🔎 سورقو: مسلم یوخسا ابو مسلم کیم و هارالی و ملیتچه کیم اولموش!

🎤  جاواب: بیر چوخلاری او جمله-دن علی شریعتی مسلمی ایرانلی قلم آلماقلارینا باخمایاراق مسلم کوفه شهرینده دوغولموش، ییرمی یاشیندا المجیره بن سعد باشچیلیق ائتدیگی بیر شیعه سئکتینه قوشولموش. امویلره مخالیف اولدوغو اوچون بنی اومیه حاکیمیتی طرفیندن کوفه شهرینده توتساق ائدیلمیش. 741 یوخسا 742 اینجی میلاد ایلینده اؤزونو عباسیلره یاخین گؤسترمکله عباسیلر طرفیندن زینداندان خلاص اولاراق عباسیلرین باشچیسی ابراهیم بن محمد اونا "ابو مسلم" آدینی وئره رک بیر نئچه ایلدن سونرا اونو خراسانا، اوراداکی عرب قبیله لرینی، بنی اومیه حؤکومتی علیهینه باش قالدیرمالارینی رهبرلیک ائتمه سی اوچون گؤندرمیش. ابو مسلم خراسانا گئتدیکدن سونرا ایلک اولاراق خراسانداکی شیعه لر بیله ابومسلمی باشچیلیغا قبول ائتمه میشلر. مکه زیارتینده عباسیلرین باشچیسی ابراهیم بن محمد خراسانداکی بنی اومیه حؤکومتینه مخالیف اولان عرب قبیله باشچیلارینا ابومسلمی باشچی کیمی قبول ائتمکلرینده اصرارلی اولموش. بئله لیکله ابومسلم مرو یاخینلیغیندا یئرلشه رک عباسیلر اوچون تبلیغات ائتمگه مشغول اولموش. چوخ زامان کئچمدن ابومسلمین طرفدارلاری چوخالماغا باشلامیش.

 بیر چوخلاری ابو مسلمی ایرانلی یوخسا فارس قلمه آلماغا چالیشدیقلارینا باخمایاراق  رئالیست فارس مرلیفلر بیله ابومسلمی عرب حاکیمیتی اوغروندا ووروشموش، عباسیلره اویونجاق و وسیله اولموش بیر شخص کیمی قلمه آلارلار؛ بو دوغرولتودا تاریخچی رسول جعفریاندان اوخویوروق:

"ابو مسلم بیزیم تاریخیمیزده مهم شخصیت اولماسینا و اموی دؤلتی نین آرادان گئتمه سینه یول آچماسینا باخمایاراق اونون ایکی چتینلیگی وار ایمیش: 1- او ایران سئور بیر ایرانلی دئییلمیش، یالنیز اموی دؤلتچیلیگی علیهینه اولان خراسانداکی عرب قبیله لری نین اویونجاغی اولموش، بو آرادا ایرانلیلار  اونا وسیله اولموشلار. 2- ابومسلم علوی شیعه سی دئییل، عباسی شیعه سی اولموش و اماملارا خیانت ائتمیش، آدام اؤلدورمکده اوستا ساییلمیش و چوخلو خراسانلینی اؤلدورموش. او شیعه-چی شریک بن شئیخ حرکتینی باسقی آلتینا آلمیش و یولداشلارینی دا اؤلدورموش"[1].

 یئری گلمیشکن رسول جعفریان آدلی ذاتین دا گؤروشلری نین واقعیت ایله تمام اؤرتوشمدیگینی خاطیرلاتماق فایدالی اولار. اوسته اشاره اولدوغو کیمی  ابو مسلم  کوفه لی بیر شیعه اولاراق خوراساندا یئرلشمیش یمن طایفالاری ایله بیرلیکده خلافت اوغروندا ووروشموش  هرات، بلخ و باشقا شهرلری اله کئچیرمیش بیر شخص اولموش. 747 – 748 اینجی میلاد تاریخینده مرو شهرینی اله کئچیره رک اورانین والیسی، نصر بن سیٌاری قاچماغا زورلامیش. اوموی لر حاکیمیتدن دوشدوکلرینه و عباسیلر خلافته گلدیکلرینه باخمایاراق ابو مسلم بغداد شهرینده عباسی خلیفه لیگی طرفیندن اؤلدورولموش.

دئمک، ابومسلم بیر آرمانچی و مذهبی شخص اولاراق اؤلن بیر گونه دک شیعه لیک اوچون ووروشان بیر عرب اولموش.

🖌 ایشیق سؤنمز، 04.07.2019