ایشیق سؤنمزین اؤز کئچمیشی
1341 اینجی ایل آذربایجان نین قاراداغ بؤلگه سینده دونیایا گؤز آچمیشام. ایلک اوخولو و ابتدایی نی قورتاردیقدان سونرا درس اوخومانین یانی سیرا یایلاری تهرانا گئده رک ایشلمکله مشغول اولموشام.
1356 اینجی ایلدن تهراندا ایشله یه رک متوسطه تحصیلیمی داوام ائتمیشم. تحصیلین و ایشلمگین یانی سیرا مطالعه ائتمگی ده گؤزدن قاچیرمامیشام. احمد کسر وی نین بوتون اثرلرینی؛ جلال آل احمدین بیر چوخ اثرلرینی، او جومله-دن در خدمت و خیانت روشنفکران، غرب زدگی، علی شریعتی نین بیر چوخ اثرلرینی (تشیع علوی و تشیع صفوی کتابینی اوخودوقدان سونرا داها بو ذاتین کتابلارینا تحریم قویدوم)، مرتضی راوندی نین تاریخ اجتماعی ایران آدلی اثرلرینی،تاریخ بیهقی نی، اسماعیل رائین نین فراماسونری و فراموشخانه در ایران آدلی اثرلرینی، پطروشفسکی نین اسلام در ایران آدلی کتابینی، باقر مومنی نین یازدیغی اثرلری، توکچه کتابلاردان میرزه علی اکبر صابرین هوپ هوپنامه سینی، معجز شسبترلی نین دیوانی نی، معجز شبسترلی نین یئنی تاپیلمیش شعرلری (علیرضا نابدل بو کتابی ال یازما بیچیمینده چاپا حاضیرلامیش)، دینی تورکچه کتابلاردان عباسقلی یحیوی و ذاکر اردبیلی نین یازدیقلاری اثرلر، مختارنامه کیمی بیر چوخ کتابلاری دؤنه دؤنه اوخوموشام.
1360 اینجی ایل عسکر اولموشام. 18 آی عسکرلیگیم دنیز قوتلرینده (سرباز ناوی)، 6 آی عسکرلیگیم مراکز پشتیبانی تبریزدن گردان قدس دئیه غربی آذربایجان سرحدلرینه گؤندریلمیشم.
1362 ایکینجی ایل عسکرلیگیمی سونا چاتدیردیقدان سونرا گئنه ده تهراندا ایشلمک ایله مشغول اولموشام.
1369 (1990) اونجو ایل آلمانیانین کؤلن شهری اونیوئرسیته سی نین کالجینده ادبیات، تاریخ و جامعه شناسلیق بؤلوملرینده درسه باشلامیشام. کالجی قبول اولدوقدان سونرا گئنه ده آلمانیانین قؤتینقئن شهری نین Georg August اونیوئرسیته سینده تورکلوژی، ائتنولوژی و اسلامشناسی بؤلوملرینده قبوللوق آلاراق تحصلیه مشغول اولموشام. بو بؤلوملرده تحصیل آلارکن لاتینجه نین یئرینه عربچه درسلرینه قاتیلاراق عربیکوم سناویندان قبول اولاراق لاتین سیناویندان معافلیق آلمیشام.
بو اونیوئرسیته ده اؤنملی پروفسورلاریمدان آشاغیداکیلارین آدلارینی چکمک ایستردیم
تورکولوقلار:
Prof.DR. DR. Gerhard Doerfer
Prof. DR. Milan Adamovic
Prof. DR. Klaus Röhrborn
Prof. DR. Göckenjan
Prof. DR. Jens Laut
ائتنولوقلار:
Prof. Dr. Brigitta Benzing
Prof. Dr. Martin Rössler
Prof. DR. Klaus Hesse
ایرانشناسلار:
Prof. DR. Mackenzie
Prof. Dr. Philip G. Kreyenbroek
عربشناسلار:
Prof. DR. Nagel
Prof. Dr. Bachmann
1998 (1377) اینجی ایل درسلریمله بیرلیکده دوکترا تئزیمی باشا چاتدیرمیش و مدافعه ائتمیشم. دوکتورا تئزیم آذربایجان تورکچه سی نین قاراداغ، مغان و زنگان لهجه لرینی ایحاطه ائتمیش. دوکتورا کیتابیم پروفئسور دوکتور میلان آدام أوویچ طرفیندن 1998 (1377) اینجی ایل آلمانیانین قؤتینقئن شهرینده چاپ اولموش و آلمان اونیوئرسیته لری نین کتابلیقلارینا گؤندریلمیش.
یازدیقلاریم و چاپ ائتدیردیکلریم
- بیرینجی شعر کتابیم گولر آدیندا آذربایجان نین لاتین گرافیکاسی ایله 1993 (1372) اینجی ایل آنکارادا چاپ اولموش.
- میرزا مهدی خانین سنگلاخ آدلی الیازما تورکچه – فارسچا سؤزلوک کتابینی لاتین گرافیکاسیندا آلمانجایا چئویرمیشم، چاپا حاضئر دورومدادیر.
- رساله فضل الله آدلی چاغاتایجا- فارسجا سؤزلویو لاتین گرافیکاسیندا آلمانجایا چئویرمیشم، چاپا حاضیر دورومدادیر.
- تورکچه، موغولچا سؤزجوکلری نئچه دیللی شاه سؤزلوگو (Kings Dictionary) آدلی کتابدان چیخاراراق لاتین گرافیکاسیندا چاپا حاضرلامیشام.
بو سایدیقلاریمین یانی سیرا اؤزوم اوچون باشقا عئلمی فعالیتلریم، نقد و تنقیدی یازیلاریم دا سانال و مجازی دونیادا ایشیق اوزو گؤرمکده-دیر.
بو فعالیتلرین یانی سیرا شخصی اینتئرنئت سایتیمدا 426 تنقیدی و عئلمی مقاله لریم یئر آلماقدادیر. باخ: www.isiqsonmaz.com
ایش زمینه لرینده فعالیتلریم
1990 – 1989 (1379 - 1378) اؤیرنیم ایلینده قوزی قبرس تورک جومهوریتی نین غازی ماقوستا شهری نین دوغو آق دنیزاونیوئرسیته سینده کؤمک پروفئسور اولاراق تورک دیللریندن اولان قاراخانلی تورکچه سینی (قوداتقوبیلیکدن متنلر)، چاغاتای، قدیم آنادولو تورکجه سی، عثمانلی تورکجه سی، تورکمن و آذربایجان تورک دیللرینی درس وئرمیشم.
1381 - 1379 ایللرینده آزاد دیلماچ و ترجومه چی اولاراق آلمانیانین گؤتینقئن شهرینده چالیشمیشام.
1382 ایلینده اینتئرناسیوناله بوند آدلی بیر شیرکتده آلمانیانین کؤلن شهرینده اداره چیلیک ایشی ایله مشغول اولموشام.
1383 ایجی ایلدن گئنه ده بیر دیلماچ و ترجومه چی کیمی چالیشمیش و یاشاییشیمی ایداره ائتمیشم.
2007 اینجی ایلدن 2010 ایلین سونونا دک کؤلن شهرینده Rautenstrauch Joest Museum موزه سینده علمی ایشلر ایله مشغول اولموشام.
2011 اینجی ایلدن گئنه ده دیلماچ و ترجمه ایشلری ایله مشول اولموشام.
2015 اینجی ایل، بیر ایللیک بیر تجارت دؤره سی گؤرموشم.
2016 اینجی ایل بون شهرینده آلمان صلیب سرخ تشکیلاتی نین، اجتماعی مسئله لر ایله مشغول اولاراق چالیشمیشام.
2017 و 2018 اینجی ایل لئویرکوزن شهرینده سوسیال دئموکراتلارین، اجتماعی مسئله لر ایله مشغول اولان موسسه لرینده ایشه مشغول اولموشام.
2018 اینجی ایلین اونونجو آییندان کؤلن شهرینده ASB آدلی تشکیلاتین، اجتماعی مسئله لر آدلی مؤسسه سینده ایشه مشغولام.
ائویلی یم، ایکی اوغلوم وار.
ایشیق سؤنمز، 26.07.2019