نقد ائتمک مسئله سی!

هر زامان ایشاره ائتدیگیمیز کیمی نقد مسئله سی سئلمه آتماق و قوش قوشلاماق داورانیشی دئییل، قارشی طرفین یازدیغی متنی ده هر هانکی بیر اوخوجونون قارشیسینا سرگیله رک بو اساسدا نظر بیلدیرمک گؤزل بیر داورانیش ساییلار. بئله لیکله ایستر اوخوجو و ایسترسه ده ایراد صاحابی خطاسینی دوزتمگه چالیشماقلا توپلوم و جامعه نین عئلمی باخیمدان گلیشمه سینه یول آچیلمیش اولار. بو دئدیکلریم بیر یانا دورسون ایچریده کی دوستلارین خواهیشی ایله قیسا "ایشیق سؤنمزین اؤز کئچمیشی" دئیه بیر مطلب یازدیم. بو یازیلمیش مطلبیمه ایمضاسیز "توغای" آدلی تلگرام کانالی مناسبت بیلدیرمیش. کانالین هانکی محفله باغلی اولدوغو بللی اولمادیغینا باخمایاراق @turk_milli_hereketi بو کانالین تانیملاماسی ساییلار. بو آدین نقدر دوغرو، یوخسا یالان اولدوغونو بیلمدیگیمیز اوچون بو دوغرولتودا دانیشماق دا یئرسیز ساییلار. یئری گلمیشکن یازیما بیلدیرمیش موناسبتدن اوخویوروق:

"آقای ایشیق سؤنمز در متن بیوگرافی خود،... لیستی از کتابهایی که مطالعه نموده اند را ارائه کرده است. بگذریم که کتابهایی که از آنها نام برده، کتابهایی معمولی است که همه آنها را مطالعه مینمایند و خواندن آنها برای یک دکترای تورکولوژی افتخار محسوب نمیشود"[1].

اوسته کی مطلبی هر هانکی بیر اوخوجو بو مطلبی اوخورسا، بو کتابلاری من دوکتورامی یازارکن اوخودوغومو و یازدیغیم دوکترا رساله سی ده بو سایاق بیر رساله اولدوغونو باشا دوشمه سی هئچ ده یانلیش ساییلماز. یئری گلمیشکن توغای کانالی اشاره ائتدیگی مقامی اؤز کئچمیشیمدن بیر داها اوخویاق:

"1356 اینجی ایلدن تهراندا ایشله یه رک متوسطه تحصیلیمی داوام ائتمیشم. تحصیلین  و ایشلمگین یانی سیرا مطالعه ائتمگی ده گؤزدن قاچیرمامیشام. احمد کسر وی نین بوتون اثرلرینی؛ جلال آل احمدین بیر چوخ اثرلرینی، او جومله-دن در خدمت و خیانت روشنفکران، غرب زدگی، علی شریعتی نین بیر چوخ اثرلرینی (تشیع علوی و تشیع صفوی کتابینی اوخودوقدان سونرا داها بو ذاتین کتابلارینا تحریم قویدوم)، مرتضی راوندی نین تاریخ اجتماعی ایران آدلی اثرلرینی،تاریخ بیهقی نی،  اسماعیل رائین نین فراماسونری و فراموشخانه در ایران آدلی اثرلرینی، پطروشفسکی نین اسلام در ایران آدلی کتابینی، باقر مومنی نین یازدیغی اثرلری، توکچه کتابلاردان میرزه علی اکبر صابرین هوپ هوپنامه سینی، معجز شسبترلی نین دیوانی نی، معجز شبسترلی نین یئنی تاپیلمیش شعرلری (علیرضا نابدل بو کتابی ال یازما بیچیمینده چاپا حاضیرلامیش)، دینی تورکچه کتابلاردان عباسقلی  یحیوی و ذاکر اردبیلی نین یازدیقلاری اثرلر، مختارنامه کیمی بیر چوخ کتابلاری دؤنه دؤنه اوخوموشام. 1360 اینجی ایل عسکر اولموشام"[2].

اوسته گؤروندوگو کیمی اؤزونو "تورکچو" قلمه آلان کانال مسئولو متن نقد ائتمک اوصولوندان عدول ائده رک من تهراندا بیر ایشچی اولار و درس اوخورکن، مطالعه ائتدیگیم کتابلاری اوخوجولار اوچون بیر آکادئمیک ساحه یه یوکستمگه و منی ساوادسیز قلمه آلماغا چالیشمیش. اوسته وئریلمیش تاریخلردن ده بللی اولدوغو کیمی بو مقاملار منیم ساده جه بیر مدرسه محصلی و 15- 18 یاشلاریندا اولارکن ایشله یه رک درس اوخودوغوم یاشامیمی ایچرمیش بیر مقام ساییلار. گئنه ده اوخویوروق:

"همچنین در ادامه در بخش «یازدیقلاریم و چاپ ائتدیکلریم» نام چند کتاب را آورده که متوجه میشویم فقط یک کتاب از ایشان به چاپ رسیده که آن هم کتاب شعر است. (اشعاری بدون ارزش ادبی و بسیار سطح پایین). در مقابل بقیه کتابها عبارت «چاپا حاضیرلامیشام» قید گردیده که نشان میدهد ایشان در طی سالهای دراز فعالیتشان موفق به چاپ هیچ کتابی نشده اند و فقط برای خالی نماندن عریضه نیاز داشته اند که نام چند کتاب را بیاورند. (بعد از چاپ احتمالی کتب مذکور، سطح علمی! آنها مشخص خواهد شد"[3].

گئنه ده بو دوغرولتودا منیم اؤز کئچمیشیمدن اوخویوروق:

" بیرینجی شعر کتابیم گولر آدیندا آذربایجان نین لاتین گرافیکاسی ایله 1993 (1372) اینجی ایل آنکارادا چاپ اولموش.

- میرزا مهدی خانین سنگلاخ آدلی الیازما تورکچه – فارسچا سؤزلوک کتابینی لاتین گرافیکاسیندا آلمانجایا چئویرمیشم، چاپا حاضئر دورومدادیر.[i]

- رساله فضل الله آدلی چاغاتایجا- فارسجا سؤزلویو لاتین گرافیکاسیندا آلمانجایا چئویرمیشم، چاپا حاضیر دورومدادیر.

- تورکچه، موغولچا سؤزجوکلری نئچه دیللی  شاه سؤزلوگو (Kings Dictionary) آدلی کتابدان چیخاراراق لاتین گرافیکاسیندا چاپا حاضرلامیشام.

بو سایدیقلاریمین یانی سیرا اؤزوم اوچون باشقا عئلمی فعالیتلریم، نقد و تنقیدی یازیلاریم دا سانال و مجازی دونیادا ایشیق اوزو گؤرمکده-دیر"[4].

اوسته کی اثرلر موضوع اولدوقدا، بو  اثری گؤرمدن و بیر آکادئمیک اولاراق بو اثرلری گؤزدن کئچیرمدن و شخصین مالی ایمکانلارینی نظره آلمادان بئله بیر دوشونجه و فیکیر یئریتمکلر ادبیاتچیلیق و تحقیقاتچیلیق عالمیندن اوزاق گؤرونر. دئمک، هر سؤزون یئری، هر دانیشیغین دا مکانی وار.

اوسته ایشاره اولوندوغو کیمی بو کانال مجازی دونیادا بیر حقیقی و  حقوقی بیر شخصه سؤیکنمدیگی اوچون موناسبت ده بیلدیرمک ایستمزدیم. آنجاق بیر چوخلاری و اوجومله-دن بو کانال مسئولونا دا بیر عبرت درسی اولسون دئیه نظریمی بیلدیرمه نی ده واجیب بیلدیم. هدف بیر بیریمیزی کیچیتمک و دوشونجه باخیمیندان تئرورا معروض قویماق و نظردن سالماق دئییل، هدف بیربیریمیزدن اؤیرنمک اولمالیدیر.

ایشیق سؤنمز، 29.07.2019