و طایفا دیللری نین درس وئریلمه سی طرح اولونمامیش. قاجار حکومتی ییخیلدیقدا دا یئرلی طایفالارین دیللری نین اوخونماسی مطرح اولمامیش و انقلاب اسلامی سیستیمینده ده بو مسئله دوغرولتوسوندا دارتیشیلمامیش و بو مسئله اوزره دورولمامیش. دئمک، اسلام نظام و انتظامیندا توتولدوغو تصمیملر قومیت اساسلی اولابیلمز" [6]

اوسته گؤروندوگو کیمی اؤیرتیم سیستیمی نین بو ممالیکی محروسه-ده دوقسان اوچ ایل (1925 اینجی ایلدن) سابیقه سی اولماسینا باخمایاراق فارس ایستعمار عامیلی بو مسئله نی شاه اسماعیل صفوی و شیعه لیکله ایلگیلی گؤسترمکله مسئله نی آخار یولوندان یانلیش یولا چکمک ایستر. بئله لیکله ایکی اوزلولوگه (دو رویی) ال آتاراق بیر یاندان آذربایجان تورکلری نین چوخو شیعه دئیه اونلارین میللی کیملیک و منلیک بیلینج و شعورلارینی باسدیرماغا و تحمیق ائتمگه چالیشار، باشقا یاندان شیعه لیک و سنیلیک مسئله سی دئیه، دیل و مدنیتلر مسئله سینی دینچیلیک اساسیندا یوزماغا و مدنیت مسئله سینی دوزگون یولوندان آزدیرماغا و علی شریعتی نین توصیه و سفاریشینه اساسن فارس ایستعمارچیلیغینا آلت ائدیلمیش شیعه لیگی زامان آخاریندا عادی انسانلارین بیله گؤزوندن سالماغا و پان ایرانیستلیک و فاشیستلیک دوشونجه لرینه اساس یاراتماغا چالیشار. دئمک، اؤیرتیم مسئله سی نین کئچمیشده فارس حاکیمیت داییره لرینده مطرح اولوب اولمادیغی و شیعه لیگی فارسلیق توتساغی و فارسلیغا اویونجاق ائتمک دئییل، مسئله بوگونکو میللی و مدنی مسئله لر اوزره بیر انسان گؤزو ایله یاناشماق ساییلار. گئنه ده اوخویوروق:

"بو تبریزلی اهل بیت شاعری، جلال محمدی فارسچانین اؤزللیگی اوزره دئدی: پارسچا کئچن یوز ایللرده ملی دیل اولموش دئییل، بو دیل ایله دؤردونجو و بئشینجی یوز ایللرده فردوسی و رودکی خراساندا، نظامی و خاقانی قافقازدا، قطران و همام تبریزی آذربایجاندا، سعدی و حافظ فارس ولایتینده، بیدل لاهوری و اقبال لاهوری هندوستاندا شعر دئمیشلر. دئمک، فارس دیلی خاص بیر قوم و طایفانین دیلی دئییل، بوتون ایرانلی طایفالارین دیلیدیر"[7].

اوسته گؤروندوگو کیمی پان ایرانیست محفلینه باغلی اولان مهر خبرچیلیگی "اهل بیت" ایفاده سینی سرگیلمکله "اهل بیت" مسئله سی نین ده فارسلیق چنبره سیندن آیریلماز اولدوغونو سرگیله یه رک جلال محمدی نین ایفاده لری ایله کئچمیشده دیوان دیلی اولان فارسچانی، فارس اولمایان ائتنوسلار اوچون میللی دیل دئیه قلمه آلار. بئله لیکله جلال محمدی اللی دره نین سویونو بیر یئره ییغاراق فارس دیل و مدنیتی اطرافیندا بیر میللت آنلاییشی اولوشدورماغا چالیشارکن فارس ملی کیملیک مفکوره سی گیزلی توتماغا چالیشار. بو عوامفریبلیک زینب و کلثوم داستانلاری ایله میللت مسئله سی نی ایضاح ائدن ذاتلار، نه اوچون آدی چکیلن تورپاقلاردا هانکی مملکتلرین و میللی دؤلتلرین یارانماسیندان سؤز و صحبت آچماق ایستمزلر؟ بیلیندیگی کیمی اکبر شاه یوخسا ابوالفتح جلال‌الدین محمد اکبر آدلی موغول کوره کن حاکیم اولموش زامان، هیندوستاندا فارسچانین یانی سیرا اوردو (پاکیستانین بوگونکو اداره دیلی) ده دهلی خانلیغیندا دیوان دیلی اولماغا باشلامیش. انگلیستان ایستعمارچیلیغینا قارشین حرکتلرین نتیجه سینده هیندوستان دؤلتی 1947 اینجی ایل ایکی دؤلته آیریلمیش"

هیندوستان فئدرال دؤلتینده 1949 اونجو ایل تصویب اولموش آنایاسایا و قانون اساسی یه گؤره 14 دیل اداره چیلیک دیلی اولموشلار. 1949 اونجو ایل هیندوستاندا اداره چیلیک دیلی اولموش، دیللرین آدی بونلاردیر:

هیندی، اوردو، بنگالی، تامیل، گوجاراتی، کاننادا، مالایالام، ماراتحی، اوریا، تئلوگو، آسامییا، کاشمیری، پنجابی، سانسکریت. 1967 اینجی تصویب اولموش آنایاسا و قانون اساسینی قوروما قانون نونون 21-اینجی بندینه اساسا سِندهی دیلی ده اداره چیلیک دیلی اولموش. 1992 اینجی ایل، آنایاسا و قانون اساسینی قوروما قانون نونون 71 اینجی بندینه اساسن کونکانی، مانیپوری، نپالی دیللری ده اداره چیلیک دیلی اولموش. 2004 اونجو ایل، آنایاسا و قانون اساسینی قوروما قانون نونون 96 اینجی بندینه اساسا بودو، دوغری، مایتهیلی و سانتالی دیللری ده هیندوستاندا اداره چیلیک دیلی اولموش[8].

ایلک اولاراق شرقی پاکیستان (بنگلادش) و غربی پاکیستان هیندوستاندان آیریلدیقدان سونرا اوردو دیلینی اداره چیلیک دیلی ائتمیشلر. شرقی پاکیستاندا اوردو دیلی نین رسمی اولماسی یئرلی خالقین ناراضیلیغینا یول آچمیش. 1952 اینجی ایلین فئوریه آیی نین ییرمی بیرینده شرقی پاکیستان نین دکا شهرینده اوردو دیلی نین مخالیفلری خیابانا چیخاراق اوردو دیلی ایله مخالیف اولدوقلارینی بیلدیرمیشلر. پولیس گوناهسیز انسانلارا آتیش ائتمه سی نین نتیجه سینده یونئسکو تشکیلاتی بو گونو دونیا آنادیلی گونو دئیه اؤز تقویمینه سالمیش. بو اساسدا هر ایل فئوریه ایی نین ییرمی بیرینده دونیا آنادیلی گونو دئیه عزیزله نر. دئمک، شرقی پاکیستانداکی یئرلی خالق اوردو دیلی ایله مخالفت ائتدیگی اوچون 1971 اینجی ایل شرقی پاکیستان، بنگلادئیش آدی آلتیندا پاکیستاندان اؤز مستقیل اولدوغونو بیلدیره رک بنگال دیلی نی بنگلادئشین رسمی دؤلت دیلی ائتمیش[9].

رودکی دوغولموش تاریخی بؤیوک خوراسان نئچه جمهوریته بؤلونموش: تاجیکیستان، افغانیستان، تورکمنستان و ایران نین بیر بؤلومو. تاجیکیستاندا تاجیک دیلی، تورکمنستاندا تورکمن دیلی، افغانستاندا دری و پشتو دؤلت دیلی 5 محلی دیل اؤز بؤلگه لرینده ملی دیل اولاراق رسمیته تانینمیش. محلی ملی دیللر بونلاردیر: اؤزبک دیلی، تورکمن دیلی، بلوچ دیلی، پاشائی دیلی، نوریستان دیلی.

قافقازلار ایسه روسیه چارلیغی داغیلدیقدان سونرا 1018 اینجی ایل مستقیل اولموش و 1920 اینجی ایل روسیه کومونیستلیگی ایشغالینا معروض قالمیش. 1991 اینجی ایل آذربایجان، ائرمنیستان و گورجوستان جومهوریتلری اؤز مستقیللیکلرینی قازانمیشلار. آذربایجان جمهوریتینده تورک دیلی، ائرمنستاندا ائرمنی و گورجوستاندا گورجو دیللری حاکیمیت دیلی اولموشلار.

فردوسی نین ایران آنلاییشی ایسه، بوگونکو فارس ایستعمارچیلاری و فارس مدنیت راسیستلری یورماغا چالیشدیقلاری بوگونکو ایران ایله هر هانکی بیر ایلگی و ایلیشکییسی اولمامیش.[10] فردوسی نین ایران آنلاییشی غزنه، غزنه نین اطرافی و کابل آراسیندا کیچیک بیر جغرافی بؤلگه ساییلمیش. گئنه ده اوخویوروق:

"جلال محمدی دئدی: بیر سیرا دؤلتلر ایراندا ائتنیک قارشی دورما یاراتماق اوچون چالیشارلار. اونلار یالان ماهیتلی مقاله لر ایله فارسچانین فارسلارا عایید اولدوغونو ادعا ائدرلر. بونا باخمایاراق ایراندا فارس آدلی بیر طایفامیز یوخدور. یالنیز بیر ولایت وار. او دا ایران ولایتلریندن بیری ساییلار"[11].

اوسته گؤروندوگو کیمی کئچمیشده راسیست و نژادپرست سومکا تشکیلاتینا و محمدرضا شاهین اطلاعات وزیرلیگینه منسوب داریوش همایون[12]نون گؤروش و نظرلری، "شاعر اهل بیت" آدلاندیردیقلاری شخصین ده روحونا هوپموش و اوتورموش ساییلار. دئمک، هر هانکی بیر وارساییمدان (فارسلیق هپوتئزیندن) یولا چیخاراق نه اوچون فارس ایستعمار گوجلری فارس اولمایان دیل و مدنیتلری یوخ ائتمک ایسترلر. گؤروندوگو کیمی دوغولوش مکانی هیندوستان اولان فارسلیق، هیندوستانداکی شعبده بازلیق و قاراچیلیق (کولیلیک) مدنیتیندن یاخشی فایدالانماغا چالیشار. عوام و تحمیق اولموش توپلوملار اوچون ده بو شعبده بازلیق کولتورو، مدنیتی یئترلی و کافی ساییلار. دئمک، فارس ملی توپلومو یوخدورسا، نه اوچون بو یوخلوق ماهیتینده اولان بیر هیولا ایله ایران ممالیکی محروسه سینده کی ائتنیکلری فارسلیغا تابع توتاراق یوخ ائتمک ایسترلر؟ دئمک، فارس دیلینی "ایران دلی" دئیه قلمه آلماقلا باشقا دیل و مدنیتلری "غیر ایرانی" دئیه یوخ ائتمک ایسترلر. جلال محمدی لر ده بیر ایستعمارچیلیق عامیلی اولاراق بو وظیف یه تعیین اولونموش امیر قولو ساییلارلار. بو امیر قوللاری مختلیف اداره و اورقانلاردا فارس اولمایاراق فارسلیغی تمثیل ائتدیکلری اوچون علی شریعتی ده ایشارت ائتدیگی کیمی، فارسلیغی فارسلاردان داها دا یاخشی مدافعه ائدرلر. بو فارس مدنیت راسیستلری و ایستعمار عامیللری نین اوستلندیگی وظیفه لر فارس ایستعمارچیلیق چیخار و منافعی ایله اوست اوسته دوشر. جلال محمدی فارس ایستعمارچیلیق یوکونون آلتینا گیره رک یازار:

"اسلام انقلابیندان اؤنجه حزب توده شوروی ادبیاتیندان درس آلاراق ایرانی "چوخ ملتلی آدلادیرار و ایران خالقلاریندان صؤحبت آچاردی. اصلاحات زامانیندا دا بیر سیرا فرقه لر و اصلاحاتچی تشکیلاتلار اؤزلری اوچون "طایفالار، قومیتلر کومیته سی" یاراتدیلار. بئله لیکله اجنبی پرست یئرلی مطبوعات آذربایجاندا و باشقا بؤلگه لرده اورتایا چیخاراق ملی بیرلیک ایله دوشمنلیک ائتمگه باشلادیلار. بئلنچی مطبوعات بوگون ده ارشاد اسلامی نین حیمایتی ایله فعالدیرلار "[13].

اوسته گؤروندوگو کیمی "شاعر اهل بیت رهبری" دئیه اصلینده پان ایرانیست و فارس مدنیت راسیستی ساییلان گوجلر بوگونکو ایسلام آدینا حکومت ائدن فارس حاکیمیتی داییره لرینه سوخولاراق فارس اولمایان دیل و مدنیتلرین آیدینلارینی خاریجی گوجلره نسبت وئرمکله کئچمیشده کی فارس ایستعمارچیلیغی نین تئوری اساسلارینی قویموش محمدعلی فروغی اصفهانی و محمود افشار یزدیلری یانسیلاماغا چالیشار. دئمک، مسئله دیل و مدنیت مسئله سیدیرسه، نه اوچون فارس اولمایان دیل و مدنیتلر ایله مخالفت ائتمک ایسترلر، مسئله سیاست و فارس ایستعمارچیلیغیدیرسا، نه اوچون فارس ایستعمارچیلیغینا ایسلام دونو گئییندیره رک عوامفریلیک ائتمک و چیرکین فارس ایستعمارچیلیق نیتلرینی گیزلی توتاراق حیاتا کئچیرمک ایسترلر؟ جلال محمدی آرتیرمیش:

"...تأسف ایله بعضیلر آنایاسا و اساس قانونو اؤز سیاسی ایراده و غرضلری دوغرولتوسوندا ایرده لر و تجزیه تحلیل ائدرلر. آنایاسانین 15 اینجی اصلی آچیقچا "ایران جماعاتی نین دیلی، رسمی خطی، سندلر، یازیشمالار، رسمی متینلر، درسلیک کتابلاری فارسچادیر"، دئییر. بو جمله لرین معناسی فارس دیلی ایرانلیلارین تاریخی و ملی دیلی اولدوغو اوچون درسلیک کتابلاری فارس دیلیندن باشقا بیر دیل اولمامالیدیر. ... محل و طایفا ادبیاتی نین کیچیک بیچیمده درس وئریلمه سی درسلیک کتابی یئرینه آنلاشیلمامالیدیر. دئمک، بو مسئله آنایاسا ایله اوست اوسته دوشمز[14]. تامام ایران ملتی، طایفالار و قبیله لر یوزده یوز بو قانونا مثبت سس وئرمیشلر"[15].

جلال محمدی اؤزو آذربایجانلی اولدوغونا باخمایاراق اؤز خوشخدمتلیگینی و فارس مدنیت راسیستلیگینی آچیقچا اورتایا قویموش. دئمک، فارس اولمایان ائتنوسلار، ایستر فارس ایستعمار قوه لری و ایسترسه ده بو ائتنوسلاردان فارس ایستعمارچیلیغینا عامیل اولموش فارس مدنیت راسیستلری ایله اؤز تکلیفلرینی آییرد ائتمه لی و فارسلیق قانون اساسی نین اون بئشینجی بندی نین اجراسی دئیه "یاحسین میرحسین" و مهدی کروبی دئیه رک داها آرتیق گرک فارسلیق قوماشلارینا آلدانمایالار. آنایاسا و قانون اساسی دئیه سس وئرمک مسئله سی ایله بونلار بیر کتاب اولاراق خالقا "بلی" یوخسا "خئیر" سس وئرین دئیه تقدیم ائتمک دئماقوژیک بیر داورانیش ساییلار. دئمک، مرکز قانونلاری اوزره سس وئرمک ایکی اوصول ایله حیاتا کئچه بیلر:

1) محل یوخسا یئرلی مجلیسدن مرکزده قانون تصویب اولماق اوچون هئیئت گؤنده ریلر.

2) مرکز قانونلار محل یوخسا یئرلی دؤلتلرین مجلیسینده سسه قویولار، ملت وکیللری نین سسینی قازاندیقدان سونرا مرکز طرفیندن آنایاسا و قانون اساسی دئیه تقدیم اولونابیلر.

ترس دورومدا ساده خالق کوتله سینه بو قانون کتابینا نظرینی بیلدیر دئمک انسانلاری عوام اله سالماق و اونلاری تحمیق ائتمکدن باشقا هر هانکی بیر ماهیت داشییا بیلمز.

بو سایدیغیم دلیللره اساسن فارس حاکیمیتی و فارسلیق مجلیسینده قبول اولونموش قانونلار یالنیز فارس حاکیمیتی و فارس تمامیتچیلیگی و فارس ایستعمارچیلیغی دوغرولتوسوندا قبول اولونموش قانونلار ساییلار. مهر خبر آژانسیندان اوخویوروق:

"تبریز یازیچیسی جلال محمدی آرتیردی: آذری ادبیاتی و دیلی نین درس وئریلمدیگی ایله آذربایجانلیلارین کیملیگی یوخ اولسایدی، بو کیملیک آذری ادبیاتی و دیلی کئچمیش یوز ایللرده درس وئریلمدیگی اوچون چوخدان یوخ اولمالی ایمیش. بونا باخمایاراق آذربایجانلیلارین کیملیکلری ایران کیملیگی نین بیر بؤلومو اولاراق یوخ اولموش دئییل، گونون گوندن چیچکلنمیش. تاریخ تجربه سی بیزه آذربایجان کیملیگی نین مدرسه لرده درس وئریلمه سینه باغلی اولمادیغی ثبوت ائتمیش.." [16].

اوسته گؤروندوگو کیمی جهنمه گئدن یولداشینی چوخ ایستدیگی کیمی فارس مدنیت راسیستلری و فارس ایستعمار عامیللری ده، اؤزلرینی فارسلیق ایله ایضاح ائتدیکلری اوچون خالق آراسیندا عوامفریبلیک ائتمک ایسترلر. بو عوامفریبلیک ده فارس یایین و باسینی طرفیندن تبریزلی و آذربایجانلی آدینا انسانلارا آشیلانار(تزریق ائدیلر) و خالق اجتماعیتینی یوخلاتماغا یول آچار. جلال محمدیدن گئنه اوخویوروق:

"جلال محمدی آرتیردی: ایرانلی آذریلر فارس دیلینی اؤیرنمک ایله مکلفدیرلر. ایرانلی آذریلر اؤز اصیل، تاریخی، دینی، مذهبی و اخلاقی کیملیکلرینی ایراندان آیریلمیش قافقازداکی آذریلردن داها دا یاخشی قوروموشلار"[17].

اوسته جلال محمدی آدلی فارس مدنیت راسیستی نین "هویت اصیل" ایفاده سی نئجه بیر ایفاده دیر، اونو من ایفاده ائتمکدن اوتانارام. دئمک، ییرمی بیرینجی عصیرده آغزینداکی دیلی یازماغا، اونو ادبیات و حاکیمیت دیلی ائتمگه جسارت ائده بیلمگن توپلوم نئجه بیر بیلینجلی و شعورلو توپلوم ساییلار، بو آلدادیجی ایفاده لر هانکی مقصدلره خدمت ائدر سورقو و سوآلی نین ایضاحینی ائشیدیجیلره بوراخماق داها یاخشی اولار دئیه دوشونورم. مهر خبر آژانسیندان گئنه ده اوخویوروق:

" جلال محمدی یئنیلیکده شرقی آذربایجان نین بؤیوک سیاسی مقاملاری نین آذربایجان تورکچه سی نین اورمیه گؤلو دک اؤلومونه داییر ایفاده سی اوزره دئمیش: تأسفلر ایله تخصصوسو اولمایان انسانلارین تخصوص لازیم اولان ایشلره بورون سوخماسی جنایته یول آچار. مخصوصا او تخصوصو اولمایان شخص سیساسی و دؤلتی بیر مقامی اولارسا،.. دئمزدیم، شرقی آذربایجان اوستانداری نین بؤیوک یالان دئمیش. آنجاق بؤیوک خطا ائتمیش دئسم، دوزگون ایفاده اولونار. شرقی آذربایجان اوستانداری گرک بو خطاسی اوچون عذر ایسته سین ... آذربایجانلیلارین تحصیل آلمیش و ساوادلی نسلی غیر عئلمی و غیر واقعی و تبلیغات اساسلی سیاسی سؤزلری قبول ائتمزلر. بئله بیر شخصلر اؤز نظرلریندن، یوخسا مشاورلری نین نظریندن مسئله یه باخار و اونون مختلیف جنبه لرینی گؤرمزلر. بئله لیکله ایفاده لری غیر علمی و فقط سیاسی ایفاده ساییلار"[18].

اوسته گؤروندگو کیمی فارسلیقدا مسخ اولموش فارس ایستعمار عامیللری اؤزلرینی یانلیز عقل کل دئییل، بوتون آذربایجان تورک ائلیتینی ده اؤزلری کیمی فارس ایستعمارچیلیغینا عامیل اولماقلا ایضاح ائتمگه چالیشارلار. ائله بو اساسدا دا هرکسه بیر آغیز بوزه رک فارس ایستعمارچیلیغینا خوشخدمتلیک ائتدیکلرینی و اؤز راسیستلیکلرینی سرگیلمک ایسترلر. مهر خبر آژانسیندان اوخویوروق:

"جلال محمدی، بو شرقی آذربایجان نین مذهبی شاعیری آرتیردی: بیز بؤیوک رهبرلیک مقامی نین نگرانلیقلارینی آرادان قالدیرماق اوچون مدنی و سیاسی مسئوللارین لازیم اولان عمللری بو زمینه لرده حیاتا کئچیرمکلرینی گؤزله ییریک. علوم وزیرلیگی، تعلیم و تربیت وزیرلیگی، رادیو تلویزون رئیسلیگی، ارشاد ایسلامی وزیرلیگی و حؤکومت اورقانلاری او جومله دن شهر مسئوللاری عملی پروقراملاری حیاتا کئچیرمه لی و بو نگرانلیغی آرادان قالدیرمالدیرلار. دئمک، فارس دیلی نین ظعیفلنمه سی تامام ایران ملتی نین و بوتون ایران قوملاری و ایرانلی طایفالاری نین دیلی نین ظعیفلنمه سی ساییلار"[19].

اوسته گؤروندوگو کیمی فارس ایستعمار عامیلی جلال محمدی نین نیگرانلیق کئچیردیگی اؤز آنا دیل و مدنیتی نین یوخلوغا اوغرایاجاغی دئییل، فارس ایستعمارچیلیغی و اؤز مدنیت راسیستلیگینه قاپیلدیغی نئهیلیستلیک ساییلار.

[1] علی شریعتی، بازشناسی هویت ایرانی- اسلامی، ص. 303 - 304

[2] علی شریعتی، بازشناسی هویت ایرانی- اسلامی، ص. 303 - 304

[3] داها آرتیق بیلگی اوچون باخ: ایشیق سؤنمز، فارس مدنیت راسیستی سیدجواد طباطبایی نین گؤروشلرینه باخیش: http://www.isiqsonmaz.com/Seite%20321.htm

[4] تبریز – خبرگزاری مهر ، مصاحبه با جلال محمدی، فارسی، زبان تاریخی و ملی همه اقوام ایرانی است/ تلاش برخی جریان ها برای سیاسی کردن موضوعی فرهنگی، ۱۳۹۲/۱۲/۱۸: http://www.mehrnews.com/TextVersionDetail/2252450

[5] تبریز – خبرگزاری مهر ، مصاحبه با جلال محمدی، باخ اورادا.

[6] تبریز – خبرگزاری مهر ، مصاحبه با جلال محمدی، باخ اورادا.

[7] تبریز – خبرگزاری مهر ، مصاحبه با جلال محمدی، باخ اورادا.

[8] Sprachen in İndien (Hindustanda Dillər): https://de.wikipedia.org/wiki/Sprachen_Indiens

[9] Urdu: https://de.wikipedia.org/wiki/Urdu

[10] ایشیق سؤنمز، ایران دؤلتی و ایران دیل قوروپو آدی نین اورتایا آتیلماسی: http://www.isiqsonmaz.com/Seite269.htm

[11] تبریز – خبرگزاری مهر ، مصاحبه با جلال محمدی، باخ اورادا.

[12] ایشیق سؤنمز، فارس نئوفاشیستلری و داریوش همایون: http://www.achiq.org/yazi/sonmez%20fars.htm

[13] تبریز – خبرگزاری مهر ، مصاحبه با جلال محمدی، باخ اورادا.

[14] عرب دیلی منظور اولونار، جلال محمدیدن اوخویوروق: در مورد تدریس زبان عربی هم اصل جداگانه ای در قانون اساسی داریم و اصل 15 در ادامه می گوید "استفاده از زبان های محلی و قومی در مطبوعات ورسانه های گروهی و تدریس ادبیات آنها در مدارس، در کنار زبان فارسی آزاد است. باخ اورادا.

[15] تبریز – خبرگزاری مهر ، مصاحبه با جلال محمدی، باخ اورادا.

[16] تبریز – خبرگزاری مهر ، مصاحبه با جلال محمدی، باخ اورادا.

[17] تبریز – خبرگزاری مهر ، مصاحبه با جلال محمدی، باخ اورادا.

[18] تبریز – خبرگزاری مهر ، مصاحبه با جلال محمدی، باخ اورادا.

[19] تبریز – خبرگزاری مهر ، مصاحبه با جلال محمدی، باخ اورادا.