امام زامان غائب اعلان اولدوقدان سونرا شیعه لیک




شیعه اینانجینا گؤره بوتون مسلمانلیغین قانونی باشچیسی امام مهدی ساییلار. 873- 874 میلاد ایلیندن باشلاراق شیعه اینانجینا گؤره حضرت محمدین مسلمانلار آراسیندا داها گؤزه گؤرونن وارثی ساییلان بیر امام یوخدور. روایتلره گؤره غایب امام 941 میلاد ایلینه دک رابیط انسانلار واسیطه سی ایله شیعه لیک عالمی ایله رابیطه-ده اولماسینا باخمایاراق، او تاریخدن اعتبارا بؤیوک غایبلیک (الغیبت الکبری) عزمینده بولوناراق غایب امام ایله امت آراسیندا هر هانکی بیر رابیط یوخدور. بئله لیکله شیعه عالیملری شیعه لیگین بیر مذهب اولاراق داوام ائده بیلمه سی و شیعه لیگه روح باخیمدان صلاحیتلی باشچیلیق ائتمک اوچون، آیری بیر مودئل گلیشدیرمه لی اولدولار. دئمک، شیعه لیک تاریخی مجادله ایله دولو بیر تاریخ ساییلار.

شیعه نظریه سینه گؤره، امام زمان محمد پیغمبرین قانونی صلاحیتلی نماینده سی اولاراق یئر اوزرینده عدل و عدالتین حاکیم اولماسینی تضمین ائده جک بیر حاکیم اولاجاقدیر. امام زمان هرهانکی بیر نائب بللی ائتمدیگی و آیریلارکن اونون آدینا چیخیش ائدن شخصلری متقلب قلمه آلدیغی اوچون، شیعه لر هر نوع حاکیمیت آنلاییشینی امام زامان غایب اولدوغو زامان ایچریسینده پرئنسیب اعتباری ایله سالدیرقانلیق و زوراکیلیق حئساب ائدرلر. شیعه لیگین بو تیتیزلیک (سختگیرانه) موضع سی سنی اولان عباسی خلیفه لیگی زامانیدا دا داوام ائتمیش. شیعه لره گؤره، عباسی خلیفه لیگی حقیقی مؤمنلری ظولمه تابع توتان و اماملاری شهید ائدن اولموشلار. شیعه عباسی خلیفه لیگینه قارشین بیر آزلیق مخالیفت اولماسینا باخمایاراق حاکیمیته گلمه سی اوچون ده هرهانکی بیر پلانی (برنامه سی) اولمامیش و حاکیمیتچیلیکدن راحاتجا اوزاقلاشمیش. شیعه بیر فرقه اولاراق امت قورولوشونو اؤزو اوچون یاراتماز و صلاحیتلی شخص دئیه بیر مرکزه تابع اولمازسایدی، گونوموزه دک چتین یاشامینا داوام ائده بیلردی.

 شیعه نظریه سینده محلی جمعین باشچیسی تک باشینا بللی بیر عمللری یئرینه یئتیرمک حاقینا مالیک ایمیش. بو عمل و تکلیف محمد پیغمبر طرفیندن مدینه-ده یئرینه یئتیریلمیش عمللر ساییلیردی. او جامع نامازی قیلاندا مسلمانلارین باشچیسی، خطبه اوخویان، ساواش زامانی اجتهاد ائدن، اختلافلاری آیدینلاشدیرماغا قاویشدیران، محکمه ائدن، مجازات تعیین ائدن، مجازاتی حیاتا کئچیرمگه بویوروق وئرن و امت طرفیندین یوخسوللار اوچون دایانیشماق (همبستگی) آدینا وئریلن وئرگینی (ذکات) آلان ساییلاردی. بو سایدیقلاریمیزین یانی سیرا حضرت محمد دین و سیاست باشچیسی مسئولیتینی ده اؤزو ایله داشیردی (ائلچی گؤندرمک، گلن ائلچیلری قبول ائتمک، اؤزگه و بیگانه گوجلر ایله آنلاشمالار ایمضالاماق).

 پیغمبرین قانونی نائبی، امام زامانین غایب اولماسی ایله بو عمللرین یئری بوش قالمادیغینا باخمایاراق، آنجاق اونلاری یئرینه یئتیرمک بلیرسیز بیر زامانا کیمی (امام زامان قاییدان گونه کیمی) دوردورولدو (متوقف اولدو). بئله بیر حالدا سیاسی سورچ و پروسه لردن اوزاق قالمیش بیر فرقه اولاراق شیعه باشچی (امامی) نین بعضی ایشلَولری (عمل کرد) مصرفسیز قالدی. شیعه لر هر هانکی بیر دؤلت ایله معامله سی ائتمه دی، ساواش آپارمادی و محکمه ده شیعه لرین الینده اولمادی. بئله بیر وضعیتده بیر چوخ سورقو و سوآللار اورتا چیخدی:
-امام زامان غائب اولدوقدا دینی فرائضلر (ناماز، جمعه خطبه لری، ذکات) نئجه اولسون؟
-ذکات وئرمک، خمس وئرمک ده غائب امام گلن گونه دک دوردورولسون مو؟
-بئله بیر وضعیتده کیم دول قادینلارین و یتیم اوشاقلارین قایقیسینا قالمالیدیر؟

 ناماز مسئله سی قرآندا یازیلدیغی اوچون، اونو حل ائتمک اولدوقچا راحات بیر مسئله ساییلاردی. هر بیر مسلمان، باشچیسیز (امامسیز) ناماز قیلماغا مسئول ساییلاردی. آنجاق جمعه خطبه لری و وئرگی آلماق (ذکات و خمس) اولدوقجا چتین بیر مسئله ساییلاردی. بو ایشلر شیعه لر اعتماد ائتدیگی بیر شخصه احاله اولونمالی ایدی. بو شخص کیم اولمالی ایدی؟ بو ایشلری کیمه اعتماد ائتمک اولاردی؟

 شیعه عالیملر بو سورقو و سوآللارا جاواب تاپماغا چالیشارکن مذهبی و حقوقی مسئله لره اؤزلری مسئول اولدوغو کیمی بو مسئولیتی (خمس و ذکات آلمانی) دا اؤز بویونلارینا آلدیلار.

قایناق:
1)Heinz Halm, Der schiitische Islam, München, 1994

ایشیق سؤنمز، 25.12.2021