فارس ایستعماری-9
بیلیندیگی کیمی ایران ممالیکی محروسه سی 1925 اینجی ایلیندن(فارس شوونیسمیسمینین الینه دوشدوکدن) سونرا بو شوونیستی سیاست دیل و مدنیت باخیمیندان ایستعماری (مستملکه) ماهیتی داشییاراق فارس اولمایان میللتلرین دیل و مدنیتلرینی یوخ ائتمک واسیطه سی ایله بو دیل و مدنیتلری فارس دیل و مدنیتی ایله عینیلشدیرمه گه داوام ائتمیش.
بو ایستعماری سیاستی حیاتا کئچیرمکده تاریخی دوشونجه باخیمیندان یوخسول فارس اولمایان آیدینلارا »دلی آداما یئل وئر، الینه بئل وئر!!« داورانیشینی اویقونلاداراق اونلاری بو ایستعماری سیاستی حیاتا کئچیرمکده قاباغا سالماغا چالیشمیشلار. یئری گلرکن فارس ایستعماری خیدمتینده اولان محمود افشار، احمد کسروی، یحیی ذکا، و مینلر بونلارا بنزر دیل و مدنیت اریتمه باخیمیندان میمونلاشمیش (تقلید ائدن) مووجودلارین یانلیش داورانیشلارینین شاهیدی اولوروق.
دئمک، بوگون ایران ممالیکی محروسه سینده کی میللتلرین دیل و مدنیت تاریخلرینی فارس دیل و مدنیت تاریخی کیمی یوزوملاماغا (یالاندان تعبیر تفسیر ائتمه گه) اساس یاراتمادا فیکیر باخیمیندان فارس ایستعماری خیدمتینه اؤزلرینی وقف ائتمیش آذربایجانلیلارین دا رولو اولدوقجا بؤیوک اولموش. بوگون ایسلام دینی آدینا ایران ممالیکی محروسه سینده فارس اولمایان میللتلری »فارسلیق و ایسلامیت« وحدت عامیلی دئیه فارس اولمایان میللتلرین دیل و مدنیتلرینی داناراق اونلارین میللی و مدنی حاقلارینی اللریندن آلماق ایران ممالیکی محروسه سینده فارس ایستعمارینا خیدمت ائتمه نین آیریلماز بیر بؤلومو کیمی دگرلندیریلمه لیدیر. بو باخیمدان جومهوری ایسلامی ایران دئیه فارسچیلیق خیدمتینده اولان شخص و تشکیلاتلار فیکیر باخیمیندان فارس ایستعمارینین حمیق خادیملری، فارس اوپوزیسیونو دئیه فارس دیل و مدنیتینی اؤزلری اوچون اساس توتان شخص و تشکیلاتلار ایسه ایدئولوژی باخیمدان تهران حاکیمیتینه موخالیف گؤرونمه لرینه باخمایاراق فیکیرباخیمیندان ایدئولوژی قوللاریندان باشقا هئچ نه اولا بیلمزلر( بو دا اونلارین دونیایا ایسلام گؤزلوگوندن دگیل، باشقا گؤزلوکلر ایله باخمالاریندان ایلری گلیر).
دئمک، فارسچیلیق سیاستینده سوسیالیت، کومونیست آختاریشیندا اولان آذربایجانلیلار ایستالینی اؤزلری اوچون بیر اولگو نظره آلمیشسالار، ایستالین نین، اؤز دوشونجه موخالیفلرینی یوخ ائتمه سی نی و کومونیست پارتیسینه ده اعمال نوفوذ ائدره رک، قافقازداکی قونشو خالقلارین تورپاغیندن قوپاراراق گورجوستان دئیه بیر مملکت یاراتماسینی نظره آلمالیدیرلار( بیلیندیگی کیمی گورجوستان دئیه باش شهر تیفلیس اولماقلا اوسئتلر یاشایان گونی اوسئتیستان، آبخازلار یاشایان آبخازیستان، آجارلار یاشایان آجاریستان و آذربایجانلیلار یاشایان بورچالی ویلایتلری زور ایله بیرلشدیریله رک گورجوستان جومهوریتی قورولموشدور. آبخاز و گونی اوسئتلیلرین تیفلیسه قارشی دورماسی و بورچالی ویلایتینده کی آذربایجانلیلارین بوگون ده گورجو لر طرفیندن سیخیشدیریلاراق آذربایجان جومهوریتینه قاچقین اولمالاری گؤز قاباغیندادیر). بونلارا باخمایاراق بیلیندیگی کیمی تورک دیللی خالقلار قبول ائتدیکلری لاتین گرافیکاسی 1937 (بیر نظره گؤه 1939) ایلینده ایستالین و سؤویئت کومونیست پارتیسینین زوراکیلیغی ایله روس گرافیکاسی ایله دگیشیلدیگینه باخمایاراق گورجو و ائرمنی خالقلاری نین دیل گیرافیکاسی دگیشیلمز سؤویئتلر زامانینی یاشایاراق موستقیل گورجوستان و ائرمنیستان (1990) جومهوریتلرینه دک داوام ائتمیشدیر. دئمک، شوعورلو مووجودلار ایدئولوژی گؤروشلرینه باخمایاراق اؤز کیملیک و منلیکلرینه دگر وئرمه لی اولارلار( بورادا سؤویئت کومونیست پارتیسینداکی کومونیست دئیه گورجو و ائرمنیلر نظرده توتولور). اوسته کی پارامئترلری نظره آلاراق بو آرادا ایسلامیت آدینا فارس شوونیستلیک سیاستینی داوام ائتدیرن تهران حاکمیت داییره لرینده کی عوامفریب موسلمان دونونا بورونموش فارس شوونیستلرینی، اوپوزیسیون و ایران سراسری تشکیلاتلاری دیئه ایران آدی دالیندا گیزلنن ساغ و سول موختلیف فارس تشکیلاتلارینداکی فارس ایستعمارینی اساس گؤتورن دئموکرات مئاب شخصلری ده نظردن کئچیریرسک، شوعورلو مووجودلارین اؤز دونیا گؤروشلریندن آسیلی اولمایاراق اؤز کیملیک و منلیکلرینه اؤنم وئردیکلرینین شاهیدی اولاریق.
بیلیندیگی کیمی بو ایستعماری سیاست پهلویلر زامانی آریا مدنیتی آدینا حیاتا کئچیردیسه، بوگون عادی اینسانلارین دینی اینانجلارینی سؤموره رک ایسلام اوممتی آینا حیاتا کئچیر. بو آرادا ایران ممالیکی محروسه سینده کی عربلری اؤز یاشادیقلاری میللی ویلایت و بؤلگه لرده بیر آزلیق دورومونا دوشورمه گه چالیشمانین شاهیدی اولوروق(1)
مسئله بونلا دا یکونلاشمیر. بو عمل خاروارلار جنایتین گؤرونن بیر سیخیم اؤرنگیدیر. باشقا بیر مسئله فارس اولمایان میللتلرین تاریخی کیملیکلرینی اونلارین کند، شهر، داغ و دنیزلرینین اوزریندن سیلمکدیر. بیلیندیگی کیمی یئنی لیکده فارس معاریفلیک سیستیمینین(اداره آموزش و پرورش) گونباتان آذربایجانداکی شعبه سی نین اورمیه گؤلونده شاهچیلیق دیوان توتماسیندان اماندا قالان آدالارین (جزیره لرین) تورک آدلارینی فارس دیلینه دگیشدیریلمه سی گونون موضوعسو اولموش. (2)
قایناقلار:
1 سید محمد علی ابطحی، رئيس دفترجمهورب اسلامی ايران
http://www.alahwaz.com/1362.htm
2 اداره آموزش و پرورش، تغییر نامهای ترکی جزایر اورمیه به فارسی: http://www.azadtribun.com/0249.htm
ایشیق سؤنمز 10.04.2005