فارس باستانگرایلاری نین تویوغو بیر قیچلی تانیملامالاری!
بیلیندیگی کیمی اینسان توپلولوقلاری (ایجتماعیتلری) تاریخ بویو قونشو و باشقا توپلوملاردان اؤرنمیش، بعضاً دین و مدنیت باخیمیندان باشقا تولوملارین تأثیر داییره سینه و یا حاکیمتی آلتینا کئچمیشدیر، بعضاً ایسه تاریخ سورجینده او دیل، دین و مدنیتلری قبول ائده رک اؤز کئچمیشیندن آیریلماق زوروندا قالمیشدیر.دئیه دوشونمه لی ییک. دئمک، دیل و مدنیتلر اوزره فیکیر یئریتدیکده هانکی توپلوم باشقا توپلوملاردان داها اوستون اولدوغونو دئییل، تاریخی دؤنگه لرده هانکی دیل و مدنیتلر، هانکی آشامالاردا بیر- بیرلری ایله امکداشلیق ائتمک ساحه سینه یوکسلمیش و یا هانسی سی باشقا بیریندن اوزاقلاشاراق آیری بیریسینه داها یاخینلاشماق و اوندا اریمک مجبوریتینده قالمیش و یا یاخینلاشماق ایسته یینده اولموش دئیه مدنیت فرقلیقلارینی و اورتاقلیقلارنی اله آلماغا داییر توپلوملاردا فیکیر یارانماق دوغرولتوسوندا دوشونملی ییک. بونلارا باخماراق اؤزلرینی ایران ممالیکی محروسه سینده کی میللتلرین ولی و وصی سی و فارس دیل و مدنیتی نی ایران ممالیکی محروسه سینده حاکیم ساخلاماغا دوشونن و دوشونجه لرینی دین باخیمیدان اهورا مزدا و زردوشت و ائتنیک باخیمدان کوروش و داریوش ایله اساسلاندیرماق ایسته گنلر تاریخین دولاشیق یوللارینی گؤزدن کئچیردیکده، تاریخی دنگه لره دئیینمه لرینه باخمایاراق باستانگرایلیق ذهنیتی گؤزلری نین اؤنونو توتدوغو اوچون تاریخی دؤنگه لرده کی دییشیکلیکلری گؤرمزدن فیکیر یئریتمه گه چالیشیرلار. بو ذاتلاردان بیری ده مزدک بامدادان ایمضاسی ایله کئچمیش یازیلاریندا (باخ: 1، 1.1 و 1.1.1) و آشاغیدا بعضی پاساژلارینی اوخویاجاغیمیز یازیدا تورک و عربلرین دیل و مدنیتلرینه سایقیسیزلیق ائتدیگی نین تانیغی اولاجاییق، اوخویوروق:
" ما ایرانیان پس از شکست در برابر مسلمانان، بدست کشندگان نیاكان خود پرورش یافتیم و هزار و اندی سال بر این پندار نادرست ماندیم که پدر و مادری جز آنان نداشته‌ایم. راهزنانی که دستشان بخون پدر و مادر ما آلوده بود هر آنچه را که نشانی از آنان داشت نابود می‌کردند و اگر نبودند فرزندان فرهیخته و از جان گذشته این خاندان، که برایمان از شکوه فراموش شده خانه بگویند، از دانش، هنر و مهرِ مادر و از فرزانگی و بزرگمنشی پدر، از آزادگی و سرفرازی نیاگان و از خرمی و سرسبزی زادگاهمان، شاید که ما نیز چون نوادگان "اِشناتون" و "نوفره ته ته"(١) شکوه و بزرگی سرزمین نیاگانمان را از یاد برده بودیم، پذیرفته بودیم که هیچگاه پدرانی بجز عمر و ابوبکر نداشته‌ایم و هیچگاه بزبانی جز عربی سخن نگفته‌ایم و آنگاه بجای آنکه نام پرشکوه و زیبای "ایران" را بر سرزمین خود بنهیم، آنرا «جمهوریه العربیه ...» می‌نامیدیم."(2).
اوسته گؤروندوگو کیمی موألیف بورادا کئچمیش تاریخ دؤنگه لرینه دئیینرکن ایسلامدان اؤنجه کی، او زامانکی ایران ممالیکی محروسه سینه حاکیم اولان نیظام و اینتیظامی بیر مطلوب سیستیم کیمی قلمه آلیر. دئمک، ساسانلیلار حاکیمیتی (224-651 میلاد ایللرینده) زردوشت آیینی نی قبول ائتمیش مؤبد اردشیربابکان باشچیلیغی ایله قورولموش و زامان کئچدیگی ایله دین آدینا ایجتماعیته اولمازین ظولمونو ائتمیش و چؤکوش آشاماسینا چاتمیش مؤبدلرسیستیمی ایجتماعیت و اینسانیت اوچون جاذیبه لی اولان یئنی آیین (ایسلام دینی) قارشیسیندا تاب گتیره بیلمه یه رک یئنیلگه گه اوغرامیشدیر (651 میلاد ایلینده). دئمک، سلمان پارسلارین مسلمان اولمالاری و ایسلام پیغمبری نین یاخین صحابه لریندن بیری کیمی سئچیلمه لری بو دئدیکلریمیزه تانیقلیق ائدیر.
اردشیر بابکان قیلینج و اوخلاری ایله مزدا آیینی نی باشقا توپلوملاردا یایماق و او بؤلگه لرده کی سنتی فئدرال سیستیملری داغیداراق اونلاری مؤبدان مؤبد (ساسانیلر سیلسیله سی) آدینا مرکزیت سیستیم و حاکیمتینه باغلاماق دا او قدر قانسیز و قاداسیز اولمامیشدیر. اوسته مزدک بامدادان ایمضاسی ایله یازان موألیف مباهات ائتدیگی (فرزندان فرخیته و از جان گذشته این خاندان...) اردشیربابکانین کیم اولدوغونو و ایران ممالیکی محروسه سینده نه ائتدیگینه داییر بیلگی الده ائتمکده فایدا وار. ساسانلی سیلسیله سی نین قوروجوسو اردشیر بابکان بیر زردوشت مؤبدی ایدی. اردشیر بابکان او زامانکی ایران ممالیکی محروسه سی نین موختلیف دیل و مدنیت زنگینلیگینی نظره آلاراق بوگونکو فارس راسیستلری کیمی نژاد اساسیندا بیر ایمپراتور قورماق آرزوسوندا دئییل، زردوشتچولوک و میتراچیلیغی اساس گؤتوره رک بو مؤبد تختدن دوشسون، او بیری مؤبد تخته چیخسین و یونانلیلر ایله موجادیله ایچینده ییک دئیه سنتی فئدرال حاکیمتلری حذف ائده رک مرکزیتچی بیر سیستیم یاراتماغا چالیشدیلار. بو آشامالاردا یئر صاحیبلری و فئوداللار مؤبدان مؤبدین بو ایشلرینه و اولارین حددن آرتیق مقام پرست اولدوقلارینا و قودرتلری نین آرتماسینا شاهید اولدولار. دئمک، ساسانلار ایمپراتورلوغو زامان کئچیدی ایله مؤبدان مؤبدین اسارتینه دوشموش بیر ایمپراتورلوق ایدی. مؤبدلر دین فوندامئنتالیستلیگی واسیطه سی ایله یونانلیلارین تأثیرینی اؤز ایمپریالارینا قارشین دفع ائتمه گه چالیشمالارینا باخمایاراق زامان کئچیدی ایله زردوشتلیکدن اوزاقلاشاراق میتراچیلیق، پارسچیلیق و یونانچیلیق الئمئنتلرینی بیر آرایا گتیره رک دؤولت مذهبی دئیه بیر ملغمه یاراتماغا چالیشدیلار. مانی و مزدک حرکتلری نین ساسانلیلار زامانی اورتایا چیخماسی و سلمان پارسی نین پیغمبرین یاخین مرید و صحابه سی اولماغا چالیشمالاری نین اساس ندنلریندن بیری ده مؤبدلر حاکیمیتی نین خالق اینانجلاریندان اوزاشلادیغیندا آختاریلمالیدیر(3).
پارسلارین آزاده لیک مقوله سینه گلدیکده (باخ اوسته: آزادگی و سرفرازی نیاگان....) هخامنشلرین مدنیت دوشمنی اولدوقلارینی (باخ: ناصر پورپیرارین دوازده قرن سکوت آدلی اثرینه) نظره آلاراق ساسانلیلار زامانیندا دین ریساله سیی کیمی قبول اولونان "وئندیداد" کیتابیندا خانیملارین آیلیق عادتلری (عادت ماهانه) اولدوقلاری زامان – اؤزلرینی اوددان و اؤز ارلریندن آیری و بیر ایت کیمی قاویلاراق توپلومدان اوزاق قالما، حتی توکلرینی بیر موردار وسیله کیمی بیر پاک یئره دگمک اوچون ایمکان تانیماماق مسئله سی نی نظره آلدیقدا فارس باستانگرایلارین اجدادلاری ساییلان ساسانلی مؤبدلرین نه قدر آزاده و سرفراز اجداد صاحیبلری اولمادیقلاری اورتایا چیخمیش اولار. دئمک، مؤبدلر دین آدینا خالقین شخصی یاشاییشینا دخالت ائتمه گه چالیشاراق خالقی حاکیمیتدن و حاکیمیت آدی تانینان دیندن دؤیورما مقامینا چاتمیشدیلار. بئله لیکله ایسلام دینی نین ایران ممالیکی محروسه سینه گلمه سی و خالقین آچیق کؤنول ایله ایسلامی قبول ائتمه سی ایران ممالیکی محروسه سینده کی یاشایان هر بیر اینسان اوچون دینی و مدنی قورتولوش ساییلیرمیش (3).
بیلیندیگی کیمی عربلر ایران ممالیکی محروسه سینی اله کئچیردیکدن سونرا ایلک اولاراق زردوشتلیک قارشیسیندا آنلاییش گؤستره رک توپلومون (ایجتماعیتین) قورولوشونو سؤکه رک یئنی نیظام و اینتیظام یاراتماغا چالیشمیشلار. آنجاق ایسلامیت آیینینه گؤره "نجیس" تانینان زردوشتلر ایسلامیتی قبول ائتمه دیکلری تقدیرده جزیه دئیه وئرگی اؤده مک زوروندا قالمیشلار. دئمک، ساسانلی حاکیمیتلری نین ترسینه ایسلامیتی ایلک اولاراق قبول ائتمه گن اینسانلاردان اؤز دین و آیینلرینی یئرینه گتیرمک حاقلاری آلینمامیشدیر(3).
اهورا مزدا مسئله سی و بوگونکو زردوشتلر
مزدا آیین طرفدارلاری نین اینانجینا گؤره اهورامزدا وارونا ساییلار (4). بو اینانجا اساساً دئوا (سانسکریتجه देव) کلمه سی – سونراکی زردوشت آیینینده ایفاده اولونان اهریمن- اینسانلاردان یوخاری مکانلاردا اینسان اولان الله لارا (اوخو: فیرعونلارا) خیدمت ائدن موجودلار اوچون ایستیفاده اولونارمیش. بو اینانجا اساساً دئوالار طبیعتدن خاریج دئییل، طبیعت ایله بیربیرلرینی تکمیللتمیش موجود کیمی قبول اولونارلار. اهورا مزدانین 7 بؤلوک (تال، قطعه) بولودو و سولار دئیه خانیملاری (اهورانیس) و گودوکچولری وار. ارونا (مزدا آیینی نین فلسفه سینه گؤره هوری ویا ملکه) ریتا اوچون کئشیک وئرر. اهورا مزدا اینانجینا اساساً گونش الله لار اوچون بیر گؤرن گؤز ماهیتی داشییار.
اوسته کی فاکتلاری نظره آلاراق آدی بللی اولمایان فارسلارین پیغمبر دئدیکلری زردوشت " قیزیللی دوه صاحیبی یا دوه چی" اهورا مزدا آیینینه یئنی دون گئیدیره رک اونو کئچمیش مقاله ده ایشاره ائتدیگیمیز کیمی یئنی بیر دین دئیه زامانینداکی اینسانلارا تقدیم ائتمه گه چالیشمیش (5) و مؤبد اردشیر بابکان ایران ممالیکی محروسه سینده زردوشتلیگی رسمی دین اعلام ائتمیشدیر. بونلارا باخمایاراق ایران ممالیکی محروسه سینده کی اینسانلار، ایسلامی قبول ائتدیکلریندن سونرا ایسلامیتی قبول ائتمه گن زردوشتلر کیچیک فرقه لر کیمی اؤز یاشاییشلارینا داوام ائتمیشلر. زردوشتچولوک هیندوستاندا پارسچیلیق (فارسچیلیق) ساییلار. 1976 اینجی ایل 130000 نفر اؤزونو زردوشت آیینینه تابع تانی ییرمیش. اونلارین 77000 نفری هیندوستاندا، 25000 نفری ایراندا، 5000 نفری پاکیستاندا و 23000 نفری آمریکا بیرلشمیش شتاتلاریندا یاشاماقدادیرلار (5).
مزدک بامدادان آدلی موألیفدن اوخویوروق:
" ما هیچگاه عرب نشدیم، چرا که همیشه برادری و یا خواهری از این خانواده برمیخاست و گاه با نهادن جان خود بر کف، پَستو‌ها و کُنجهای پنهان این خانه را در جستجوی نشانی از پدر و مادر راستین ما می‌کاوید، آنرا می‌یافت و در برابر چشمان ما می‌گرفت تا از یاد نبریم که کیستیم. اگر کُپتیان نیز چون ما تنها یک فردوسی می‌داشتند، امروز به زبان اِشناتون، توت آنخ آمون و رامسِس سخن می‌گفتند و میهن خود را نه «جمهویه مصر العربیه» که «کُپت» می‌نامیدند."(2).
اوسته گؤروندوگو مزدک بامدادان ایماضی ایله یازان موألیف عرب اولمادیقلارینا داییر مباهات ائدیر. ائله بیل، تاریخ سورجینده عربلشمک اوزره اولان توپلوملار اینسان اوولادی دئییلمیشلر. یالنیز اؤزلرینی باستانگرایلیق مقوله سینه باغلی بیلن ذات عالیلر اینسان ساییلیرمیشلار. گؤروندویو کیمی موألیف زردوشتلوک و ساسانلیلیق مقوله سیندن حرکت ائتدیگی و فارس دیل و مدنیتینی ساسانلیلارین قالیغی کیمی قلمه آلدیغی و مصیر مملکتینده کی اینسانلارین هامیسینی عرب بیلدیگی اوچون میصیرلرده فردوسی اولسایمیش، اونلار دا »اشناتون«، »توت آنخ آمون« و »رامیس«لرین دیللرینی دانیشارمیشلار ایددعاسینی اورتایا قویماغا چالیشیر. بئله لیکله او بوگونکو میصیرده قیپت دئیه دیل و مدنیت باخیمیندان بیر ائتنوسون اولمادیغینی اورتایا قویماغا چالیشیر. یئری گلمیشکن دئمه لی ییک: بوگون دیل و مدنیت باخیمیندان کئچمیش قیپتلارا دالاقلی میصیرین نیل چایی نین ساحیللرینده خیریستیانلیغا اینانان اینسانلارین بیر چوخو دیل و مدنیت باخیمیندان کئچمیش قیپتلارین قالیقلاریدیرلار. بو دا میصیرلرین ایسلامیتدن اؤنجه خیریستانلیغی قبول ائتدیکلرینی اورتایا قویور. دئمک، بورادا سؤز موضوعسو فردوسی لرین اولمادیغیندان دئییل، عرب دیل و مدنیتی ایسلامیت ایله میصیر ویلایتینه گئتمه سیندن عیبارتدیر. بو مسئله یالنیز مصیر و لیبی، مراکئش، الجزاییر دئییل، ایران ممالیکی محروسه سی اوچون ده کئچرلی ساییلا بیلردی. بیلیندیگی کیمی کئچمیش ایران ممالیکی محروسه سینده 300 ایلدن آرتیق عرب دیلی حاکیمیت ائتمیش، بوگون ده عرب کولتورونون آیریلملز بیر پارچاسی اولان ایسلامیت اینانج اولاراق ایران ممالیکی محروسه سینده حاکیمیت ائدیر. عرب دیل و مدنیت حاکیمیتینی ایران ممالیکی محروسه سینده گئری اوتورتماقدا کؤمگی اولان ایلک اولاراق عباسی خلیفه لیگی علیهینه ایسلامیتین اؤزونده بعضی معتریض اینسانلارین ایران ممالیکی محروسه سینده کی یئرلی اینسانلاری عباسیلرین علیهینه کؤروکلمه لری، عباسیلری اونلارا اصل دوشمن کیمی تانیتمالاری و ساییره بؤیوک رول اوینامیشدیر. فارس دیلینه گلدیکده فردوسیدن چوخ اؤنجه افغانیستاندا سامانلیلارین فارسجانی دربار دیلی ائتمه لری، محمد بلعمی طبری تاریخیندن فارسجایا ترجومه ائتمه سی فارس دیلی نین یاشاماسی اوچون بیرینجی شانس اولموشدور. سونرالار قزنه لی سلاله سی باشلاریندا سلطان محمود قزنه لی فارس دیلینی سامانلیلاردان تحویل آلاراق دربار و دیوان دیلی کیمی ساخلاماسی فارس دیلی نین یاشاماسی اوچون ایکینجی شانسلاردان تانینمالیدیر. اوچونجو شانس سلجوقلو، خازرمشاهلیلار، موغوللار، قاراقویونلو، آق قویونلولار، صفوی و قاجارلارین فارس دیلینی دیوان و شعری دیلی اولاراق گوندمده ساخلامالاریندا آختاریلمالیدیر. دئمک، تورک سیلسیله لری نین فارس دیل و مدنیتینه سایقی ایله یاناشمالاری فارس دیلی نی ایران ممالیکی محروسه سینده بیر مملکت دیلی کیمی یاشاماسینا ایمکان یاراتمیشدیر. باستانگرایلارین و فارس شوونیستلری نین چؤرک بیلمزلیگی تاریخی فاکتلاردان هئچ نه دییشدیره بیلمز دئیه دوشونولمه لیدیر.
قایناقلار:
1 http://www.azadtribun.com/040.htm
1.1 http://www.azadtribun.com/034.htm
1.1.1 http://www.azadtribun.com/017.htm
2 مزدک بامدادان، مارا آب خواهد برد: http://politic.iran-emrooz.net/index.php?/politic/more/4115/
3 Bukowski: http://iranreloaded.q2u.net/archives/002691.html
4- اهورامزدا هیندولارین ایناندیقلاری الله ایمیش. او بوتون خبری اولدوغو جورم صاحیبلرینی مجازات ائدرمیش.
5- Wolfdietrich von Kloeden: Biographisch-Biographisches Kirchenlexikon, Band XIV, 1998;Verlag Traugott Bautz Spalten 344-355
6 http://www.frickes.de/cgi-bin/YaBB.pl?board=1010;action=display;num=1058352396
ایشیق سؤنمز 20.09.2005